உலக கோப்பை "டுவென்டி-20' ஒரு டிக்கெட் விலை ரூ. 13

இலங்கையில் நடக்கும் "டுவென்டி-20' உலக கோப்பை போட்டிக்கான டிக்கெட் விற்பனை துவங்கியது. லீக் போட்டிகளுக்கான ஒரு டிக்கெட் விலை ரூ. 13 தான்.

சர்வதேச கிரிக்கெட் கவுன்சில் (ஐ.சி.சி.,) சார்பில் நடக்கும், நான்காவது "டுவென்டி-20' <உலக கோப்பை போட்டி, இலங்கையில் வரும் செப்., 18 முதல் அக்., 7 வரை நடக்கவுள்ளது.

இதில் இந்தியா, பாகிஸ்தான் ஆஸ்திரேலியா உட்பட 10 நாடுகளுடன், தகுதி சுற்றில் வெற்றி பெற்ற ஆப்கானிஸ்தான், அயர்லாந்து என, மொத்தம் 12 அணிகள் பங்கேற்கின்றன. இந்த அணிகள் நான்கு பிரிவுகளாக பிரிக்கப்பட்டு, லீக் முறையில் போட்டிகள் நடக்கும். பின், ஒவ்வொரு பிரிவிலும் முதல் இரு இடங்களைப் பெறும் அணி, "சூப்பர்-8' சுற்றுக்கு முன்னேறும்.

இந்த எட்டு அணிகளும் தலா இரு பிரிவுகளாக பிரிக்கப்பட்டு, இதில் முதல் இரு இடங்களை பெற்ற அணிகள் அரையிறுதியில் விளையாடும். பைனல், அக்., 7ல் கொழும்புவில் நடக்கும்.

நேற்று துவங்கியது:

இப்போட்டிக்கான டிக்கெட் விற்பனை, நேற்று முதல் துவங்கியது. லீக் போட்டிகளுக்கு டிக்கெட் விலை மிகவும் குறைவாக ரூ. 13 ஆக நிர்ணயம் செய்யப்பட்டுள்ளது. அடுத்த சுற்று போட்டிகளுக்கு ரூ. 127 என்றும், பைனலுக்கான டிக்கெட் விலை ரூ. 2,300 ஆகவும் விற்கப்படுகிறது.

அதிகபட்சம் "6':

ஐ.சி.சி., இணையதளத்தின் மூலம், ஆன் லைனிலும் டிக்கெட்டுகளை பெற்றுக்கொள்ளலாம். "சூப்பர்-8' பிரிவு போட்டிகளுக்கு, நபர் ஒன்றுக்கு அதிகபட்சமாக, நான்கு டிக்கெட்டுகள் வழங்கப்படும். அரையிறுதி மற்றும் பைனலுக்கு அதிகபட்சம் 6 டிக்கெட்டுகள் வரை வாங்கிக் கொள்ளலாம்.

காரணம் என்ன:

தற்போது இலங்கையில் நடக்கும் இங்கிலாந்துக்கு எதிரான டெஸ்ட் தொடரின் போது, டிக்கெட் விலை 10 மடங்கு உயர்த்தப்பட்டது. நாள் ஒன்றுக்கு ரூ. 500 என்றிருந்த டிக்கெட் விலையை, ரூ. 5000 ஆக உயர்த்தினர். இதனால் இரு நாட்டு ரசிகர்கள் மத்தியில் கடும் எதிர்ப்பு வெளியானது. இதனால் தான், உலக கோப்பை டிக்கெட் இந்தளவுக்கு குறைக்கப்பட்டுள்ளதாக தெரிகிறது.

பெண்களுக்கு இலவசம்:

உலக கோப்பை "டுவென்டி-20' போட்டியின் போது, பெண்களுக்கான உலக கோப்பை தொடரும் நடக்கும். இதற்கான லீக் போட்டிகளின் போது, ரசிகர்களுக்கு இலவச அனுமதி தரப்பட்டுள்ளது. ஆண்கள் அணியினர் மோதும் அரையிறுதி, பைனலுக்கான டிக்கெட்டை பெறுபவர்கள், அதேநாளில் நடக்கும் பெண்கள் அரையிறுதி மற்றும் பைனலை பார்த்துக் கொள்ளலாம்.