இந்தியாவுக்கு தங்க மழை

காமன்வெல்த் போட்டியின் மல்யுத்தத்தில் இந்தியா "ஹாட்ரிக்' தங்கம் வென்றது. ரவிந்தர் சிங், சஞ்சய், அனில் குமார் ஆகியோர் தலா ஒரு தங்கப் பதக்கத்தை தட்டிச் சென்றனர். துப்பாக்கி சுடுதல் மற்றும் மல்யுத்தத்தில் அசத்திய இந்தியா, நேற்று மட்டும் 5 தங்கப்பதக்கங்களை கைப்பற்றியது.

"ஹாட்ரிக்' தங்கம்:டில்லியில் உள்ள இந்திரா காந்தி ஸ்போர்ட்ஸ் காம்ப்ளக்சில் மல்யுத்த போட்டிகள் நடந்தன. இதன், "கிரிக்கோ-ரோமன்' 60 கி.கி., பிரிவில் ரவிந்தர் சிங் கலக்கினார். துவக்க சுற்றில் இலங்கையின் குமாராவை 13-0 என வென்றார். பின் அரையிறுதியில் நைஜீரிய வீரர் ரொமேசோ ஜேம்சை வீழ்த்தினார்.

பரபரப்பான இறுதிப் போட்டியில் ரவிந்தர் மற்றும் இங்கிலாந்தின் கிறிஸ்டபர் டெரன்ஸ் போசன் மோதினர். முதல் சுற்றில் ரவிந்தர் 2-0 என முன்னிலை பெற்றார். இரண்டாவது சுற்றில் சற்று திணறினார். ஆனாலும், நுட்பமான ஆட்டத்தை வெளிப்படுத்திய ரவிந்தர் 9---0 என்ற கணக்கில் வென்று, மல்யுத்தத்தில் முதல் தங்கம் கைப்பற்றினார். போசன், வெள்ளி மற்றும் நைஜீரியாவின் ரொமேசோ ஜேம்ஸ், வெண்கலம் வென்றனர்.

"கிரிக்கோ-ரோமன்' 74 கி.கி., பிரிவில் இந்தியாவின் சஞ்சய், தங்கம் வென்றார். இவர், தென் ஆப்ரிக்காவின் ரிச்சர்ட் பிரயன் அடினாலை 2-0 என்ற கணக்கில் வீழ்த்தினார். "கிரிக்கோ-ரோமன்' 96 கி.கி., பிரிவில் மற்றொரு இந்திய வீரரான அனில் குமார், ஆஸ்திரேலியாவின் ஹசன் பகிரியை 6-0 என்ற கணக்கில் வீழ்த்தி, தங்கப்பதக்கத்தை தட்டிச் சென்றார்.

தங்கம் வென்றது குறித்து ரவிந்தர் கூறுகையில்,""காமன்வெல்த் மல்யுத்தத்தில் "கிரிக்கோ-ரோமன்' பிரிவு முதல் முறையாக அறிமுகப்படுத்தப்பட்டது. இதில், முதல் தங்கம் வென்ற வீரர் என்ற பெருமையை பெற்றது மகிழ்ச்சியாக இருக்கிறது. இம்முறை தாக்குதல் பாணியிலான ஆட்டத்தை வெளிப்படுத்தியதால், எளிதில் வெற்றி பெற முடிந்தது,''என்றார்.

அரையிறுதியில் விர்தவால்

நீச்சலில் 50 மீ., "பட்டர் பிளை' பிரிவின், அரையிறுதிக்கு முன்னேறினார் இந்தியாவின் விர்தவால் காடே. நேற்று நடந்த காலிறுதிப் போட்டியில், விர்தவால் காடே, அர்ஜுன் முரளிதரன் ஆகியோர் பங்கேற்றனர். இதில், 24. 72 வினாடிகளில் போட்டி தூரத்தை கடந்த காடே, 8 வது இடம் பிடித்தார். அர்ஜூன் 20 வது (26.37 வினாடி) இடம் பிடித்தார். முதல் 16 இடங்கள் பெற்றவர்கள், அரையிறுதிக்கு முன்னேறினர். பாரா ஸ்போர்ட்ஸ் பெண்கள் நீச்சல் (50 மீ., பிரீ ஸ்டைல்) பிரிவில், இந்தியாவின் கிரண் டாக், அன்ஜானி படேல் ஆகியோர் அரையிறுதிக்கு தகுதி பெற்றனர்.

சோம்தேவ் அசத்தல்

டென்னிஸ், ஆண்களுக்கான ஒற்றையர் முதல் சுற்றுப் போட்டியில், இந்தியாவின் சோம்தேவ் தேவ்வர்மன், பகாமசின் டேவின் முல்லிங்சை எதிர்கொண்டார். விறுவிறுப்பாக நடந்த இப்போட்டியில், சோம்தேவ் 6-4, 6-2 என்ற நேர் செட்களில் முல்லிங்சை வீழ்த்தி இரண்டாவது சுற்றுக் முன்னேறினார். ஆண்கள் இரட்டையர் பிரிவு முதல் சுற்றுப் போட்டியில், இந்தியாவின் லியாண்டர் பயஸ், மகேஷ் பூபதி ஜோடி 6-3, 6-3 என்ற நேர் செட்களில், இலங்கையின் தினேஷ்காந்தன், அம்ரேஷ் ஜோடியை வீழ்த்தி காலிறுதிக்கு முன்னேறியது.

ஏமாற்றம்

பெண்களுக்கான நெட் பால், போட்டியில் இந்திய அணி, ஆஸ்திரேலியாவை எதிர்கொண்டது. இதில், அதிரடி ஆட்டத்தை வெளிப்படுத்திய ஆஸ்திரேலிய அணி 113-18 என்ற புள்ளிகள் கணக்கில் அபார வெற்றி பெற்றது. இதனையடுத்து இன்றைய 2 வது சுற்றுப் போட்டியில், இந்திய அணி, மாலவி அணியை எதிர்கொள்கிறது.

லான் பவுல்சில் கலக்கல்

லான் பவுல்சில், இந்திய அணி நேற்று அசத்தியது. இந்தியாவின் தினேஷ், பிரின்ஸ் ஜோடி 3-1 என்ற செட் கணக்கில் நமீபியாவின் வில்லியம் எராஸ்மஸ், வில்ஜோயன் ஜோடியை வீழ்த்தியது. குரூப் "பி' பிரிவில் நடந்த மற்றொரு போட்டியிலும், இந்த ஜோடி 5-1 என்ற செட் கணக்கில் நியூசிலாந்தின் ரிச்சர்ட், டேனி ஜோடியை வீழ்த்தியது. பெண்கள் பிரிவில், பிங்கி, டானியா, ரூபா ராணி ஆகியோரை உள்ளடக்கிய இந்திய ஜோடி, போட்ஸ்வானாவின் டிபோன், மார்டன், சென்னா நெல்லி ஜோடியை வீழ்த்தியது. இதன் மூலம் லான் பவுல்ஸ் போட்டியில், இந்திய அணி நேற்று "ஹாட்ரிக் வெற்றி' பெற்று அசத்தியது.

குத்துச் சண்டை அபாரம்

குத்துச்சண்டை 64 கி.கி., பிரிவில், இந்திய வீரர் மனோஜ் குமார், சியாரோ லியான் நாட்டை சேர்ந்த டேனியல் லசோயாவை வீழ்த்தினார். 49 கி.கி., குத்துச் சண்டைப் போட்டியில், மற்றொரு இந்திய வீரர் அமன்தீப் சிங், கென்யாவின் பீட்டரை வீழ்த்தினார். இவ்வெற்றியின் மூலம் இந்திய வீரர்கள் இருவரும், காலிறுதிக்கு முந்தைய சுற்றுக்கு முன்னேறினர்.

வெடிகுண்டு மிரட்டல்

காமன்வெல்த் விளையாட்டு கிராமத்துக்கு நேற்று மதியம் 2.30 மணிக்கு, வெடிகுண்டு மிரட்டல் வந்தது. டெலிபோனில் வெடிகுண்டு மிரட்டல் விடுத்த, அந்த நபர் பெயரை வெளியிட வில்லை. இதனையடுத்து விளையாட்டு கிராமத்தில் உள்ள 34 அடுக்குமாடி குடியிருப்புகளில் வெடிகுண்டு நிபுணர்கள் தீவிர சோதனை செய்தனர். தவிர, பிரகதி மெய்டனில் உள்ள மீடியா சென்டரிலும் சோதனை மேற்கொள்ளப்பட்டது. ஆனால் இது வெறும் புரளி என டில்லி போலீசார் தெரிவித்தனர். மேலும் டெலிபோனில் பேசிய அந்த சிறுவனை கைது செய்தனர்.

ஹாக்கி: இந்தியா வெற்றி

காமன்வெல்த் போட்டியில், நேற்று நடந்த ஆண்களுக்கான ஹாக்கி லீக் போட்டியில், இந்திய அணி 3-2 என்ற கோல் கணக்கில் மலேசியாவை வீழ்த்தியது.

Read More

5 தங்கம் வென்றது இந்தியா: பட்டியலில் 2 ம் இடம்

காமன்வெல்த் போட்டியில் தங்கம் பெறுவார்கள் என்ற இந்தியர்களின் எதிர்பார்ப்பை நிறைவேற்றிய தங்க மகன்கள் அபினவ்பிந்த்ரா மற்றும் ககன்நரங் வீரமகன்களுக்கு வாழ்த்துக்கள் குவிந்த வண்ணம் உள்ளது.

இந்தியா தற்போது தங்கம் 5, வெள்ளி 4, வெண்கலம்2 என மொத்தம் 11 பதக்கங்கள் பெற்று பதக்க பட்டியலில் 2 வது இடத்தில் உள்ளது. ஆஸ்திரேலியா 8 தங்கம், 8 வெள்ளி 3 வெண்கலம் ‌பதக்கம் வென்று பதக்க பட்டியலில் முதலிடத்தில் உள்ளது.

நேற்று முன் தினம் துவங்கிய காமன்வெல்த் கோலாகல போட்டியில் பிரிட்டன் இளவரசர் சார்லஸ், அவரது மனைவி கமீலா சிறப்பு விருந்தினராக கலந்து கொண்டனர். போட்டி ஏற்பாடுகள் தொடர்பாக பல்வேறு புகார்கள் எழுந்தாலும், கோலாகல துவக்க விழாவை அடுத்து இந்தியா தனது பெருமையை உலகம் முழுவதும் பறைசாற்றிக்கொண்டது.

முதல் நாள் ஆட்டத்தில் பதக்கம் பெற்ற வீரர்கள்:

முதல் நாள் ஆட்டத்தில் நேற்று இந்திய வீராங்கனைகள் பளு தூக்கும் 48 கிலோ எடை பிரிவில் இந்தியாவின் சோனியாசானு வெள்ளி பதக்கத்தையும், சந்தியார் ராணி வெண்கலம் பதக்கத்தையும் பெற்றனர். 56 கிலோ பிரிவு பளூதூக்குதல் பிரிவில் இந்திய வீரர்கள் சுகேன் தேவ் வெள்ளி பதக்கமும், ஸ்ரீநிவாசா வி ராவ் வெண்கல பதக்கமும் வென்றனர். நேற்றைய போட்டியில் இந்தியா 2 வெண்கலம், 2 வெள்ளி மொத்தம் 4 பதக்கம் பெற்றது.

இன்று நடந்த 10 மீட்டர் ஏர் ரைபிள் துப்பாக்கிச்சுடும் போட்டியில் இந்திய வீரர்கள் அபினவ்பிந்த்ரா ,ககன்நரங் ஜோடியினர் வெற்றி பெற்று தங்கம் வென்றனர். ககன் நரங் 99, 100, 100, 99, 100, 100 என மொத்தம் 598 புள்ளிகளையும், அபினவ் பிந்த்ரா, 100, 98, 99, 100, 99, 99 என 595 புள்ளிகளையும் பெற்றனர். இங்கிலாந்து ஜோடியான ஜேம்ஸ் ஹக்கிள், கென்னி பார் 2வது இடத்தையும், வங்கதேசத்தின் அப்துல்லா ஹெல் பாக்கி, முகம்மது ஆசிப் ஹூசேன் கான் 3வது இடத்தையும் பிடித்தனர்.

ஒரே நாளில் 5 வது தங்கம் : அபினவ் பிந்த்ரா - ககன்நரங் ஜோடியினர் தங்கம் வென்ற சில நிமிடங்களில் மீண்டும் ஒரு தங்கம் கிடைத்தது. 25 மீ பிஸ்டல் பிரிவில் இந்திய வீராங்கனைகள் அனீஷா சயீத், ராகி சர்னோபட் ஜோடியினர் மற்றாரு தங்கப் பதக்கத்தை வென்றனர். 50 மீ பிஸ்டல் பிரிவில் தீபக் சர்மா, மற்றும் ஓம்கார் சிங் வெள்ளிப் பதக்கம் ஜோடியினர் வென்றனர். மாலை 60 கிலோ பிரிவில் மல்யுத்த பிரிவில் ரவிந்தர் சிங் இங்கிலாந்து வீரர் கிறிஸ்டோபர் போசனை வீழ்த்தி தங்கப்பதக்கம் வென்றார். இதேபோல் பளூதூக்குதல் 74 கிலோ கிரேசா ரோமன் பிரிவில் இந்தியாவின் சஞ்சய் தங்கப்பதக்கம் வென்றார். பளூதூக்குதல் 96 கிலோ கிரேசோ ரோமன் பிரிவில் இந்தியாவின் அனில் குமார் தங்கப்பதக்கம் வென்றார்.இதன் மூலம் இந்தியா 5 வது தங்கப்பதக்கத்தை வென்றது.

காமன்வெல்த் போட்டியில் இந்தியா தனது தங்க பதக்க வேட்டையை இன்று துவக்கியிருப்பது இந்தியர்களின் மனதை மகிழ்விக்கிறது என ரசிகர்கள் கருத்து தெரிவித்துள்ளனர். தற்போதைய நிலவரப்படி 7 வது இடத்தில் இருந்த இந்தியா முன்னோக்கி நகர்ந்து வருகிறது.

பதக்க பட்டியலில் முன்னேற்றம் : கடந்த 2002 ம் ஆண்டில் நடந்த கான்வெல்த போட்டியில் இந்தியா துப்பாக்கி வீரர்கள் மொத்தம் 24 பதக்கமும், 2006 ல் மெல்போர்னில் நடந்த போட்டியில் 27 பதக்கமும் பெற்றனர். கடந்த பததக்க பட்டியலில் 22 தங்கம், 17 வெள்ளி 11 வெண்கலம் என மொத்தம் 50 பதக்கம் பெற்று பதக்க பட்டியலில் 4 வது இடத்திற்கு முன்னேறியது.

இந்த முறை இந்தியா தற்போது 2 வது இடத்திற்கு முன்னேறியிருக்கிறது. கடந்த காமன்வெல்த் போட்டியில் ஆஸ்திரேலியா 84 தங்கம், , 69 வெள்ளி , 68 வெண்கலம் ‌என மொத்தம் 221 பதக்கம் பெற்று காமன்வெல்த் போட்டியின் சாம்பியனாக திகழ்ந்து வருகிறது

Read More

காமன்வெல்த் போட்டி: பதக்க பட்டியலில் இந்தியா முதலிடம்

காமன்வெல்த் போட்டியில் இந்தியா தனது பதக்க குவிப்பை துவக்கியுள்ளது. தற்போதைய பதக்க பட்டியலில் இந்தியா வெள்ளி, வெண்கலம் என இரண்டு பதக்கங்களை பெற்று முதலிடத்தில் இருக்கிறது. எடை பிரிவு பளுதூக்குதல் வீராங்கனைகள் இந்த பெருமையை இந்தியாவுக்கு தந்துள்ளனர்.

இந்திய நட்சத்திரங்கள் பதக்க வேட்டையை துவக்கி உள்ளனர். இன்று நடந்த 48 கி.கி., எடைப்பிரிவு பளுதூக்குதல் போட்டியில் ஒரு வெள்ளி, ஒரு வெண்கலம் உட்பட இரண்டு பதக்கங்கள் கிடைத்துள்ளது.

டில்லியில், 19வது காமன்வெல்த் விளையாட்டு போட்டி நடக்கிறது. இதில் இன்று பெண்களுக்கான 48 கி.கி., எடைப்பிரிவு பளுதூக்குதல் போட்டி நடந்தது. இந்தியா சார்பில் சோனியா சானு, சந்தியா ராணி தேவி உள்ளிட்ட இரண்டு வீராங்கனைகள் பங்கேற்றனர்.

நைஜீரியாவுக்கு தங்கம் கிடைத்தது: இதில் அபாரமாக செயல்பட்ட நைஜீரியாவின் அகஸ்டினா நிகம் முதலிடம் பிடித்து தங்கம் வென்றார். இந்தியாவின் சோனியா சானு 2வது இடம் பிடித்து வெள்ளி பதக்கம் வென்றார்.

மூன்றாவது இடம் பிடித்த மற்றொரு இந்திய வீராங்கனை சந்தியா ராணி தேவி, வெண்கலப் பதக்கம் பெற்றார். இதன்மூலம் இந்தியாவுக்கு ஒரு வெள்ளி, ஒரு வெண்கலம் உட்பட 2 பதக்கங்கள் கிடைத்துள்ளது.

Read More

தொடர்ந்து 11 அரை சதம்: ரிச்சர்ட்ஸ், காம்பீர் சாதனையை ஷேவாக் சமன் செய்தார்

ஆஸ்திரேலியாவுக்கு எதிரான முதல் டெஸ்டில் ஷேவாக் 59 ரன்கள் எடுத்து ஆட்டம் இழந்தார். இதன் மூலம் அவர் தொடர்ந்து 11-வது முறையாக அரை சதத்துக்கு மேல் எடுத்துள்ளார்.

இதன் மூலம் ஷேவாக் வெஸ்ட் இண்டீஸ் முன்னாள் அதிரடி பேட்ஸ்மேன் விவியன் ரிச்சர்ட்ஸ், இந்திய வீரர் காம்பீர் ஆகியோரது சாதனையை சமன் செய்தார்.

ஷேவாக் கடந்த ஆண்டு நவம்பர் மாதம் இலங்கை எதிரான அகமதாபாத் டெஸ்டில் 2-வது இன்னிங்சில் 51 ரன்கள் எடுத்தார். தொடர்ந்து இலங்கைக்கு எதிரான கான்பூர் டெஸ்டில் 131 ரன்னும், மும்பை டெஸ்டில் 293 ரன்னும் எடுத்தார்.

அதை தொடர்ந்து வங்காள தேசத்துக்கு எதிராக 2 டெஸ்டில் முறையே 52 ரன்னும், 56 ரன்னும், தென் ஆப்பிரிக்காவுக்கு எதிரான டெஸ்டில் 109 ரன்னும், 165 ரன்னும், இலங்கைக்கு எதிராக 109 ரன்னும், 99 ரன்னும், 109 ரன்னும் எடுத்தார்.

Read More

டெஸ்டில் விளையாட விருப்பமில்லை

இனிவரும் காலங்களில், மீண்டும் டெஸ்ட் போட்டியில் விளையாட விருப்பம் இல்லை,'' என, பாகிஸ்தான் ஒருநாள் மற்றும் "டுவென்டி-20' போட்டி கேப்டன் சயீத் அப்ரிதி தெரிவித்துள்ளார்.

சமீபத்தில் இங்கிலாந்து சென்ற பாகிஸ்தான் அணி, ஆஸ்திரேலியாவுக்கு எதிராக 2 போட்டி கொண்ட டெஸ்ட் தொடரில் விளையாடியது. லார்ட்சில் நடந்த முதல் டெஸ்ட் போட்டிக்கு பாகிஸ்தான் அணியின் கேப்டனாக அப்ரிதி இருந்தார். இப்போட்டியில் பாகிஸ்தான் அணி தோல்வி அடைய, டெஸ்ட் போட்டியிலிருந்து ஓய்வை அறிவித்தார் அப்ரிதி.

அதன்பின் சல்மான் பட் தலைமையில் இங்கிலாந்து அணிக்கு எதிராக டெஸ்ட் தொடரில் பங்கேற்ற பாகிஸ்தான் அணி, சூதாட்ட சர்ச்சையில் சிக்கி மோசமான தோல்வி அடைந்தது.

இதுகுறித்து பாகிஸ்தான் அணியின் "ஆல்-ரவுண்டர்' அப்ரிதி கூறியதாவது: டெஸ்டில் இருந்து ஓய்வை அறிவித்த நான், மீண்டும் டெஸ்ட் போட்டியில் விளையாடும் வாய்ப்பு இல்லை. ஏனெனில் இதற்கான தகுதியை இழந்துவிட்டேன்.

முன்னதாக, டெஸ்ட் போட்டியில் விளையாட தொடர்ந்து வாய்ப்பு வழங்கப்படாததே இதற்கு காரணம். தவிர, தற்போது எனது கவனம் முழுவதையும் அடுத்த ஆண்டு நடக்கவுள்ள உலக கோப்பை (50 ஓவர்) தொடர் மீது வைத்துள்ளேன். இதனால் டெஸ்ட் போட்டியில் விளையாடுவதற்கு நேரமிருப்பதாக தெரியவில்லை.

சர்வதேச கிரிக்கெட் போட்டியிலிருந்து ஓய்வு பெறுவதற்கு முன், சிறந்த பாகிஸ்தான் அணியை உருவாக்கிவிட்டு செல்ல வேண்டும் என நினைக்கிறேன். இதே கருத்தை முகமது யூசுப், அப்துல் ரசாக், சோயப் அக்தர் உள்ளிட்ட சீனியர் வீரர்களும் தெரிவித்துள்ளனர். இதற்காக தற்போதிருந்தே இளம் வீரர்களுக்கு வாய்ப்பு அளித்து, சிறந்த அணியை உருவாக்க வேண்டும்.

இங்கிலாந்து தொடரில் பாகிஸ்தான் வீரர் சூதாட்ட புகாரில் சிக்கியது வருத்தம் அளிக்கிறது. டெஸ்ட் தொடரிலிருந்து பாதியில் நாடு திரும்பியதால், அங்கு என்ன நடந்தது என முழுமையாக தெரியவில்லை.

கம்ரான் அக்மல் சிறந்த வீரர். "பார்ம்' இன்றி தவிக்கும் இவருக்கு தற்போது ஓய்வு தேவைப்படுகிறது என நினைக்கிறேன். ஏனெனில் இவர் அடுத்து நடக்கவுள்ள உலக கோப்பை தொடரில் சாதிக்க, சிறிது ஓய்வுக்கு பின் பயிற்சி மேற்கொண்டால் நன்றாக இருக்கும்.

ஆசிய மண்ணில் உலக கோப்பை தொடர் நடக்க இருப்பதால், பாகிஸ்தான் அணிக்கு எவ்வித பிரச்சனையும் இல்லை. முழுதிறமையை வெளிப்படுத்தி கோப்பை வெல்ல போராடுவேன்.

இவ்வாறு அப்ரிதி கூறினார்.

Read More