தோனி பெயரில் இன்டர்நெட்டில் "போலிகள்'

இந்திய கேப்டன் தோனி பெயரில், டுவிட்டர் இணையதளத்தில் போலிக் கணக்குகள் துவங்கி ரசிகர்களை ஏமாற்றி வருவது தெரியவந்துள்ளது.

"டுவிட்டர்' எனும் இணையதளம் எஸ்.எம்.எஸ்., தகவல்களை போல் குறுகிய செய்திகளையும், தகவல்களையும், நண்பர்களுக்குள் உடனுக்குடன் பரிமாறிக் கொள்ள உதவுகிறது. இந்த இணையதளத்தில் கணக்கு வைத்திருப்போருக்கு பிரத்யேக பக்கம் வழங்கப்படுகிறது.

அதில், 140 எழுத்துக்களுக்குள் சுருக் கமான தகவல்களை அனுப்பினால், அத்தகவல் அவருடன் தளத்தில் இணைப்பு பெற்றுள்ள அனைத்து நண்பர்களுக் கும் உடனுக்குடன் சென்றுவிடும். அதைப் போல அவர்கள் அனுப்பும் தகவல்களும் இவர்களுக்கு வந்து சேரும்.

மொபைல் எஸ்.எம்.எஸ்., வழியாகவும், இணையதளம் வழியாகவும் "டுவிட்டர்' தளத்தில் தகவல்களை "அப்டேட்' செய்து கொள்ளமுடியும். ஒரு முறை "அப்டேட்' செய்தாலே அவருடன் நூற்றுக்கணக்கானோர் பேர் தொடர்பு கொண்டிருந்தால் கூட அத்தனை பேருக்கும் உடனடியாக தகவல் சென்று சேர்ந்து விடும்.

இவ்வசதி பெரும் பாலானோரை கவர்ந்து உள்ளதால், இந்த இணையதளத்தில் கணக்கு வைத்திருப்போர் எண்ணிக்கை அதிகரித்து வருகிறது.

சிக்கலில் பிரபலங்கள்: இந்திய கிரிக்கெட் அணி கேப்டன் தோனி, மாஸ்டர் பேட்ஸ்மேன் சச்சின் உள்ளிட்ட கிரிக்கெட் வீரர்கள் பலரது பெயரில் போலி கணக்குகள் டுவிட்டரில் துவங்கப் பட்டுள்ளன. தோனி பெயரில் 4, சச்சின் பெயரில் 7 கணக்குகள் டுவிட்டரில் உள்ளன.

தோனி பெயரில் உள்ள பக்கத்தில் அவரே தனது சொந்த கருத்தை தெரிவித்திருப்பது போல செய்திகள் அவ்வப்போது இடம் பெறும். இதனை உண்மை என நம்பி, ஏராளமானோர் தோனியின் பெயரில் உள்ள கணக்குடன் தங்களையும் இணைத்துக் கொண்டுள்ளனர்.

ஆனால் தோனி குடும்பத்தினர், இதை முற்றிலும் மறுத்துள்ளனர். டுவிட்டர் இணையதளத்துடன் தோனிக்கு எந்த தொடர்பும் இல்லை என அவர்கள் தெரிவித்து உள்ளனர். இதனை அடுத்து டுவிட்டர் இணையதளத்தில் இணைந்துள்ள பலர் ஏமாற்றம் அடைந்துள்ளனர்