கோல்கட்டாவில் கோலாகலம் - இன்று ஐ.பி.எல்., துவக்க விழா

ஆறாவது ஐ.பி.எல்., தொடரின் துவக்க விழா இன்று கோல்கட்டாவில் கோலாகலமாக நடக்க உள்ளது. இதில், பாலிவுட் நட்சத்திரங்கள் ஷாருக் கான், கத்ரினா கைப் மற்றும் பிரபல அமெரிக்க "ராப்' பாடகர் பிட்புல் உள்ளிட்டோர் ஆடிப் பாடி அசத்த காத்திருக்கின்றனர்.

ஆறாவது ஐ.பி.எல்., "டுவென்டி-20' தொடர் (ஏப்.3-மே 26)நாளை துவங்குகிறது. இதில், சென்னை சூப்பர் கிங்ஸ், மும்பை இந்தியன்ஸ், டில்லி டேர்டெவில்ஸ் உட்பட 9 அணிகள் பங்கேற்கின்றன. மொத்தம் 76 போட்டிகள் என, அடுத்த 51 நாட்களுக்கு கிரிக்கெட் ரசிகர்களுக்கு சிறந்த விருந்து காத்திருக்கிறது.

 இதன் துவக்கவிழா இன்று கோல்கட்டாவில் உள்ள, இந்தியாவின் மிகப் பெரிய "சால்ட் லேக்' மைதானத்தில் நடக்கிறது. இங்கு சுமார் 1 லட்சத்து 20 ஆயிரம் பேர் அமர்ந்து நிகழ்ச்சிகளை பார்க்கலாம். கால்பந்து போட்டிக்கான இந்த மைதானத்தில் பிரமாண்ட மேடை அமைக்கப்பட்டுள்ளது. செயற்கை இழையிலான களம் பாதிக்கப்படாமல் ஏற்பாடுகள் செய்யப்பட்டுள்ளன.

விழா இந்திய நேரப்படி இரவு 7.00 மணிக்கு துவங்கும். முதலில் ராட்சத பலூன் ஒன்று ஐ.பி.எல்., கோப்பையுடன் மைதானத்தில் வந்திறங்கும். "ஐ.பி.எல்., உலகம்' என்ற பெயரிலான இந்நிகழ்ச்சியில், 9 அணிகளும் 9 கிரகங்கள் போல காட்சி அளிக்கும். பின் "ஓம்' என்ற வார்த்தையை குறிக்கும் வகையில் தங்களது கையில் "டார்ச்' ஒளியுடன் கலைஞர்கள் அணிவகுத்து நிற்பர்.

தொடர்ந்து "பாலிவுட்' நடிகரும் கோல்கட்டா அணி உரிமையாளருமான ஷாருக் கான், முன்னணி நடிகைகளான கத்ரினா கைப் மற்றும் தீபிகா படுகோனேவுடன் சேர்ந்து நடனமாடி மகிழ்விக்க உள்ளார். அமெரிக்காவை சேர்ந்த "ராப்' பாடகர் பிட் புல் தன் பங்கிற்கு அமர்க்களப்படுத்த காத்திருக்கிறார். 

பாலிவுட் இசையமைப்பாளர் பிரித்தம் இசையில் 300க்கும் மேற்பட்டோர் நடனமாட உள்ளனர். சீனாவின் "ரெட் பாப்பி' அமைப்பை சேர்ந்த பெண் இசைக்கலைஞர்கள் பங்கேற்று திறமை வெளிப்படுத்த உள்ளனர். 

நடனப் பெண்கள், ஜிம்னாஸ்டிக்ஸ் சாகசம், பறந்து இசைக்கும் "டிரம்ஸ்' கலைஞர்கள், "லேசர் ÷ஷா' போன்றவை ரசிகர்களை மெய்சிலிர்க்க வைக்கும். ஐ.பி.எல்., அணிகளின் கேப்டன்கள் அணிவகுப்பு மற்றும் கண்கவர் வாணவேடிக்கையுடன் நிகழ்ச்சி இனிதே நிறைவு பெறும். 

இது குறித்து ஷாருக் கான் கூறுகையில்,""இதுவரை இந்திய ரசிகர்கள் பார்த்திராத வகையில் துவக்க விழா மிகப் பிரமாண்டமாக இருக்கும். எனது படத்தில் இடம் பெற்ற பாடல்களுக்கு கத்ரினா, தீபிகாவுடன் சேர்ந்து ஆட உள்ளேன்,''என்றார்.