விளையாட்டு உலகம்

எவ்வளவு அடிச்சாலும் இந்திய அணி தாங்குறாங்க

2012-02-02T08:11:00.000-08:00

ஆஸ்திரேலிய மண்ணில் இந்திய அணியின் தோல்வி தொடர்கிறது. நேற்று நடந்த முதல் "டுவென்டி-20' போட்டியில் 31 ரன்கள் வித்தியாசத்தில் வீழ்ந்தது. இளம் வீரர்களின் வரவும் பலன் அளிக்கவில்லை. மீண்டும் ஒருமுறை வென்ற ஆஸ்திரேலிய அணி, தொடரில் 1-0 என முன்னிலை பெற்றது.

ஆஸ்திரேலியாவுக்கு எதிரான நான்கு டெஸ்ட் போட்டிகளிலும் இந்திய அணி வரிசையாக தோற்றது. அடுத்து இரண்டு "டுவென்டி-20' போட்டிகளில் இரு அணிகளும் மோதுகின்றன. முதல் போட்டி நேற்று சிட்னியில் நடந்தது. "டாஸ்' வென்ற இந்திய கேப்டன் தோனி, "பீல்டிங்' தேர்வு செய்தார்.

வார்னர் அதிரடி:

ஆஸ்திரேலிய அணிக்கு வார்னர், வாடே இணைந்து நல்ல துவக்கம் தந்தனர். இவர்கள், இந்திய பந்துவீச்சை ஒருகை பார்த்தனர். வாணவேடிக்கை காட்டிய வார்னர், அஷ்வின் ஓவரில் 2 சிக்சர், பவுண்டரி விளாசினார். இவர், வினய் குமார் பந்தில் 25 ரன்களுக்கு வெளியேறினார். டிராவிஸ் பிர்ட்(17), அஷ்வின் "சுழலில்' வீழ்ந்தார்.

இன்னொரு "கில்லி':

தனது அதிரடியை தொடர்ந்த விக்கெட் கீப்பர் மாத்யூ வாடே, கில்கிறிஸ்ட்(செல்லமாக கில்லி) இல்லாத குறையை போக்கினார். ரவிந்திர ஜடேஜா ஓவரில் 2 பவுண்டரி, ஒரு சிக்சர் அடித்த வாடே, "டுவென்டி-20' அரங்கில் தனது முதல் அரைசதம் அடித்தார். மறுமுனையில் டேவிட் ஹசியும் ரன் மழை பொழிய, ஸ்கோர் அதிவேகமாக உயர்ந்தது.

மழை பாதிப்பு:

ஆஸ்திரேலியா 131 ரன்கள் எடுத்திருந்த நிலையில், மழை பெய்தது. இதனால் ஆட்டம் 20 நிமிடங்கள் பாதிக்கப்பட்டது. பின் மீண்டும் போட்டி துவங்கியது. வாடே (72), ரெய்னா பந்தில் போல்டானார். டேவிட் ஹசி (42), ராகுல் சர்மாவின் "சுழலில்' சரிந்தார். ஆஸ்திரேலிய அணி 20 ஓவரில் 4 விக்கெட்டுக்கு 171 ரன்கள் எடுத்தது.

விக்கெட் மடமட:

கடின இலக்கை துரத்திய இந்திய அணி, ஆஸ்திரேலியாவின் பந்துவீச்சில் சிதறியது. "டாப்-ஆர்டர்' பேட்ஸ்மேன்கள் மீண்டும் சொதப்பினர். பிரட் லீ வீசிய முதல் ஓவரிலேயே சேவக் (4), காலியானார். காம்பிர்(20), டேவிட் ஹசியின் பந்தில் வீழ்ந்தார். இளம் வீரர்களான கோஹ்லி (22), ரெய்னாவும் (14) கைவிட்டனர். ஹாக் "சுழலில்' ரோகித் சர்மா "டக்' அவுட்டானார். ரவிந்திர ஜடேஜாவும்(7) தாக்குப்பிடிக்கவில்லை.

தோனி போராட்டம்:

பின் கேப்டன் தோனி, அஷ்வின் இணைந்து போராடினர். கிறிஸ்டியன், பிரட் லீ பந்துகளில் சிக்சர் அடித்து ஆறுதல் தந்தார் தோனி. இந்திய அணி 20 ஓவரில் 6 விக்கெட்டுக்கு 140 ரன்கள் மட்டும் எடுத்து தோல்வி அடைந்தது. தோனி (48), அஷ்வின் (15) அவுட்டாகாமல் இருந்தனர்.

ஆட்ட நாயகன் விருதை வாடே தட்டிச்சென்றார்.

இரு அணிகளுக்கு இடையேயான இரண்டாவது "டுவென்டி-20' போட்டி மெல்போர்னில் நாளை நடக்க உள்ளது.

கேப்டன் தகுதி சேவக்கிற்கு உண்டா?

2012-02-01T07:15:00.000-08:00

இந்திய அணியின் கேப்டன் பதவி குறித்து பேச, இது சரியான நேரமல்ல. சேவக்கிற்கு கேப்டனாகும் தகுதியில்லை, என, பாகிஸ்தான் அணியின் முன்னாள் கேப்டன் வாசிம் அக்ரம் தெரிவித்துள்ளார்.

அன்னிய மண்ணில் பங்கேற்ற டெஸ்ட் போட்டிகளில், தொடர்ந்து 8 தோல்வியடைந்ததால், கேப்டன் தோனியை மாற்ற வேண்டும் என, விவாதம் எழுந்துள்ளது. இதுகுறித்து வாசிம் அக்ரம் கூறியது:

அடுத்தடுத்த தோல்விகளால் எல்லாம் தோனியை நீக்குவது குறித்தே பேசுகின்றனர். இதுபற்றி பேச சரியான தருணம் இதுவல்ல. இப்போதும் சரி, எப்போதும் சரி இந்திய அணிக்கு தலைமை தாங்க தோனி தான் சரியான நபர் என்று நம்புகிறேன்.

சமீபகாலமாக அன்னிய மண்ணில் அடைந்த தோல்விகள் காரணமாக, இந்திய கிரிக்கெட் போர்டு (பி.சி.சி.ஐ.,) தோனியை "பலிகடா ஆக்க முயற்சிப்பது அழகல்ல.இந்திய துணைக்கண்டத்தில் இதுதான் பல காலமாக நடக்கிறது. மீடியாவும் இதைத்தான் விரும்புகிறது.

சேவக் வேண்டாம்:

இவருக்குப் பதில் சேவக் அல்லது விராத் கோஹ்லியை கேப்டனாக்க முயற்சிப்பதாக தெரிகிறது. என்னைப் பொறுத்தவரையில் இந்த இருவருக்குமே கேப்டானகும் தகுதியில்லை. அடிலெய்டில் கேப்டனாக, இந்திய அணி பெருமைப்படத்தக்க வகையில் சேவக், ஒன்றும் செய்துவிடவில்லை. இவரிடம் அதிகம் எதிர்பார்த்த எனக்கு ஏமாற்றம் தான் மிஞ்சியது.

கோஹ்லி குழந்தை:

விராத் கோஹ்லியை பொறுத்தவரையில் இன்னும் குழந்தை தான். இப்போது தான் டெஸ்ட் கிரிக்கெட்டில் அடியெடுத்து வைத்துள்ளார். குறைந்தது இன்னும் 5 ஆண்டுகள் இவர் காத்திருக்க வேண்டும். டெஸ்ட் கேப்டனாக தோனி போதுமான அளவு செயல்படவில்லை என்பது உண்மை தான். அதேநேரம், 2 தொடர்களில் தோற்றோம் என்பதற்காக இவரை வெளியேற்ற வேண்டும் என்று அர்த்தமல்ல. அணியை முன்னேற்ற பி.சி.சி.ஐ.,க்கு இந்த வழிதான் உள்ளதா?

பவுலிங் சுமார்:

டெஸ்ட் தொடரைப் போல, பவுலிங் தான் இன்னும் கவலையாக உள்ளது. இஷாந்த் சர்மாவிடம் பெரியளவில் எதிர்பார்த்து, ஏமாற்றம் தான் கிடைத்தது. எல்லோரும் இவருக்கு அதிர்ஷ்டம் இல்லை என்கின்றனர். இதெல்லாம் திறமையற்றவர்கள் சொல்லும் காரணம். 45 டெஸ்டில் பங்கேற்ற பின்பும் எப்படி பொறுப்பாக செயல்படுவது என்பது குறித்து இவர் கற்றுக் கொள்ளவில்லை.

வேகப்பந்து வீச்சாளர் என்பவர் பெர்த், மெல்போர்னில் கூட சிறப்பாக செயல்பட முடியவில்லையே. முதலில் ஆடுகளத்தில் ஒரு பக்கத்தில் மட்டும் எப்படி பவுலிங் செய்வது என்பதை இவர் கற்றுக் கொண்டால் போதும்.

புதிய அணி:

ஆஸ்திரேலியாவில் இந்திய அணி இன்னும் அதிக போட்டிகளில் பங்கேற்க உள்ளது. ரெய்னா, ஜடேஜா, பிரவீண் குமார் அணியில் இணைந்துள்ளனர். "டுவென்டி-20, ஒருநாள் போட்டிகளுக்கு வலுவான இந்திய அணி களமிறங்குகிறது. இன்றைய போட்டியில் புதிய இந்திய அணியை பார்க்கலாம்.

மாற்றம் வேண்டாம்:

மீதமுள்ள போட்டிகளில் சிறப்பாக விளையாட இந்திய வீரர்களுக்கு தன்னம்பிக்கை அதிகம் வேண்டும். வழக்கமான பேட்டிங் ஆர்டரில் எவ்வித மாற்றமும் செய்யும் முயற்சியில் இந்திய அணியினர் ஈடுபடக் கூடாது.

சேவக், காம்பிர் தான் துவக்க வீரர்களாக வரவேண்டும். ஏனெனில், இங்குள்ள சூழல் குறித்து இவர்கள் அதிகம் பழகிவிட்டனர். உலக சாம்பியன் என்பதை மனதில் வைத்துக் கொண்டு, வீரர்கள் செயல்பட்டால் சாதிக்கலாம்.

இவ்வாறு வாசிம் அக்ரம் கூறினார்.

கேப்டன் பதவியில் இருந்து நீக்கப்படுகிறார் தோனி

2012-01-30T07:27:00.000-08:00

டெஸ்ட் போட்டிக்கான கேப்டன் பதவியில் இருந்து தோனி நீக்கப்படுகிறார். இவருக்கு பதிலாக சேவக் புதிய கேப்டனாக நியமிக்கப்படுவார் என தெரிகிறது.

ஆஸ்திரேலியாவுக்கு எதிரான நான்கு டெஸ்ட் போட்டிகளிலும் தோற்ற இந்திய அணி, தொடரை முழுமையாக இழந்தது. இதையடுத்து, அணியில் அதிரடி மாற்றங்களை செய்ய இந்திய கிரிக்கெட் போர்டு(பி.சி.சி.ஐ.,) முடிவு செய்துள்ளது.

முதலில் கேப்டன் மாற்றப்பட உள்ளார். இதன் மூலம் தோனி மற்றும் சேவக் இடையிலான "ஈகோ' பிரச்னைக்கு முடிவு காணலாம். கேப்டன் என்ற முறையில் தன்னால் சேவக்கை கட்டுப்படுத்த இயலவில்லை என தோனி புலம்புகிறார். துவக்க வீரராக பொறுப்பாக "பேட்' செய்யவில்லை என புகார் கூறுகிறார்.

மறுபக்கம் தோனியின் கேப்டன் உத்திகளை ஏற்க மறுக்கிறார் சேவக். வீரர்கள் தேர்வு, "பீல்டிங்' வியூகம் போன்றவற்றில் தோனி தவறு செய்வதாக குறிப்பிடுகிறார். துணை கேப்டன் என்ற முறையில் தன்னிடம் கலந்து ஆலோசிப்பது இல்லை என்றும் குற்றம்சாட்டுகிறார். இவர்களது மோதல், அணியில் பிளவை ஏற்படுத்துகிறது.

இந்நிலையில் டெஸ்ட் போட்டியில் இருந்து 2013ல் ஓய்வு பெறப் போவதாக தோனி தன்னிச்øயாக அறிவித்தது தேர்வாளர்கள் மத்தியில் அதிருப்தியை ஏற்படுத்தியுள்ளது.

இது குறித்து பி.சி.சி.ஐ., நிர்வாகி ஒருவர் கூறுகையில்,""ஆஸ்திரேலியாவுக்கு எதிரான டெஸ்ட் தொடர் நடந்து கொண்டிருக்கும் போது, 2013ல் நடக்க வேண்டிய விஷயம் பற்றி பேச வேண்டிய அவசியமில்லை,''என்றார்.

தோனிக்கு பாடம் புகட்டும் வகையில், அவரை டெஸ்ட் போட்டிக்கான கேப்டன் பதவியில் இருந்து நீக்க, பி.சி.சி.ஐ, முடிவு செய்துள்ளதாக தெரிகிறது. புதிய கேப்டனாக சேவக் நியமிக்கப்படலாம். தவிர, டிராவிட், லட்சுமண் ஆகியோரது சர்வதேச கிரிக்கெட் வாழ்க்கை முடிந்து விட்டதாகவும் தேர்வாளர்கள் கருதுகின்றனர்.

எனவே, ரோகித் சர்மா, சுரேஷ் ரெய்னா, சத்தேஷ்வர் புஜாரா போன்ற இளம் வீரர்களை சேர்க்க முடிவு செய்துள்ளனர். யுவராஜ் உடல்நலம் தேறும்பட்சத்தில் அவருக்கும் டெஸ்டில் வாய்ப்பு தரப்படும்.

கேப்டன் மாற்றம் மட்டும் சாதிக்க உதவாது. ஏனென்றால், தோனிக்கு விதிக்கப்பட்ட தடை காரணமாக அடிலெய்டு டெஸ்டில் கேப்டன் பொறுப்பை ஏற்ற சேவக், அணிக்கு வெற்றி தேடித் தர முடியவில்லை.

வேகப்பந்துவீச்சுக்கு சாதகமான ஆடுகளம் அமைத்தல், இளம் ரத்தம் பாய்ச்சும் வகையில் பாரபட்சமற்ற வீரர்கள் தேர்வு மற்றும் இந்திய கிரிக்கெட்டின் உட்கட்டமைப்பை மேம்படுத்தினால் தான், அன்னிய மண்ணில் வெற்றிக் கொடி நாட்ட முடியும்.

தரம் தாழ்ந்த ஆஸி., வீரர்கள்

2012-01-27T09:10:00.001-08:00

ஆஸ்திரேலிய வீரர்கள் தகாத வார்த்தைகளால் திட்டியதாக இந்தியாவின் விராத் கோஹ்லி குற்றம்சாட்டினார். இது குறித்து கோஹ்லி கூறியது:

களத்தில் இருக்கும் போது ஆஸ்திரேலிய வீரர்கள் தொடர்ந்து வசைபாடுகின்றனர். இதன் மூலம் இந்திய பேட்ஸ்மேன்களின் கவனத்தை சிதறடிக்கின்றனர். நான் 99 ரன்களில் இருந்த போது ரன் அவுட் வாய்ப்பில் இருந்து தப்பினேன்.

அப்போது ஹில்பெனாஸ் மோசமான வார்த்தைகளால் திட்டினார். இதை நாகரிகம் கருதி வெளியில் சொல்ல முடியாது. இதற்கு நானும் பதிலடி கொடுத்தேன். பின் பாண்டிங் தலையிட்டு சமாதானம் செய்து வைத்தார்.

நாங்கள் சர்வதேச கிரிக்கெட் வீரர்கள். போட்டியில் பங்கேற்க தான் ஆஸ்திரேலியா சென்றுள்ளோம்; திட்டு வாங்குவதற்காக அல்ல. ரசிகர்களும் மோசமாக நடந்து கொள்கின்றனர். பதிலுக்கு நான் ஏதாவது செய்தால்(சிட்னி டெஸ்டில் நடுவிரலை காட்டியது) அபராதம் விதிக்கின்றனர்.

முதல் சதம் அடித்த போது, மிகவும் மகிழ்ச்சியாக இருந்தது. இன்று விரைவாக ஆஸ்திரேலிய அணியின் விக்கெட்டை கைப்பற்றும் பட்சத்தில் இந்தியாவுக்கும் வெற்றி வாய்ப்பு உள்ளது.

இவ்வாறு கோஹ்லி கூறினார்.

கவாஸ்கர் எதிர்ப்பு:

இதற்கிடையே கோஹ்லியின் செயலுக்கு முன்னாள் இந்திய கேப்டன் கவாஸ்கர் எதிர்ப்பு தெரிவித்துள்ளார். இவர் கூறுகையில்,""சதம் அடித்ததும் எதிரணி வீரர்களை நோக்கி ஆவேசமாக சைகை செய்தது பள்ளி குழந்தைகளின் செயலை போல் இருந்தது.

சச்சின், டிராவிட் போன்றவர்கள் சதம் அடித்தால், பேட்டை மட்டுமே உயர்த்திக் காட்டுவர். கோஹ்லியின் ஆட்டம் பாராட்டும்படி இருந்தது,என்றார்.

சச்சினுக்கு பாரத ரத்னா "நோ'

2012-01-25T20:08:00.000-08:00

சச்சினுக்கு இந்த ஆண்டு பாரத ரத்னா விருது கிடைக்க வாய்ப்பு இல்லை. இவரது பெயரை பி.சி.சி.ஐ., பரிந்துரை செய்யவில்லை.

நாட்டின் மிக உயர்ந்த பாரத ரத்னா விருது கலை, இலக்கியம் மற்றும் பொது சேவையில் சிறந்து விளங்குபவர்களுக்கு மட்டும் வழங்கப்பட்டு வந்தது. சமீபத்தில், அனைத்து துறைகளிலும் சிறந்த சேவை புரிந்தவர்களுக்கு இவ்விருது வழங்கப்படும் என அறிவிக்கப்பட்டது. இதையடுத்து விளையாட்டு நட்சத்திரங்களும் பாரத ரத்னா விருது பெறும் தகுதியை பெற்றனர்.

இந்திய அணியின் "மாஸ்டர் பேட்ஸ்மேன்' சச்சினுக்கு இவ்விருதை வழங்க வேண்டுமென கோரிக்கை விடுக்கப்பட்டது. அதே நேரத்தில் மறைந்த ஹாக்கி ஜாம்பவான் தியான் சந்த்திற்கு தான் முதலில் கவுரவம் அளிக்க வேண்டும் என, இன்னொரு தரப்பில் வலியுறுத்தப்பட்டது.

இந்நிலையில் பாரத ரத்னா விருதுக்கு சச்சின் பெயரை இந்திய கிரிக்கெட் போர்டு(பி.சி.சி.ஐ.,) பரிந்துரை செய்யவில்லை. தியான் சந்த், ஒலிம்பிக் துப்பாக்கி சுடுதலில் தங்கம் வென்ற அபினவ் பிந்த்ரா, எவரெஸ்ட் சிகரத்தில் ஏறி சாதனை படைத்த மறைந்த டென்சிங் நார்கே ஆகியோரது பெயரை மட்டும் இவ்விருதுக்கு மத்திய விளையாட்டு அமைச்சகம் பரிந்துரை செய்துள்ளது.

இது குறித்து பி.சி.சி.ஐ., துணை தலைவர் ராஜிவ் சுக்லா கூறுகையில்,""தனிப்பட்ட வீரர்கள் தான் விருதுக்கு விண்ணப்பிக்க வேண்டும். பின் அரசு அமைத்த குழு இறுதி முடிவு எடுக்கும்.

பத்ம ஸ்ரீ போன்ற விருதுகளை சச்சின் வாங்கிய போது, பி.சி.சி.ஐ., அவரது பெயரை பரிந்துரை செய்யவில்லை,''என்றார்.

இதற்கிடையே பாரத ரத்னா விருதுக்கு இம்முறை யாரையும் தேர்வு செய்யப் போவதில்லை என முடிவு செய்திருப்பதாக பிரதமர் அலுவலக வட்டாரங்கள் தெரிவித்தன.

இதனால், இம்முறையும் விளையாட்டு நட்சத்திரங்கள் ஏமாற்றம் அடைந்துள்ளனர்

ரேங்கிங் - இந்தியா மீண்டும் நம்பர்-2

2012-01-24T08:04:00.000-08:00

ஐ.சி.சி., ஒருநாள் போட்டிக்கான ரேங்கிங்கில், இந்திய அணி மீண்டும் "நம்பர்-2' இடத்துக்கு முன்னேறியது.

சர்வதேச ஒருநாள் போட்டியில் சிறந்து விளங்கும் அணிகளுக்கான ரேங்கிங் (தரவரிசை) பட்டியலை, சர்வதேச கிரிக்கெட் கவுன்சில் (ஐ.சி.சி.,) துபாயில் நேற்று வெளியிட்டது. இதில் இந்திய அணி 117 புள்ளிகளுடன் மீண்டும் இரண்டாவது இடம் பிடித்தது.

இரண்டாவது இடத்தில் இருந்த தென் ஆப்ரிக்க அணி 116 புள்ளிகளுடன் மூன்றாவது இடத்துக்கு தள்ளப்பட்டது.

இலங்கைக்கு எதிரான ஒருநாள் தொடரை தென் ஆப்ரிக்க அணி 3-2 என கைப்பற்றிய போதும், கடைசி இரண்டு போட்டியில் தோல்வி அடைந்ததால், பின்னடைவை சந்திக்க வேண்டியதாயிற்று.

ஆஸ்திரேலிய அணி 130 புள்ளிகளுடன் முதலிடத்தில் நீடிக்கிறது. இலங்கை அணி 111 புள்ளிகளுடன் நான்காவது இடத்தில் உள்ளது.

கோஹ்லி "நம்பர்-3':

ஒருநாள் போட்டி பேட்ஸ்மேன்களுக்கான ரேங்கிங்கில், இந்தியாவின் விராத் கோஹ்லி 3வது, கேப்டன் தோனி 5வது இடத்தில் நீடிக்கின்றனர்.

தென் ஆப்ரிக்காவின் ஆம்லா, டிவிலியர்ஸ் முதலிரண்டு இடத்தை தக்கவைத்துக் கொண்டனர். இலங்கைக்கு எதிரான கடைசி போட்டியில் சதம் அடித்த தென் ஆப்ரிக்காவின் ஸ்மித், 17வது இடத்துக்கு முன்னேறினார்.

இந்தியா ஏமாற்றம்:

பவுலர்களுக்கான ரேங்கிங்கில், "டாப்-10' வரிசையில் இந்திய வீரர்கள் யாரும் இல்லை. இந்தியாவின் ரவிந்திர ஜடேஜா (13வது இடம்), அஷ்வின் (19வது) "டாப்-20' வரிசையில் உள்ளனர்.

இலங்கைக்கு எதிராக வேகத்தில் அசத்திய தென் ஆப்ரிக்காவின் டசாட்சொபே, பத்து இடங்கள் முன்னேறி 3வது இடம் பிடித்தார். இலங்கையின் மலிங்கா, பத்தாவது இடத்துக்கு முன்னேறினார். பாகிஸ்தானின் சயீத் அஜ்மல், முகமது ஹபீஸ் முதலிரண்டு இடத்தில் உள்ளனர்.

கிரிக்கெட் "கடவுள்' சச்சின் - சொல்கிறார் ஹசி

2012-01-23T08:06:00.000-08:00

தற்போதைய தொடரில் சிறப்பான ஆட்டத்தை வெளிப்படுத்தி வரும் கிரிக்கெட் "கடவுள்' சச்சின், 100வது சதம் அடிப்பது தவிர்க்க முடியாதது,'' என்கிறார் ஆஸ்திரேலிய வீரர் மைக் ஹசி.

கடந்த 10 டெஸ்ட் போட்டிகளின், 19 இன்னிங்ஸ்களாக இந்திய பேட்டிங் மாஸ்டர் சச்சின் தனது, 100வது சதத்தை அடிக்க முடியாமல் திணறி வருகிறார். இதுகுறித்து மைக் ஹசி கூறியது:

சச்சின் தொடர்ந்து சிறப்பான ஆட்டத்தை வெளிப்படுத்துகிறார். சரியான "புட் வொர்க்கில்', பந்தை நோக்கி பேட்டினை கொண்டு செல்லும் திறன் ஆகியவற்றை, அருகில் இருந்து பார்க்கும் போது வியப்பாக இருக்கும்.

நன்றாக பேட்டிங் செய்ய வேண்டும் என்று அவரது மனது நினைப்பதற்கு ஏற்பட, பேட்டும் நன்கு ஒத்துழைக்கிறது.

மற்றபடி, பல நேரங்களில் நன்கு விளையாடினாலும், ஏதாவது ஒரு பந்தில், ஒரு தவறு செய்து விட்டால், அப்புறம் பெவிலியன் திரும்ப வேண்டியது தான். தனது 100வது சதத்தை, இவர் இன்னும் அடிக்கவில்லை என்றாலும், கிரிக்கெட்டின் "கடவுள்' சச்சின் தான்.

கிரிக்கெட் ரசிகர்கள் நிறைந்த இந்தியாவில், இவர் தெருவில் இறங்கி நடந்து சென்றால், பல ஆயிரக்கணக்கில் மக்கள் கூடுவர்.

இவை அனைத்தையும் ஒதுக்கி வைத்துவிட்டு, பல்வேறு வகையான நெருக்கடிகளை சமாளித்து, தனது கிரிக்கெட் வாழ்க்கை முழுவதும், தொடர்ந்து சிறப்பான முறையில் ரன்கள் குவித்து, 20 ஆண்டுகளுக்கும் மேலாக, சர்வதேச கிரிக்கெட்டில் ஜொலித்து வருவது வியப்பாக உள்ளது.

இவர், மனதளவில் மிகவும் வலிமையானவர். சச்சின் தொடர்ந்து சிறப்பான பேட்டிங்கை வெளிப்படுத்தும் பட்சத்தில், 100வது சதம் தவிர்க்க முடியாதது ஆகும். ஆனால், இது வேறு தொடரில் நடக்கட்டும். இந்த டெஸ்டில் வேண்டாம்.

இவ்வாறு மைக் ஹசி கூறினார்.

புனே வாரியர்ஸ் அணியில் கங்குலிக்கு புது வேலை

2012-01-22T08:18:00.001-08:00

இந்திய அணியின் முன்னாள் கேப்டன் கங்குலி. நீண்ட இழுபறிக்குப் பின், ஆஷிஸ் நெஹ்ராவுக்குப் பதில், இவரை கடந்த ஆண்டு புனே வாரியர்ஸ் அணி வாங்கியது.

இதனிடையே புனே அணியின் பயிற்சியாளராக இருந்த ஜெப் மார்ஷ், இலங்கை அணிக்கு சென்று விட்டார்.

இதனால், வரும் ஐந்தாவது சீசனில் கங்குலி வீரராக மட்டுமன்றி, அணியின் ஆலோசகராவும் செயல்பட ஒப்பந்தம் செய்யப்பட்டுள்ளார்.

அணியின் பவுலிங் பயிற்சியாளராக தென் ஆப்ரிக்க அணியின் முன்னாள் வேகப்பந்து வீச்சாளர் ஆலன் டொனால்டு நியமிக்கப்பட்டார்.

பேட்டிங் பயிற்சியாளராக இந்திய அணியின் முன்னாள் வீரர் பிரவீண் ஆம்ரேவும், மனநல பயிற்சிக்கு பட்டி ஆப்டனும் தேர்வு செய்யப்பட்டனர்.

அடிலெய்டில் சேவக் அடிப்பாரா? அடிபடுவாரா?

2012-01-21T20:09:00.000-08:00

அன்னிய மண்ணில் சேவக்கின் மோசமான ஆட்டம் தொடர்கிறது. கடந்த 21 இன்னிங்சில் இரு முறை மட்டுமே அரைசதம் அடித்துள்ள இவர், அடிலெய்டு டெஸ்டில் மானம் காப்பாரா என்ற எதிர்பார்ப்பு ஏற்பட்டுள்ளது.

சமீபகாலமாக அன்னிய மண்ணில் இந்திய டெஸ்ட் அணியின் துவக்கம் மோசமாக உள்ளது. இதனால் பின் வரிசை வீரர்கள் நெருக்கடிக்கு ஆளாகி, எளிதில் அவுட்டாக, தொடர் தோல்வியை அணி சந்திக்கிறது.

இதில் அதிரடி வீரர் சேவக், நான்கு ஆண்டுகளாக மோசமான ஆட்டத்தை வெளிப்படுத்தி வருகிறார். நியூசிலாந்து, தென் ஆப்ரிக்கா, இங்கிலாந்து மற்றும் ஆஸ்திரேலிய தொடரில், இவரது சராசரி ஒருமுறை கூட 30 ரன்களை தொடவில்லை.

இத்தனைக்கும் இங்கிலாந்து மற்றும் தற்போதைய தொடரை தவிர, மற்ற மூன்று தொடர்களில் நல்ல பார்மில் தான் இருந்தார். இருந்தும் அவர் ரன் சேர்க்காதது வியப்பை தருகிறது.

ஹர்பஜனுக்கு மோசம்:

இந்த போட்டிகளின் 21 இன்னிங்சில், சேவக் எடுத்த ரன்கள் 500ஐ எட்டவில்லை. இரு முறை மட்டும் தான் அரைசதம் அடித்தார். இது அன்னிய மண்ணில் ஹர்பஜன் சிங் எடுத்த ரன்களை விட மோசமான சராசரி. இதில் 16 முறை வேகப்பந்து வீச்சாளர்களிடம் ஒரே மாதிரியாக அவுட்டாகினார்.

அதாவது சரியான அளவில், பந்தை லேசாக"சுவிங்' செய்து வீசினால், விக்கெட் கீப்பர் அல்லது "சிலிப்' பகுதியில் "கேட்ச்' கொடுத்து விடுகிறார்.

நெருக்கடி தருமா:

தற்போது அணியின் கேப்டனாக வேறு பொறுப்பேற்றுள்ளார். இதற்கு முன் மூன்று முறை டெஸ்ட் அணிக்கு கேப்டனாக இருந்த போட்டிகளில், ஒன்றில் கூட தோற்றதில்லை. இப்போட்டிகளில் 173 ரன்கள் தான் எடுத்தார். இதன் சராசரி 28.33 ஆகும். பொதுவாக கேப்டன் பணி இவரது பேட்டிங்கிற்கு கைகொடுக்கப் போவதில்லை. மாறாக நெருக்கடி தான் தரும்.

நிலைக்க வேண்டும்:

2008ல் அடிலெய்டு டெஸ்டில் சேவக் முதல் இன்னிங்சில் 63, இரண்டாவது இன்னிங்சில் 151 ரன்கள் எடுத்தார். இதனால் இம்முறையும் இந்திய அணியின் தொடர் தோல்விக்கு முற்றுப்புள்ளி வைத்து மானம் காக்க உதவுவார் என்று நம்பப்படுகிறது. இந்த டெஸ்டில் முதல் இரண்டு மணி நேரம் களத்தில் இருந்து விட்டால், அணியின் ஸ்கோர் 300 அல்லது அதற்கு மேல் செல்வது உறுதி.

ஒருவேளை மீண்டும் ஒற்றை இலக்க ரன்களில் அவுட்டானால், கடந்த 26 மாதங்களில் பங்கேற்ற 25 டெஸ்டில், இதுவரை இல்லாத அளவுக்கு, இவரது சராசரி 50க்கும் கீழாக சென்றுவிடும்.

அவமானமா இருக்கே - கபில்தேவ் கவலை

2012-01-20T22:12:00.000-08:00

ஆஸ்திரேலியாவில் இந்திய அணியின் மோசமான செயல்பாடு, ஒரு கிரிக்கெட் வீரரான எனக்கு அவமானமாக உள்ளது,'' என, இந்திய அணியின் முன்னாள் கேப்டன் கபில்தேவ் தெரிவித்துள்ளார்.

ஆஸ்திரேலியா சென்றுள்ள இந்திய அணி நான்கு போட்டிகள் கொண்ட டெஸ்ட் தொடரை இழந்தது. இது குறித்து கபில்தேவ் கூறியது:

ஆறு மாதத்திற்கு முன்பு "நம்பர்-1' அணியாக இருந்த போது, அணியில் இடம் பெற்றிருந்த அதே வீரர்கள் தான் தற்போதும் உள்ளனர்.

ஆஸ்திரேலியாவில் இவர்களது மோசமான ஆட்டம், ஒரு கிரிக்கெட் வீரராக என்னை அவமானம் அடையச் செய்கிறது. மூன்று போட்டியிலும் பேட்டிங், பவுலிங், பீல்டிங் என எதிலுமே சரியாக செயல்படவில்லை.

டெஸ்ட் போட்டி என்பது ஐந்து நாட்கள் நடக்கக்கூடியது. இதிலும் நம்முடைய வீரர்கள் ஏமாற்றத்தான் செய்தனர். உணர்ச்சி வசப்பட்டு பேசிக் கொண்டிருப்பதற்கு இது நேரமில்லை. நமது அணி சரிவை நோக்கி செல்கிறது. அதிலிருந்து மீள வேண்டும்.

வீரர்கள், தன்னம்பிக்கை கொள்ள வேண்டும். குழுவாக இணைந்து செயல்பட முயற்சிக்க வேண்டும். அவர்களின் அனைத்து முயற்சிக்கும் ஆதரவு தர தயாராக உள்ளோம்.

இவ்வாறு கபில்தேவ் கூறினார்.

திராட்சை தோட்டத்தில் தோனி

2012-01-20T09:07:00.000-08:00

ஆஸ்திரேலிய மண்ணில் சந்தித்த டெஸ்ட் தொடர் தோல்வியை எண்ணி தோனி கவலைப்பட்டதாக தெரியவில்லை. அடிலெய்டில் உள்ள திராட்சை தோட்டத்தில், மனைவி சாக்ஷியுடன் உலா வந்து உற்சாகமாக பொழுதை கழித்தார்.

ஆஸ்திரேலியாவுக்கு எதிரான 3 டெஸ்ட் போட்டிகளில் தோல்வி அடைந்த இந்திய அணி, தொடரை இழந்தது. இதில், பெர்த்தில் நடந்த மூன்றாவது டெஸ்டில் தாமதமாக பந்துவீசிய பிரச்னையில் சிக்கிய, தோனிக்கு ஒரு போட்டியில் பங்கேற்க தடை விதிக்கப்பட்டது.

வரும் 24ம் தேதி துவங்கும் நான்காவது போட்டிக்கு சேவக், கேப்டனாக செயல்பட உள்ளார். இப்போட்டியில் பங்கேற்பதற்காக இந்திய வீரர்கள் அடிலெய்டு வந்தனர்.

தோனியை பொறுத்தவரை, தடை காரணமாக நிறைய நாட்கள் ஓய்வு கிடைத்துள்ளது. நேற்று அடிலெய்டில் உள்ள திராட்சை தோட்டத்துக்கு மனைவி சாக்ஷியுடன் சென்று சுற்றிப் பார்த்திருக்கிறார்.

இங்குள்ள மலைகளில் 50க்கும் மேற்பட்ட திராட்சை தோட்டங்கள் உள்ளன. இதில் இருந்து தயாரிக்கப்படும் "ஒயின்' மிகவும் பிரபலம். கடந்த 1844ல் விக்டோரியா மகாராணிக்கே அடிலெய்டில் இருந்து தான் "ஒயின்' அனுப்பப்பட்டதாம்.

தொடர் தோல்வியை அடுத்து, இந்திய வீரர்கள் ஆஸ்திரேலியாவுக்கு "ஹனிமூன்' சென்றார்களா...சுற்றுலா சென்றார்களா என்று விமர்சித்து வருகின்றனர்.

இந்நிலையில் திராட்சை தோட்டத்தில் தோனி, உலா வந்தது புதிய பிரச்னைக்கு வழிவகுத்துள்ளது.

இதற்கிடையே, திராட்சை தோட்டத்துக்கு வீரர்கள் யாரும் செல்லவில்லை என, இந்திய அணியின் "மீடியா' மானேஜர் ஜி.எஸ். வாலியா தெரிவித்துள்ளார்.

இந்திய அணியின் தோல்விக்கு ஐ.பி.எல்., காரணமா?

2012-01-18T08:06:00.000-08:00

ஆஸ்திரேலியாவுக்கு எதிரான டெஸ்ட் தொடரை இந்திய அணி இழந்ததற்கு, ஐ.பி.எல்., போட்டிகள் தான் காரணம் என குற்றம்சாட்டப்பட்டுள்ளது.

ஆஸ்திரேலியாவுக்கு எதிரான முதல் 3 டெஸ்டில் படுதோல்வி அடைந்த இந்திய அணி, தொடரை இழந்தது. இதற்கு பணம் கொழிக்கும் ஐ.பி.எல்., "டுவென்டி-20' போட்டிகளில் அதிகளவு பங்கேற்றதே காரணம் என கூறப்படுகிறது.

இது குறித்த தங்களது கருத்துக்களை இந்திய அணியின் முன்னாள் வீரர்கள் பகிர்ந்து கொள்கின்றனர்,

வெங்சர்க்கார்:

இந்திய வீரர்களின் மோசமான ஆட்டத்துக்கு ஐ.பி.எல்., மட்டும் காரணமல்ல. இங்கிலாந்து, ஆஸ்திரேலியா டெஸ்ட் தொடர் துவங்குவதற்கு முன், தேவையான அளவு போட்டிகளில் பங்கேற்கவில்லை. இதுவே தோல்விக்கு வழி வகுத்தது. அன்னிய மண்ணில் விளையாடச் செல்லும் முன், முறையான பயிற்சி மேற்கொண்டிருக்க வேண்டும்.

சந்து போர்டே:

ஐ.பி.எல்., போட்டியை மட்டும் நாம் பழிக்க கூடாது. இந்திய பேட்ஸ்மேன்கள் தவறுகளில் இருந்து பாடம் கற்றுக் கொள்வதில்லை. ஒரு சில அனுபவ வீரர்கள் போட்டி துவங்குவதற்கு 10 நாட்களுக்கு முன்பாக ஆஸ்திரேலியா சென்றுவிட்டனர். இருந்தபோதும், ஏன் சோபிக்க தவறினர் என்று தெரியவில்லை.

பாபு நட்கர்னி:

இந்திய அணியின், அனுபவ வீரர்கள் வெவ்வேறு சூழ்நிலைக்கு ஏற்ப விரைவில் மாறும் தன்மை இல்லாமல் உள்ளனர். இது தோல்விக்கு முக்கிய காரணம். ஒருவேளை வீரர்கள் ஐ.பி.எல்., போட்டியில் விளையாடுவதால் டெஸ்டில் விளையாட முடியவில்லை என்று உணர்ந்தால், ஏதாவது ஒன்றில் பங்கேற்றுவிட்டு, ஒன்றை புறக்கணித்து விட வேண்டியது தான்.

ஆகாஷ் சோப்ரா:

இளம் வீரர்கள் டெஸ்டில் பின்னடைவை சந்திப்பதற்கு ஐ.பி.எல்., மட்டும் காரணம் கிடையாது. இக்கட்டான சமயங்களில் பொறுமையாக செயல்படும் குணம் வீரர்களிடம் இல்லை. தோல்விக்கான காரணத்தை இப்போதே கண்டறிந்து, சரியான தீர்வு காண வேண்டும்.

கவாஸ்கர்:

டெஸ்ட், ஐ.பி.எல்., போட்டிகளில் வீரர்களின் பேட்டிங் "ஸ்டைல்' மட்டுமே மாறுபடும். ஆஸ்திரேலியாவின் டேவிட் வார்னர் ஐ.பி.எல்., போட்டியில் விளையாடியவர் தான். இவரால் மட்டும் எப்படி சாதிக்க முடிகிறது. எனவே இக்கருத்து முற்றிலும் தவறானது.

பிஷன்சிங் பேடி:

இந்திய அணியின் தொடர் தோல்விக்கு ஐ.பி.எல்., தான் முதன்மை காரணம். தவிர, கிரிக்கெட்டிற்கு ஒரு கொள்கை உண்டு. ஐ.பி.எல்., போட்டிக்கு எந்த விதமான கொள்கையும் இல்லை. இதில், பணம் மட்டுமே முக்கிய குறிக்கோள்.

மனோஜ் பிரபாகர்:

தற்போதுள்ள, இளம் வீரர்கள் பணம் கொழிக்கும் ஐ.பி.எல்., போட்டிகளில் விளையாடுவதிலேயே ஆர்வம் காட்டுகின்றனர். இதே அளவு ஆர்வத்தினை ரஞ்சி கோப்பை போன்ற உள்ளூர் தொடர்களில் காட்டுவதில்லை. நீண்ட நாட்கள் கஷ்டப்பட்டு சம்பாதிக்க வேண்டிய பணத்தை, ஒரு மாதத்தில் ஐ.பி.எல்., போட்டியில் பெற்று விடுகின்றனர்.

கட்டாயம் இல்லை

ஐ.பி.எல்., தலைவர் ராஜிவ் சுக்லா கூறுகையில்,""ஐ.பி.எல்., தொடரில் ஆஸ்திரேலியாவின் டேவிட் வார்னர், ஷேன் வாட்சன் இடம் பெற்றுள்ளனர். இவர்களால் மட்டும் எப்படி சிறப்பான ஆட்டத்தை மற்ற போட்டிகளிலும் வெளிப்படுத்த முடிகிறது.

தவிர, ஐ.பி.எல்., தொடர் மே மாதமே முடிந்தது விட்டது. இதன் பின் நிறைய போட்டிகளில் இந்திய அணி பங்கேற்றுவிட்டது. மேலும் வீரர்களை யாரும் கண்டிப்பாக போட்டிகளில் பங்கேற்க வேண்டும் என்று கட்டாயப்படுத்தவில்லை,''என்றார்.

உதவாக்கரை இந்திய அணி

2012-01-17T07:58:00.000-08:00

டெஸ்ட் தொடரில் சொதப்பிய இந்திய அணியை, ஆஸ்திரேலிய பத்திரிகைகள் கடுமையாக சாடியுள்ளன. ரன் எடுக்க திணறிய பேட்ஸ்மேன்களை, உதவாக்கரை என படுமோசமாக விமர்சித்துள்ளன.

ஆஸ்திரேலியா சென்றுள்ள இந்திய அணி முதல் கட்டமாக நான்கு போட்டிகள் கொண்ட டெஸ்ட் தொடரில் பங்கேற்கிறது. வரிசையாக முதல் மூன்று டெஸ்டில் வீழ்ந்த இந்திய அணி, தொடரை 3-0 என இழந்தது.

இத்தொடரில் இந்திய பேட்ஸ்மேன்களின் செயல்பாடு படுமோசமாக இருந்தது. ஒருவர் கூட சதம் அடிக்கவில்லை. இது குறித்து ஆஸ்திரேலிய பத்திரிகைகள் வெளியிட்டுள்ள விமர்சன செய்திகள்:

"தி ஆஸ்திரேலியன்':

எட்டு மாதங்களுக்கு முன் நம்பர்-1 அணியாக இருந்த இந்திய அணியின் நிலைமை பரிதாபமாக உள்ளது. பலமாக கருதப்பட்ட "பேட்டிங்' தூண்கள், உடைந்து போன பயனற்ற கற்களாக காட்சி அளித்தனர். இவர்களது உதவாக்கரை ஆட்டம் அணிக்கு கைகொடுக்கவில்லை. முன்பு ஆஸ்திரேலிய பவுலர்களை பயமுறுத்தக்கூடியவராக இருந்த லட்சுமண், இம்முறை 2, 1, 2, 66, 31,0 என மோசமான ஸ்கோர் எடுக்க, உள்ளூரிலேயே அதிக விமர்சனங்களை சந்திக்கிறார்.

ஒருநாள் போட்டிகளில் அதிவேக இரட்டை சதம் அடித்த கையோடு இத்தொடரில் பங்கேற்றார் சேவக். மெல்போர்னில் சூறாவளியாக 67 ரன்கள் எடுத்த இவர், பின் 7, 30, 4, 0, 10 என மட்டமான ஸ்கோரில் வெளியேறினார். தோனியும் பேட்டிங்கில் கோட்டை விட்டார்.

6, 23, 57, 2, 12, 2 என குறைவான ஸ்கோர் எடுத்தார். இவரே மோசமாக விளையாடியதால், மற்ற பேட்ஸ்மேன்களிடம் அதிகம் எதிர்பார்க்க முடியவில்லை. கடந்த 3 டெஸ்டில் இந்தியா சார்பில் ஒருவர் கூட சதம் அடிக்கவில்லை.

பாராட்டு இல்லை:

பெர்த் டெஸ்டின் இரண்டாவது இன்னிங்சில் டிராவிட்டை, ஹாரிஸ் போல்டாக்கினார். உடனே அவர் பின் மிக நீண்ட தூரம் ஓடிச் சென்று, முதுகில் தட்டிக் கொடுத்து பாராட்டினார் கேப்டன் மைக்கேல் கிளார்க். அதே நேரத்தில் உமேஷ் யாதவ் 5வது விக்கெட்டை பெற்ற போது, அவருக்கு கேப்டன் தோனி உள்ளிட்ட சக இந்திய வீரர்கள் பாராட்டு தெரிவிக்கவில்லை.

"தி டெய்லி டெலிகிராப்':

பத்திரிகையாளர் சந்திப்பில் மைக்கேல் கிளார்க்கிடம் கேட்ட முதல் கேள்வியே,"வங்கதேசத்திடம் விளையாடுவதை போல் உணர்ந்தீர்களா?' என்பது தான். இதுவே இந்திய அணியின் மோசமான ஆட்டத்துக்கு நல்ல உதாரணம். தாமதமாக பந்துவீசிய விவகாரத்தில் சிக்கிய இந்திய கேப்டன் தோனி, அடிலெய்டு டெஸ்டில் பங்கேற்க முடியாது.

இது ஏற்கனவே தவிக்கும் இந்திய அணிக்கு கூடுதல் சிக்கலை ஏற்படுத்தியுள்ளது. "பார்ம்' இல்லாத சேவக், கேப்டன் பதவியை ஏற்க <உள்ளார். இவரது சராசரி இம்முறை 19 ரன்கள் தான். தனது சொந்த பிரச்னைகளை சமாளிக்க முடியாமல் தவிக்கும் சேவக், சிதறிப் போன இந்திய அணியை எப்படி மீட்க போகிறார் என்பதை நினைத்துக் கூட பார்க்க முடியவில்லை.

இத்தொடரின் புள்ளிவிவரங்களை பார்த்தால், ஆஸ்திரேலியாவின் ஆதிக்கம் புரியும். ஆஸ்திரேலிய அணி ஒவ்வொரு விக்கெட்டுக்கும் சராசரியாக 47.08 ரன்கள் எடுத்துள்ளது. இந்திய அணி 22.9 ரன்கள் தான் எடுத்திருக்கிறது. ஆஸ்திரேலிய அணியில் நான்கு பேர் 134 ரன்களுக்கு மேல் எடுத்துள்ளனர். இந்திய அணி வீரர் ஒருவர் எடுத்த அதிகபட்ச ஸ்கோரே 83 ரன்கள் தான். ஆஸ்திரேலிய "வேகங்கள்' 57 விக்கெட் கைப்பற்றியுள்ளனர்.

"ஹெரால்டு சன்':

ஆஸ்திரேலிய அணி பயிற்சி உள்ளிட்ட ஒவ்வொரு விஷயத்திலும் கூடுதல் அக்கறை செலுத்தியது. கோடிகளில் புரளும் இந்திய வீரர்களோ, பயிற்சிக்கு பதிலாக பெரும்பாலான நேரம் மரங்களின் நிழலில் ஓய்வு எடுத்தனர். இதன் பலனை போட்டிகளில் அனுபவித்தனர்.

"சிட்னிங் மார்னிங் ஹெரால்டு':

ஆஷஸ் தொடரில் ஆஸ்திரேலிய அணி, இங்கிலாந்திடம் படுதோல்வி அடைந்தது. அப்போது, இதே போன்றதொரு "அடி'யை இந்திய அணிக்கு கொடுக்க வேண்டும் என்று சக வீரர்களுக்கு ஆஸ்திரேலிய கேப்டன் மைக்கேல் கிளார்க் கட்டளையிட்டார்.

இதற்கேற்ப விக்கெட் பசியோடு காணப்பட்ட "வேகப்புயல்கள்' இந்திய அணியை சிதறடித்தனர். மொத்தத்தில் ஆஸ்திரேலிய அணிக்கு புத்துயிர் கொடுத்துள்ளார் கிளார்க்.

முத்தரப்பு தொடரில் சச்சின் - இந்திய அணி அறிவிப்பு

2012-01-16T06:17:00.000-08:00

முத்தரப்பு தொடருக்கான இந்திய அணியில் சச்சின் இடம் பெற்றார். மிக நீண்ட இடைவெளிக்கு பின் ஒருநாள் போட்டிகளில் பங்கேற்க இருக்கிறார்.

தற்போதைய டெஸ்ட் தொடர் முடிந்தவுடன், இந்தியா, ஆஸ்திரேலிய அணிகள் இரண்டு "டுவென்டி-20' போட்டிகளில்(பிப்., 1, பிப்., 3) விளையாட உள்ளன. பின் இந்தியா, ஆஸ்திரேலியா, இலங்கை அணிகள் பங்கேற்கும் முத்தரப்பு ஒருநாள் தொடர்(பிப்., 5- மார்ச் 8) நடக்க உள்ளது.

இதற்கான இந்திய அணி நேற்று அறிவிக்கப்பட்டது. இதில், சச்சின் பெயரும் இடம் பெற்றுள்ளது. "டுவென்டி-20' போட்டியில் இருந்து ஏற்கனவே விலகி விட்ட இவர், முத்தரப்பு தொடரில் விளையாட உள்ளார்.

கடந்த ஏப்., 2ல் நடந்த உலக கோப்பை பைனலுக்கு பின், மீண்டும் ஒருநாள் போட்டிகளில் களமிறங்க உள்ளார். தனது 100வது சர்வதேச சதத்தை முத்தரப்பு தொடரில் அடிப்பார் என எதிர்பார்க்கப்படுகிறது.

யுவராஜ் "நோ':

காயத்தில் இருந்து மீண்ட பிரவீண் குமார், இர்பான் பதான், "ஸ்பின்னர்' ராகுல் சர்மா, மனோஜ் திவாரி, பார்த்திவ் படேல் வாய்ப்பு பெற்றுள்ளனர். தற்போதைய டெஸ்ட் தொடரில் இடம் பெற்றுள்ள இஷாந்த் சர்மா, விரிதிமான் சகா நீக்கப்படுகின்றனர்.

காயத்தில் இருந்து மீளாத யுவராஜ், ஹர்பஜன் சிங், வருண் ஆரோன், முனாப் படேல் இடம்பெறவில்லை.

"டுவென்டி-20' மற்றும் முத்தரப்பு தொடருக்கான 17 பேர் கொண்ட இந்திய அணி வருமாறு:

தோனி(கேப்டன்), சேவக்(துணை கேப்டன்), சச்சின், காம்பிர், விராத் கோஹ்லி, ரோகித் சர்மா, சுரேஷ் ரெய்னா, ரவிந்திர ஜடேஜா, அஷ்வின், உமேஷ் யாதவ், பிரவீண் குமார், வினய் குமார், மனோஜ் திவாரி, ராகுல் சர்மா, பார்த்திவ் படேல், இர்பான் பதான், ஜாகிர் கான்.

தோனிக்கு தடை: சேவக் புதிய கேப்டன்

2012-01-15T20:51:00.000-08:00

இந்திய அணிக்கு சோதனை மேல் சோதனை. தாமதமாக பந்துவீசிய விவகாரத்தில், தோனிக்கு ஒரு டெஸ்ட் போட்டிக்கு தடை விதிக்கப்பட்டது. நான்காவது டெஸ்டுக்கு கேப்டன் பொறுப்பை சேவக் ஏற்கிறார்.

பெர்த்தில் நடந்த மூன்றாவது டெஸ்டில் இந்திய அணி தோல்வி அடைந்தது. இப்போட்டியில் சுழற்பந்துவீச்சாளர் இல்லாமல் நான்கு "வேகங்களுடன்' இந்தியா களமிறங்கியது. இதனால் குறிப்பிட்ட நேரத்தில், 2 ஓவர்கள் தாமதமாக பந்துவீச நேர்ந்தது. இது சர்வதேச கிரிக்கெட் கவுன்சில்(ஐ.சி.சி.,) விதிமுறைப்படி தவறு.

இத்தகைய தவறை ஒரு ஆண்டில் மூன்று முறை செய்யலாம். சமீபத்தில் தான் இரண்டாக குறைக்கப்பட்டது. கடந்த ஆண்டு ஜூலையில் நடந்த வெஸ்ட் இண்டீசுக்கு எதிரான பார்படாஸ் டெஸ்டில் தாமதமாக பந்துவீசிய பிரச்னையில் தோனி சிக்கினார்.

தற்போது இரண்டாவது முறையாக சிக்கியதால், இவர் மீது அம்பயர்கள் அலீம் தர், தர்மசேனா புகார் செய்தனர். இதனை விசாரித்த ஐ.சி.சி., "மேட்ச் ரெப்ரி' ரஞ்சன் மடுகுலே, தோனிக்கு ஒரு போட்டி தடை மற்றும் அபராதம் விதித்தார். சக வீரர்கள் அபராதத்துடன் தப்பினர். தனது தவறை ஒத்துக் கொண்ட தோனி, தண்டனையை ஏற்றுக் கொண்டார்.

இது குறித்து ஐ.சி.சி., வெளியிட்ட அறிக்கையில்,""நடத்தை விதிமுறையின்படி தாமதமாக பந்துவீசினால், ஒரு ஓவருக்கு வீரர்களின் போட்டி சம்பளத்தில் இருந்து 10 சதவீதம் அபராதமாக விதிக்கப்படும். கேப்டனுக்கு இரண்டு மடங்காக அபராதம் அதிகரிக்கப்படும்.

இந்திய அணி இரண்டு ஓவர்கள் தாமதமாக பந்துவீசியதால், வீரர்களுக்கு 20 சதவீதம், தோனிக்கு ஒரு போட்டி தடை மற்றும் 40 சதவீதம் அபராதம் விதிக்கப்படுகிறது,''என, தெரிவிக்கப்பட்டுள்ளது.

வரும் 24ம் தேதி அடிலெய்டில் துவங்கும் நான்காவது டெஸ்டில் தடை காரணமாக தோனி இடம் பெற முடியாது. இவருக்கு பதிலாக அணியின் கேப்டன் பெறுப்பை சேவக் ஏற்க உள்ளார். விக்கெட் கீப்பர் பணியை விரிதிமன் சகா ஏற்பார்.

கேப்டன் தோனியை நீக்க வேண்டும்

2012-01-14T19:56:00.000-08:00

தோனியை டெஸ்ட் அணி கேப்டன் பதவியில் இருந்து நீக்க வேண்டும். சீனியர் வீரர்கள் லட்சுமண், டிராவிட் இருவரும் ஓய்வு பெற வேண்டும்,'' என, கங்குலி உள்ளிட்ட இந்திய அணியின் முன்னாள் வீரர்கள் ஆவேசமாக தெரிவித்துள்ளனர்.

ஆஸ்திரேலியா சென்றுள்ள இந்திய அணி, முதல் இரண்டு டெஸ்டில் தோல்வியடைந்தது. பெர்த்தில் நடக்கும் மூன்றாவது டெஸ்டிலும் மோசமான நிலையில் உள்ளது.

தோனி வேண்டாம்:

இதுகுறித்து இந்திய அணியின் முன்னாள் வேகப்பந்து வீச்சாளர் மதன் லால் கூறுகையில்,""டெஸ்ட் கேப்டன் பொறுப்பில் இருந்து தோனியை நீக்க வேண்டிய நேரம் வந்துவிட்டது.

புது சிந்தனையுடன் அணியை வெற்றிப் பாதைக்கு அழைத்து செல்லும் மற்றொரு வீரரை கொண்டு வருவதற்கான சரியான நேரம் இதுதான் என்று நினைக்கிறேன்,'' என்றார்.

விலக வேண்டும்:

இது குறித்து இந்திய அணியின் முன்னாள் கேப்டன் கங்குலி கூறியது:

ஈடன் கார்டனில் டிராவிட், லட்சுமண் இருவரும் சாதித்தது போல, மீண்டும் வேண்டும் என, நாம் எதிர்பார்க்க முடியாது. ஏனெனில் இவர்கள் இப்போது 40 வயதை நெருங்குகின்றனர்.

சொந்த மண்ணில் திறமை வெளிப்படுத்தினாலும், அடுத்து 2013ல் இந்திய அணி அன்னிய மண்ணில் டெஸ்ட் தொடரில் பங்கேற்கும். இதற்கு முன், தானாக ஓய்வு பெறுவது குறித்து, இந்த வீரர்கள் முடிவெடுக்க வேண்டும்.

இடம் கிடைக்காது:

தற்போதைய நிலையில் பெர்த் மட்டுமல்ல, அடிலெய்டிலும் தோல்வி தான் கிடைக்கும் என்று தெரிகிறது. கேப்டன் தோனி மீதமுள்ள மூன்று இன்னிங்சில், தனது பேட்டிங் திறமையை நிரூபிக்க வேண்டும்.

இல்லையென்றால் 11 பேர் கொண்ட அணியில் இடம் பிடிப்பதே சிக்கலாகி விடும். இத்தொடருக்குப் பின் இந்திய அணியில் மிகப்பெரிய மாற்றம் இருக்கும்.

இவ்வாறு கங்குலி கூறினார்.

என்ன பயன்?

கபில்தேவ் கூறுகையில்,""பணம் மற்றும் உலக கிரிக்கெட்டை கட்டுபடுத்துவதில், இந்திய கிரிக்கெட் போர்டு (பி.சி.சி.ஐ.,) நல்ல நிலையில் உள்ளது. இவ்வளவு செல்வாக்கு இருந்து என்ன பயன், அன்னிய மண்ணில் இந்திய அணி தொடர் தோல்வியைத் தான் சந்திக்கிறது. பி.சி.சி.ஐ., உண்மையில் ஒரு வலிமையான அணியை உருவாக்கவில்லை,'' என்றார்.

இன்னிங்ஸ் தோல்வியை தவிர்க்க இந்தியா போராட்டம்

2012-01-14T07:19:00.000-08:00

பெர்த் டெஸ்டின் இரண்டாவது இன்னிங்சிலும் பேட்ஸ்மேன்கள் சொதப்புவதால், இந்திய அணி இன்னிங்ஸ் தோல்வியை தவிர்க்க போராடி வருகிறது. பவுலிங்கில் எழுச்சி பெற்ற உமேஷ் யாதவ், 5 விக்கெட் வீழ்த்தி அசத்தினார்.

இந்தியா, ஆஸ்திரேலிய அணிகள் இடையிலான மூன்றாவது டெஸ்ட், பெர்த்தில் நடக்கிறது. முதல் இன்னிங்சில் இந்திய அணி 161 ரன்கள் எடுத்தது. முதல் நாள் ஆட்டநேர முடிவில் ஆஸ்திரேலிய அணி முதல் இன்னிங்சில் விக்கெட் இழப்பின்றி 149 ரன்கள் எடுத்திருந்தது. வார்னர்( 104), கோவன் (40) அவுட்டாகாமல் இருந்தனர்.

உமேஷ் அபாரம்:

இன்று இரண்டாம் நாள் ஆட்டம் நடந்தது. இம்முறை உமேஷ் யாதவ் பவுலிங்கில் அசத்தினார். இவரது வேகத்தில் கோவன் (74), பாண்டிங் (7) போல்டாகினர். மார்ஷ்சும் 11 ரன்னில் அவுட்டாகினார். வார்னரை (180) இஷாந்த் சர்மா வெளியேற்றினார். கிளார்க் 18 ரன்கள் எடுத்தார்.

ஹாடின் "டக் ஆனார். ஹசி (14), சிடில் (30), ஹாரிஸ் (9) நிலைக்கவில்லை. ஹில்பெனாஸ் (6) சேவக் சுழலில் வீழ்ந்தார். ஆஸ்திரேலிய அணி முதல் இன்னிங்சில் 369 ரன்களுக்கு ஆல் அவுட்டாகி, 208 ரன்கள் முன்னிலை பெற்றது. ஸ்டார்க் (15) அவுட்டாகாமல் இருந்தார்.

பவுலிங்கில் அசத்திய உமேஷ் யாதவ் 5 விக்கெட் வீழ்த்தினார். ஜாகிர் கான் 2, வினய் குமார், இஷாந்த் சர்மா, சேவக் தலா 1 விக்கெட் கைப்பற்றினர்.

சச்சின் "அவுட்:

இரண்டாவது இன்னிங்சை துவக்கிய இந்திய அணிக்கு காம்பிர் (14), சேவக் (10) இருவரும் அதிர்ச்சி தந்தனர். சச்சின் 8 ரன்களுக்கு அவுட்டாகி, மீண்டும் சதத்தில் சதம் அடிக்காமல் ஏமாற்றினார்.

லட்சு"மண் "டக் அவுட்டாகினார். இரண்டாம் நாள் ஆட்டநேர முடிவில் இந்திய அணி, இரண்டாவது இன்னிங்சில் 4 விக்கெட்டுக்கு, 88 ரன்கள் எடுத்து, 120 ரன்கள் பின்தங்கி இருந்தது. டிராவிட் (32), கோஹ்லி (21) அவுட்டாகாமல் இருந்தனர்.

இந்திய அணியின் கடைசி வாய்ப்பு

2012-01-13T07:01:00.000-08:00

ஆஸ்திரேலியா சென்றுள்ள இந்திய அணி, நான்கு போட்டிகள் கொண்ட டெஸ்ட் தொடரில் பங்கேற்று வருகிறது. இதில் இந்திய அணி 0-2 என பின்தங்கியுள்ளது. இந்நிலையில் மூன்றாவது டெஸ்ட், பெர்த் மைதானத்தில் இன்று துவங்குகிறது.

இது குறித்து அக்ரம் கூறியது:

பெர்த் ஆடுகளம் வேகப்பந்து வீச்சு சாதகமாகவும், நன்கு "பவுன்ஸ்' ஆகும். இங்கு பெரும்பாலும் ஆஸ்திரேலிய அணி தான் வெற்றி பெற்றுள்ளது. இருந்தாலும், கடந்த 2008ம் ஆண்டு ஆஸ்திரேலியாவுக்கு எதிரான டெஸ்டில் இந்திய அணி 72 ரன்கள் வித்தியாசத்தில் வென்றுள்ளது. எனவே இன்றும் கவனமுடன் செயல்பட்டால் வெற்றி பெறலாம்.

முதல் இரண்டு போட்டியில் இந்திய வீரர்களின் செயல்பாடு உண்மையிலேயே மிகவும் மந்தமாக இருந்தது. ரோகித் சர்மா உள்ளிட்ட இளம் வீரர்களுக்கு தேர்வு குழுவினர் வாய்ப்பு அளிக்க வேண்டும்.

ஏனென்றால் லட்சுமண், சச்சின், டிராவிட் உள்ளிட்ட அனுபவ வீரர்கள் தொடர்ந்து அணிக்காக விளையாட முடியாது. கடந்த ஒரு வருடமாக டெஸ்ட் தொடரில் இந்திய அணி சொதப்பி வருகிறது.

சிட்னி, மெல்போர்ன் இரண்டிலும் சச்சின் மட்டும் தான் சிறப்பான ஆட்டத்தை வெளிப்படுத்தியுள்ளார். இன்றைய போட்டி இந்திய அணிக்கு வாழ்வா, சாவா போட்டி என்பதால் இதில் சிறந்த ஆட்டத்தை வெளிப்படுத்துவார்கள் என நினைக்கிறேன்.

தோல்வி அடையும் அணி விமர்சனத்திற்குள்ளாவது இயற்கை தான். தேவையற்ற விமர்சனத்தை தவிர்க்க வெற்றி பெறுவது தான் ஒரே வழி. பெர்த் வெற்றி இந்திய அணிக்கு பெரும் திருப்பு முனையாக அமையும். கடந்த தோல்விகளை மறந்து புத்துணர்ச்சியுடன் களமிறங்கினால் சாதிக்கலாம்.

இவ்வாறு அக்ரம் கூறினார்.

அணியில் பிளவை ஏற்படுத்துகிறார் சேவாக்

2012-01-12T09:12:00.000-08:00

இந்திய அணி வீரர்களிடையே துணை கேப்டன் வீரேந்திர சேவாக், பிளவை ஏற்படுத்துகிறார் என்று ஆஸ்திரேலிய ஊடகங்கள் செய்தி வெளியிட்டுள்ளன.

இதுதொடர்பாக ஆஸ்திரேலியாவின் "ஹெரால்டு சன்' வெளியிட்டுள்ள செய்தியில், "அணி வீரர்களிடையே பிளவை ஏற்படுத்தும் கருத்துகளைக் கொண்டுள்ளார் சேவாக்' என்று கூறியுள்ளது. இந்திய அணி வீரர்களிடையே ஒற்றுமையில்லை.

அவர்கள் சண்டையிட்டுக் கொண்டிருக்கிறார்கள் என ஆஸ்திரேலியாவின் வேகப்பந்து வீச்சாளர் ரியான் ஹாரிஸ் தெரிவித்ததாகவும் அந்த பத்திரிகையில் செய்தி வெளியிடப்பட்டுள்ளது.

அணிக்கு யார் கேப்டனாக இருப்பது என்பதில் இப்போது பிரச்னை ஏற்பட்டுள்ளது. சில வீரர்கள் சேவாக் கேப்டனாக வரவேண்டும் என்றும், சில வீரர்கள் தோனியே கேப்டனாகத் தொடர வேண்டும் என்றும் விரும்புகின்றனர் என்றும் தெரிவித்துள்ளது.

இதனிடையே, "உலகில் உள்ள மற்ற அணிகளோடு ஒப்பிடும்போது இந்திய அணி விரைவாக சுருண்டுவிடும். அந்த அணி எப்போதெல்லாம் அந்த நிலைக்குத் தள்ளப்படுகிறதோ, அப்போது அந்த அணி வீரர்கள் தங்களுக்குள் சண்டையிட்டுக் கொள்வார்கள்' என்று ஆஸ்திரேலிய விக்கெட் கீப்பர் பிராட் ஹாடின், "சிட்னி ஹெரால்டு' பத்திரிகைக்கு அளித்த பேட்டியில் தெரிவித்துள்ளார்.

இதற்கு கடும் எதிர்ப்புத் தெரிவித்துள்ள இந்திய வேகப்பந்து வீச்சாளர் ஜாகீர்கான், "ஹாடின் அவரது விக்கெட் கீப்பர் பணியில் மட்டும் கவனம் செலுத்தட்டும். மற்றதைப் பற்றிப் பேச வேண்டாம்.

இந்திய வீரர்களுக்கு மனதளவில் நெருக்கடியை ஏற்படுத்துவதற்காகவே ஹாடின் இவ்வாறு பேசியுள்ளார்' என்றார்.

ஆஸ்திரேலியாவில் சுற்றுப் பயணம் செய்து விளையாடி வரும் இந்திய அணி முதல் இரண்டு டெஸ்ட் போட்டிகளில் தோல்வி கண்டு பின்னடைவைச் சந்தித்துள்ள நிலையில், இப்போது ஆஸ்திரேலிய வீரர்கள் மட்டுமின்றி, ஊடகங்களும் சர்ச்சையை கிளப்பி வருகின்றன.

யுவராஜ் சிங் தேர்வு செய்யப்படுவாரா?

2012-01-11T08:49:00.000-08:00

ஆஸ்திரேலியாவில் நடக்கவுள்ள சர்வதேச "டுவென்டி-20' மற்றும் முத்தரப்பு ஒருநாள் தொடருக்கான இந்திய வீரர்களின் தேர்வு, வரும் 15ம் தேதி சென்னையில் நடக்கிறது. இதில் "உலக கோப்பை தொடர் நாயகன்' யுவராஜ் சிங் இடம் பெறுவார் என எதிர்பார்க்கப்படுகிறது.

ஆஸ்திரேலியா சென்றுள்ள இந்திய அணி, முதற்கட்டமாக நான்கு போட்டிகள் கொண்ட டெஸ்ட் தொடரில் விளையாடி வருகிறது.

அதன்பின், இரண்டு சர்வதேச "டுவென்டி-20' மற்றும் முத்தரப்பு ஒருநாள் தொடரில் பங்கேற்கிறது. இதில் மூன்றாவது அணியாக இலங்கை விளையாடுகிறது.

இரண்டு சர்வதேச "டுவென்டி-20' போட்டிகள் சிட்னி (பிப்., 1) மற்றும் பெல்போர்ன் (பிப்., 3) நகரில் நடக்கிறது.

முத்தரப்பு ஒருநாள் தொடரின் முதல் போட்டி பிப்., 5ம் தேதி மெல்போர்னில் நடக்கிறது.

இந்த இரண்டு தொடர்களுக்கான இந்திய வீரர்களின் தேர்வு, வரும் 15ம் தேதி பி.சி.சி.ஐ., தேர்வுக்குழு தலைவர் ஸ்ரீகாந்த் முன்னிலையில் சென்னையில் நடக்கிறது.

இதில் "ஆல்-ரவுண்டர்' யுவராஜ் சிங் தேர்வு செய்யப்படுவார் என எதிர்பார்க்கப்படுகிறது.

சமீபத்தில் நுரையீரலில் ஏற்பட்ட பிரச்னை காரணமாக ஓய்வில் இருக்கும் இவர், தற்போது முழுமையாக குணமடைந்து, பயிற்சி மேற்கொண்டு வருகிறார்.

பயிற்சிக்கு "நோ' சொன்ன வீரர்கள்

2012-01-10T09:21:00.000-08:00

டெஸ்ட் போட்டிகளில் படுதோல்வி அடைந்த இந்திய வீரர்கள் திருந்தவே இல்லை. தீவிர பயிற்சியில் ஈடுபடுவதற்கு பதிலாக, "கோ- கார்ட்டிங்' ரேசில் பங்கேற்று சர்ச்சையை கிளப்பியுள்ளனர்.

ஆஸ்திரேலிய சென்றுள்ள இந்திய அணி, முதலிரண்டு டெஸ்டில் தோல்வி அடைந்தது. முக்கியமான மூன்றாவது டெஸ்ட் வரும் 13ம் தேதி பெர்த்தில் துவங்குகிறது.

இதில், சாதிப்பதற்கு இந்திய வீரர்கள் தீவிர பயிற்சியில் ஈடுபடுவார்கள் என எதிர்பார்க்கப்பட்டது. ஆனால், "கோ-கார்ட்டிங்' எனப்படும் சிறிய வகை கார் ரேசில் கலந்து கொண்டு பொழுதை வீணாக்கினர்.

தோனி அணுகுமுறை:

இத்தொடரில் இந்திய வீரர்கள் பயிற்சிக்கு முக்கியத்துவம் கொடுக்காதது பற்றி முன்னாள் வீரர் கவாஸ்கர் கடுமையாக சாடினார். இவர்கள், ஆஸ்திரேலியாவுக்கு சுற்றுலா செல்லவில்லை என விமர்சித்தார்.

வீரர்களின் தவறான மனநிலைக்கு கேப்டன் தோனியின் அணுகுமுறையும் ஒரு காரணம். வலைப்பயிற்சியில் ஈடுபடுவதால் உடனடி பலன் கிடைக்கப் போவதில்லை என நம்புகிறார். இவர் கூறுகையில்,""ஆஸ்திரேலிய பந்துவீச்சை நமது வீரர்கள் நன்கு அறிந்து கொண்டனர்.

தற்போதைக்கு வேறு விஷயங்களில் கவனம் செலுத்துவது தான் நல்லது. சிலர் பயிற்சியில் அதிக நேரம் செலவழிக்க விரும்பலாம். தனிப்பட்ட முறையில் என்னை கேட்டால், கிரிக்கெட்டில் இருந்து விலகி, பொழுதுபோக்கு தொடர்பான விஷயங்களில் ஈடுபடுவதே சிறந்தது. இது மனதளவில் புது உற்சாகம் தரும்,''என்றார்.

இதே கருத்தையே இந்திய அணியின் மானேஜர் அலுவாலியாவும் பிரதிபலித்தார். இவர் கூறுகையில்,""கோ-கார்ட்டிங் ரேஸ்' போன்றவை மன அழுத்தத்தில் இருந்து விடுபட உதவும். சிறிய வகை ரேஸ் காரை ஓட்டும் போது புது அனுபவம் கிடைக்கும்.

2007-08ல் பெர்த்தில் நடந்த டெஸ்ட் போட்டிக்கு முன், இந்திய வீரர்கள் சைக்கிள் "ரேசில்' கலந்து

கொண்டனர். பின் அந்த போட்டியில் வெற்றி பெற்றனர்,'' என்றார்.

அலுவாலியா சொல்வது போல் இம்முறையும் இந்திய அணி வெற்றி பெறுமா?

ரேங்கிங்: இந்தியா பின்னடைவு

2012-01-09T07:43:00.001-08:00

ஆஸ்திரேலியாவுக்கு எதிரான டெஸ்ட் தொடரை இந்திய அணி "டிரா' (2-2) செய்தால் கூட, ஐ.சி.சி., டெஸ்ட் ரேங்கிங்கில் இந்திய அணி மூன்றாவது இடத்துக்கு தள்ளப்படும் நிலை ஏற்பட்டுள்ளது.

ஐ.சி.சி., டெஸ்ட் ரேங்கிங்கில், இங்கிலாந்து (125), இந்தியா (118), தென் ஆப்ரிக்கா (117), ஆஸ்திரேலியா (103) முதல் நான்கு இடங்களில் உள்ளன. இதில் இந்திய அணி, மூன்றாவது இடத்துக்கு தள்ளப்படும் அபாயம் ஏற்பட்டுள்ளது.

இந்தியாவுக்கு எதிரான நான்கு போட்டிகள் கொண்ட டெஸ்ட் தொடரில் ஆஸ்திரேலிய அணி 2-0 என முன்னிலை வகிக்கிறது. ஒருவேளை மீதமுள்ள இரண்டு டெஸ்டில் இந்திய அணி வெற்றி பெறும் பட்சத்தில், தொடர் 2-2 என "டிரா' ஆகிவிடும்.

இருப்பினும், ஐ.சி.சி., டெஸ்ட் ரேங்கிங்கில், இந்திய அணி 117 புள்ளிகள் பெற்று, மூன்றாவது இடத்துக்கு தள்ளப்படும். இதனால் தென் ஆப்ரிக்க அணி (117), ஒரு சில தசம புள்ளிகள் வித்தியாசத்தில், இரண்டாவது இடத்துக்கு முன்னேறும்.

டெஸ்ட் தொடரை, 3-0 என கைப்பற்றும் பட்சத்தில், ஆஸ்திரேலிய அணி 110 புள்ளிகளுடன், நான்காவது இடத்தில் நீடிக்கும். இந்திய அணி 112 புள்ளிகளுடன் மூன்றாவது இடத்துக்கு தள்ளப்படும்.

ஒருவேளை 3-1 என கைப்பற்றும் பட்சத்தில், ஆஸ்திரேலிய அணி 108 புள்ளிகளுடன் 4வது இடத்தில் தொடரும். இந்திய அணி 113 புள்ளிகளுடன் மூன்றாவது இடம் பிடிக்கும்.

ஒருவேளை, 4-0 என முழுமையாக கைப்பற்றும் பட்சத்தில், ஆஸ்திரேலியா, இந்தியா அணிகளுக்கு தலா 111 புள்ளிகள் கிடைக்கும். ஒரு சில தசம புள்ளிகள் வித்தியாசத்தில் இந்திய அணி மூன்றாவது இடத்தை பெறும்.

டெஸ்ட் பேட்ஸ்மேன்களுக்கான ரேங்கிங்கில், சச்சின் (6வது இடம்), டிராவிட் (15வது இடம்), லட்சுமண் (18வது இடம்), சேவக் (22வது இடம்) உள்ளிட்ட இந்திய வீரர்கள் பின்னடைவை சந்தித்துள்ளனர்.

சிட்னி டெஸ்டில் 329 ரன்கள் எடுத்த ஆஸ்திரேலிய கேப்டன் மைக்கேல் கிளார்க் (8வது இடம்), சுமார் 15 மாதங்களுக்கு பின் "டாப்-10' வரிசையில் இடம் பிடித்துள்ளார். மற்றொரு ஆஸ்திரேலிய வீரர் மைக்கேல் ஹசி, 12வது இடத்துக்கு முன்னேறினார்.

டெஸ்ட் பவுலர்களுக்கான ரேங்கிங்கில், ஆஸ்திரேலிய வேகப்பந்துவீச்சாளர் பென் ஹில்பெனாஸ், 11 இடங்கள் முன்னேறி, முதன்முறையாக 11வது இடம் பிடித்தார்.

இந்திய பேட்ஸ்மேன்கள் காகிதப்புலிகள்

2012-01-08T06:55:00.000-08:00

இந்திய பேட்ஸ்மேன்கள் காகித புலிகளாக உள்ளனர். களத்தில் தொடர்ந்து சொதப்பும் இந்த வயதான வீரர்கள் தேவைதானா'' என ஆஸ்திரேலிய "மீடியா'க்கள் சாடியுள்ளன.

இந்தியா, ஆஸ்திரேலியா இடையிலான நான்கு போட்டிகள் கொண்ட டெஸ்ட் தொடர் தற்போது நடக்கிறது. மெல்போர்னில் 122 ரன்கள் வித்தியாசம், சிட்னி டெஸ்டில் இன்னிங்ஸ், 68 ரன்கள் வித்தியாசத்தில் மோசமாக தோல்வியடைந்த இந்திய அணி, தொடரில் 0-2 என பின்தங்கியுள்ளது.

இதுகுறித்து ஆஸ்திரேலியாவில் இருந்து வெளியாகும் பத்திரிகைகளின் செய்திகள்:

"ஆஸ்திரேலியன் அசோசியேட் பிரஸ்'

காகித அளவில் பார்த்தால், இந்திய டெஸ்ட் அணியின் "பேட்டிங்' படை, இதுவரை பார்த்திராத அளவில் அஞ்சத்தக்க வகையில் இருந்தது. ஆனால் உண்மையில் இவர்களுக்கு வயதாகிவிட்டது. அனுபவம் பயனற்றதாகி விட்டது.

டிராவிட், சச்சின் 39 வயதை நெருங்குகின்றனர். லட்சுமண் 37ல் உள்ளார். இவர்களை வைத்து தான் சமீபத்தில் இங்கிலாந்து மண்ணில் இந்திய அணி மோசமாக தோற்றது. தற்போது ஆஸ்திரேலிய தொடரில் பின்தங்கியுள்ளது. இவையெல்லாம் ஏதோ கெட்ட செய்தியை உணர்த்துகின்றன.

சாம்பியன் வீரர்கள் அதிகம் நிறைந்திருப்பது எப்போதும் அணிக்கு ஆபத்து தான் தரும். இந்த மும்மூர்த்திகள் தவிர, சேவக், கேப்டன் தோனியும் சமீபத்தில் சிறப்பான ஆட்டத்தை வெளிப்படுத்தவில்லை.

இந்திய அணி "நம்பர்-1' இடத்தை இங்கிலாந்திடம் இழக்கும் முன், இந்த சீனியர் வீரர்கள் பெரிய "பார்ட்னர்ஷிப்' அமைத்து அணியின் வெற்றிக்கு கைகொடுத்தனர். இப்போது அதுபோல நிகழவில்லை. இவர்களது வயது குறித்து கேள்விகள் எழுகின்றன.

"சிட்னி மார்னிங் ஹெரால்டு'

சிட்னி மைதானம் இந்திய அணிக்கு கைகொடுக்கும் என மிகைப்படுத்தப்பட்ட வதந்தி இருந்தது. நான்காம் நாள் ஆட்டத்தின் உணவு இடைவேளைக்குப் பின்னும் சச்சின், லட்சுமண் களத்தில் இருந்த போது, இந்திய அணி மீண்டுவிடும் என்ற நம்பிக்கை இருந்தது. சச்சின், லட்சுமண் வெளியேறிய பின், மற்ற வீரர்கள் வழக்கம் போல போவதும் வருவதுமாக இருக்க, கிளார்க் மடியில் வெற்றி விழுந்தது.

"தி ஆஸ்திரேலியன்'

கிளார்க், சச்சினின் ஒரு விக்கெட்டை மட்டும் தான் வீழ்த்தினார். இது ஐந்து விக்கெட் எடுத்ததற்கு சமம். எப்போது சச்சின் அவுட்டானாரோ, அது மற்ற வீரர்களின் வெளியேற்றத்துக்கான வாசல் கதவை திறந்து விட்டது.

"ஹெரால்டு சன்'

பெரிய பேட்டிங் படை கொண்ட இந்திய வீரர்களை, நான்கு நாட்களில் வீழ்த்தி, இரு வாரத்தில் இருமுறை ஆஸ்திரேலிய அணி வெற்றி பெற்றது பாராட்டுக்குரியது. கேப்டன், ஒருநாள் 300 ரன்கள் எடுக்கிறார். மறுநாள் சச்சினின் விக்கெட்டை வீழ்த்தி, 100வது சத சாதனையை தடுக்கிறார். இவர் கேப்டனாக இனி செய்ய வேண்டியது ஒன்றும் இல்லை.

"டெய்லி டெலிகிராப்'

சொந்த மண்ணில் கிளார்க் அடித்த "டிரிபிள்' சதம், என்றென்றும் நினைவில் நீடித்து இருக்கும். சரியான நேரத்தில் பாண்டிங், ஹசி சதம் அடித்தனர்.

இவ்வாறு அவை தெரிவித்து இருந்தன.

54 நாட்கள்...76 போட்டிகள்: ஐ.பி.எல்., அட்டவணை அறிவிப்பு

2012-01-06T22:33:00.000-08:00

ஐந்தாவது ஐ.பி.எல்., "டுவென்டி-20' கிரிக்கெட் தொடர், சென்னையில் வரும் ஏப்ரல் 4ம் தேதி துவங்குகிறது. முதல் போட்டியில் சென்னை சூப்பர் கிங்ஸ், மும்பை இந்தியன்ஸ் அணிகள் மோதுகின்றன. 54 நாட்களில் மொத்தம் 76 போட்டிகள் நடக்க உள்ளன.

இந்தியன் பிரிமியர் லீக் (ஐ.பி.எல்.,) சார்பில், ஆண்டுதோரும் "டுவென்டி-20' கிரிக்கெட் தொடர் நடத்தப்படும். இந்த ஆண்டுக்கான ஐந்தாவது ஐ.பி.எல்., தொடர், வரும் ஏப்ரல் 4ம் தேதி சென்னை சேப்பாக்கம் மைதானத்தில் துவங்குகிறது.

இத்தொடருக்கான அட்டவணையை இந்திய கிரிக்கெட் போர்டு (பி.சி.சி.ஐ.,) மும்பையில் நேற்று அறிவித்தது. வரும் ஏப்ரல் 4ம் தேதி சென்னையில் நடக்கும் முதல் போட்டியில், "நடப்பு சாம்பியன்' சென்னை சூப்பர் கிங்ஸ், மும்பை இந்தியன்ஸ் அணிகள் விளையாடுகின்றன.

கடந்த தொடரில் அறிமுகமான கொச்சி டஸ்கர்ஸ் கேரளா அணி, சமீபத்தில் ஐ.பி.எல்., தொடரில் இருந்து நீக்கப்பட்டது. இதனால் இம்முறை சென்னை சூப்பர் கிங்ஸ், கோல்ட்டா நைட்ரைடர்ஸ் உள்ளிட்ட ஒன்பது அணிகள் பங்கேற்கின்றன.

மொத்தம் 54 நாட்கள் நடக்கும் இத்தொடரில், 72 லீக் போட்டிகள், மூன்று "பிளே-ஆப்' (பைனலுக்கான தகுதிச் சுற்று), ஒரு பைனல் உட்பட மொத்தம் 76 போட்டிகள் நடக்கின்றன. இப்போட்டிகள் நாட்டின் முக்கிய நகரங்களில் உள்ள 12 மைதானங்களில் நடக்கின்றன. பெங்களூருவில் இரண்டு "பிளே-ஆப்' போட்டிகளும், சென்னையில் ஒரு "பிளே-ஆப்' மற்றும் பைனல் (மே 27) நடக்கிறது.

லீக் போட்டிகள் அனைத்தும், முதல் மூன்று தொடரில் விளையாடியது போல நடக்கும். அதாவது ஒரு அணி, மற்ற அணிகளுடன் தலா இரண்டு முறை லீக் போட்டியில் விளையாடும். இதில் ஒரு போட்டி உள்ளூரிலும், மற்றொரு போட்டி எதிரணியின் ஊரிலும் விளையாடும்.

லீக் சுற்றின் முடிவில் முதல் நான்கு இடங்களை பிடிக்கும் அணிகள், பைனலுக்கான "பிளே-ஆப்' சுற்றுக்கு தகுதி பெறும்.

முதல் "பிளே-ஆப்' போட்டியில், முதலிரண்டு இடங்களில் உள்ள அணிகள் மோதும். இதில் வெற்றி பெறும் அணி, பைனலுக்கு நேரடியாக முன்னேறிவிடும். இரண்டாவது "பிளே-ஆப்' போட்டியில் 3, 4வது இடத்தில் உள்ள அணிகள் மோதும்.

இதில் வெற்றி பெறும் அணி, முதல் "பிளே-ஆப்' போட்டியில் தோல்வி அடைந்த அணியுடன், மூன்றாவது "பிளே-ஆப்' போட்டியில் விளையாடும். இதில் வெற்றி பெறும் அணி, பைனலுக்கு தகுதி பெறும்.

100வது சதத்தைப் பற்றி நினைக்கவில்லை

2012-01-06T08:17:00.000-08:00

100-வது சதத்தைப் பற்றிய சிந்தனையின்றி போட்டியை மிகவும் ரசித்து விளையாடுவதற்கே முன்னுரிமை கொடுக்கிறேன் என்று சச்சின் கூறியுள்ளார்.

சச்சினின் 100-வது சதத்தை எதிர்நோக்கி உலகம் முழுவதிலும் உள்ள கிரிக்கெட் ரசிகர்கள் காத்திருக்கும் நிலையில், அவர் மேலும் கூறியது:

100-வது சதம் என்பது வெறும் எண்ணிக்கைதானே என்று சொல்வது எளிது. ஆனால் அதை அடிப்பது கடினம். 100-வது சதம் குறித்து பெரிய அளவில் எதிர்பார்ப்பு உள்ளது.

ஆனால் நான் போட்டியை ரசித்து விளையாடவே விரும்புகிறேன். ரசிப்புத் தன்மை மிகவும் முக்கியமானது என்று நினைக்கிறேன்.

இந்தத் தொடரைப் பொறுத்தவரையில் மகிழ்ச்சியோடு விளையாடுவதிலும், வெற்றிபெறுவதிலுமே முழுக் கவனமும் உள்ளது என்றார்.

இலங்கையில் ஐ.பி.எல்., போட்டிகள்

2012-01-05T07:42:00.001-08:00

இந்தியன் பிரிமியர் லீக் (ஐ.பி.எல்.,) "டுவென்டி-20' தொடரை இந்திய கிரிக்கெட் போர்டு (பி.சி.சி.ஐ.,) நடத்தி வருகிறது.

இந்த ஆண்டு நடக்கும் ஐந்தாவது ஐ.பி.எல்., தொடரின் ஒரு சில போட்டிகளை இலங்கையில் நடத்த வேண்டும் என கோரிக்கை விடுக்கப்பட்டுள்ளது.

இது குறித்து இலங்கை கிரிக்கெட் போர்டு தலைவர் தர்மதாசா கூறுகையில்,"" ஐ.பி.எல்., போட்டிகளை நடத்துவதன் மூலம் இலங்கைக்கு ஏராளமான சுற்றுலாப் பயணிகள் வருவர்.

கிரிக்கெட் போர்டும் நல்ல வளர்ச்சி பெறும். இது குறித்து பி.சி.சி.ஐ.,யிடம் ஏற்கனவே பேசியுள்ளோம். இதற்கு ஒத்துழைப்பு தருவார்கள் என எதிர்பார்க்கிறேன்.

தவிர, இந்தியா, இலங்கை அணிகளுக்கு இடையிலான டெஸ்ட், ஒரு நாள் உள்ளிட்ட போட்டிகளும் ஆண்டிற்கு மூன்று முறை நடந்தால் நன்றாக இருக்கும் என விரும்புகிறேன்,'' என்றார்.

கோல்கட்டா நைட்ரைடர்ஸ் அணிக்கு புதிய பயிற்சியாளர்

2012-01-04T07:31:00.000-08:00

கோல்கட்டா நைட்ரைடர்ஸ் அணியின் தலைமை பயிற்சியாளராக டிரவர் பெய்லிஸ் நியமிக்கப்பட்டுள்ளார்.

இந்தியன் பிரிமியர் லீக் (ஐ.பி.எல்.,) சார்பில், ஆண்டுதோரும் "டுவென்டி-20' தொடர் நடத்தப்படுகிறது. இதில் இடம் பெற்றுள்ள கோல்கட்டா நைட்ரைடர்ஸ் அணியின் பயிற்சியாளராக, முன்னாள் ஆஸ்திரேலிய வீரர் டேவ் வாட்மோர் இருந்தார்.

சமீபத்தில் இவரை, பாகிஸ்தான் அணியின் பயிற்சியாளராக நியமிக்க, அந்நாட்டு கிரிக்கெட் நிர்வாகம் முடிவு செய்தது. இதனால் கோல்கட்டா அணியின் பயிற்சியாளர் பதவியில் இருந்து முறைப்படி விலகினார்.

இவருக்கு மாற்று பயிற்சியாளராக, முன்னாள் இலங்கை அணியின் பயிற்சியாளர் டிரவர் பெய்லிசை, நேற்று கோல்கட்டா அணி நிர்வாகம் நியமித்தது.

இவரது பயிற்சியின் கீழ், இலங்கை அணி கடந்த 2009ல் நடந்த "டுவென்டி-20' உலக கோப்பை மற்றும் கடந்த ஆண்டு நடந்த உலக கோப்பை (50 ஓவர்) தொடரின் பைனலுக்கு முன்னேறியது.

இதுகுறித்து கோல்கட்டா அணியின் உரிமையாளரும், பாலிவுட் நடிகருமான ஷாருக்கான் கூறுகையில், ""கோல்கட்டா அணியின் பயிற்சியாளராக டிரவர் பெய்லிசை நியமிப்பதில் மகிழ்ச்சி அடைகிறேன்.

இவரது அனுபவம், கோல்கட்டா அணியின் வெற்றிக்கு நிச்சயம் கைகொடுக்கும் என நம்புகிறேன்,'' என்றார்.

பெய்லிஸ் கூறுகையில், ""கோல்கட்டா அணியின் பயிற்சியாளராக தேர்வு செய்ததற்கு, அணி நிர்வாகத்தினருக்கும், அதன் சீனியர் வீரர்களுக்கும் மனமார்ந்த நன்றியை தெரிவித்துக் கொள்கிறேன். முன்னதாக நடந்த ஐ.பி.எல்., தொடர்களை பார்த்துள்ளேன்.

இதில் கோல்கட்டா அணியினரின் செயல்பாட்டினை நன்கு அறிந்துள்ளேன். ஒவ்வொரு வீரரின் திறமைக்கேற்ப பயிற்சி அளித்து, கோல்கட்டா அணியின் வெற்றிக்கு பாடுபடுவேன்,'' என்றார்.

பேட்ஸ்மேன்கள் பொறுப்பற்ற ஆட்டம் - மீண்டும் ஏமாற்றிய சச்சின்

2012-01-03T08:19:00.000-08:00

சிட்னி டெஸ்டில் பேட்ஸ்மேன்களின் பொறுப்பற்ற ஆட்டத்தினால், இந்திய அணி முதல் இன்னிங்சில் 191 ரன்களுக்கு சுருண்டது. 41 ரன்னுக்கு அவுட்டாகிய சச்சின், 100வது சர்வதேச சதம் அடிக்க மீண்டும் தவறினார்.

இந்தியா, ஆஸ்திரேலிய அணிகள் இடையிலான இரண்டாவது டெஸ்ட் சிட்னியில் நடக்கிறது. "டாஸ் வென்ற தோனி "பேட்டிங் தேர்வு செய்தார். துவக்கத்தில் இருந்தே ஆஸ்திரேலிய வேகப்பந்து வீச்சாளர்கள் மிரட்டினர்.

முதலில் காம்பிர் "டக் அவுட்டாகி சரிவைத் துவங்கி வைத்தார். சிறிது நேரத்தில் "சீனியர் டிராவிட்டும் (5) ஏமாற்றினார்.

சற்று நேரம் போராடிய சேவக் 30 ரன்கள் எடுத்தார். லட்சுமண் (2) மறுபடியும் சொதப்பினார். விராத் கோஹ்லி (23) ஏமாற்றினார்.

பெரிய எதிர்பார்ப்புடன் களமிறங்கிய சச்சின், 41 ரன்களுக்கு அவுட்டாகி, மீண்டும் சதத்தில் சதம் அடிக்கும் சாதனையை நழுவ விட்டார். சற்று தாக்குப்பிடித்த அஷ்வின் 20 ரன்கள் எடுத்தார்.

ஜாகிர் கான், இஷாந்த் சர்மா, உமேஷ் யாதவ் மூவரும் "டக் அவுட்டாகினர். இந்திய அணி முதல் இன்னிங்சில் 191 ரன்களுக்கு ஆல் அவுட்டானது. அரைசதம் அடித்த தோனி (57) அவுட்டாகாமல் இருந்தார்.

பின் களமிறங்கிய ஆஸ்திரேலிய அணி துவக்கத்தில் வார்னர் (8), மார்ஷ் (0), கோவன் (16) விக்கெட்டுகளை இழந்தது.

முதல் நாள் ஆட்டநேர முடிவில், ஆஸ்திரேலிய அணி முதல் இன்னிங்சில், 3 விக்கெட்டுக்கு 116 ரன்கள் எடுத்திருந்தது.

பாண்டிங் (44), கிளார்க் (47) அவுட்டாகாமல் இருந்தனர். ஜாகிர் கான் 3 விக்கெட் வீழ்த்தினார்.

சிட்னி ஆடுகளம் யாருக்கு சாதகம்

2012-01-02T08:07:00.000-08:00

சிட்னி ஆடுகளம் "சுழலுக்கு ஒத்துழைக்குமா அல்லது "வேகத்துக்கு கைகொடுக்குமா என்ற குழப்பம் நீடிக்கிறது. இது ஆஸ்திரேலிய அணியில் பிளவை ஏற்படுத்தியுள்ளது.

நான்கு வேகப்பந்துவீச்சாளர்களுடன் களமிறங்கி இந்திய அணியை சிதறடிக்க, கேப்டன் மைக்கேல் கிளார்க் திட்டமிடுகிறார். அதே நேரத்தில் பயிற்சியாளர் மிக்கி ஆர்தர், ஒரு சுழற்பந்துவீச்சாளர் கட்டாயம் வேண்டுமென வலியுறுத்துவதால், பிரச்னை வெடித்துள்ளது.

ஆஸ்திரேலியா சென்றுள்ள இந்திய அணி நான்கு போட்டிகள் கொண்ட டெஸ்ட் தொடரில் பங்கேற்கிறது. மெல்போர்னில் நடந்த முதல் டெஸ்டில் இந்திய அணி படுதோல்வி அடைந்தது.

மாறிய களம்:

இரண்டாவது டெஸ்ட் நாளை சிட்னியில் துவங்குகிறது. இங்குள்ள ஆடுகளம் பொதுவாக சுழலுக்கு ஒத்துழைக்கும். ஆனால், கடந்த ஆண்டு நடந்த இங்கிலாந்து, ஆஸ்திரேலியா மோதிய "ஆஷஸ் டெஸ்ட் போட்டியில் மொத்தம் வீழ்ந்த 30 விக்கெட்டுகளில், 3 விக்கெட்டை தான் சுழற்பந்துவீச்சாளர்கள் கைப்பற்றினர்.

இது, சிட்னி ஆடுகளம் "வேகத்துக்கு சாதகமாக மாறியிருப்பதை சுட்டிக் காட்டியது. இதே நிலை இம்முறையும் தொடரலாம். இதன் காரணமாக தான் ஆஸ்திரேலிய அணியில் அவசர அவசரமாக "வேகப்புயல் ரியான் ஹாரிஸ் சேர்க்கப்பட்டார்.

இதையடுத்து பீட்டர் சிடில், ஹில்பெனாஸ், பட்டின்சன், ஹாரிஸ் என நான்கு வேகப்பந்துவீச்சாளர்களுடன் களமிறங்கி இந்திய அணிக்கு நெருக்கடி கொடுக்க, கேப்டன் மைக்கேல் கிளார்க் திட்டம் வகுத்து இருக்கிறார். இதற்கு பயிற்சியாளர் மிக்கி ஆர்தர் தரப்பில் இருந்து எதிர்ப்பு கிளம்பியுள்ளது. "எல்லாம் வேகம் என்ற கொள்கையில் தனக்கு உடன்பாடில்லை என தெரிவித்துள்ளார்.

இது குறித்து ஆர்தர் கூறுகையில்,""பந்துவீச்சாளர்கள் தொடர்பாக இன்னும் முடிவு எடுக்கவில்லை. சிட்னி ஆடுகளம் பாரம்பரியமாக சுழலுக்கு ஒத்துழைக்கும். என்னை பொறுத்தவரை "ஸ்பின்னர் இல்லாமல் களமிறங்குவதை ஏற்க முடியாது.

மெல்போர்ன் டெஸ்டில் நாதன் லியான் "சுழலை இந்திய வீரர்கள் எளிதாக சமாளித்தனர். வலுவான இலக்கை நிர்ணயிக்கும் பட்சத்தில் எதிரணிக்கு இவர் நிச்சயமாக சவால் கொடுப்பார்,என்றார்.

வானிலை முக்கியம்:

ஆடுகள பராமரிப்பாளர் டாம் பார்க்கர் கூறுகையில்,""கடந்த ஆண்டு ஆஷஸ் போட்டிக்கு அமைக்கப்பட்ட ஆடுகளம் போல் இருக்கும்.

இரு அணிகளுக்கும் சாதகமாக அமையும். இதன் தன்மை, வானிலையை பொறுத்து மாறும். மேகமூட்டத்துடன் காணப்பட்டால், பந்துகள் நன்கு "ஸ்விங் ஆகும். போகப் போக "சுழலுக்கும் கைகொடுக்கும்,என்றார்.

2011ம் ஆண்டின் சிறந்த வீரர் டிராவிட்

2012-01-01T05:52:00.000-08:00

2011ம் ஆண்டின் சிறந்த வீரராக இந்திய கிரிக்கெட் அணியின் "பெருஞ்சுவர் டிராவிட், ரசிகர்களால் தேர்வு செய்யப்பட்டார். கேப்டன் தோனிக்கு மூன்றாவது இடம் கிடைத்தது.

இந்திய விளையாட்டு நட்சத்திரங்களில் சிறந்த வீரர்களை, ஆங்கில பத்திரிகை ஒன்று தேர்வு செய்தது.

இதற்காக 2011ல் வீரர்கள் வெளிப்படுத்திய திறமை அடிப்படையில் சச்சின், தோனி, டிராவிட், யுவராஜ், ரோகன் போபண்ணா (டென்னிஸ்), ரஞ்சன் சோதி (துப்பாக்கி சுடுதல்) உள்ளிட்ட பலர் தேர்வு செய்யப்பட்டு இருந்தனர்.

இரண்டு வாரங்களாக நடந்த ஓட்டெடுப்பில், துவக்கத்தில் இருந்தே டிராவிட் தான் முன்னிலையில் இருந்து வியப்பில் ஆழ்த்தியுள்ளார்.

இவர் 2011ல் பங்கேற்ற 12 டெஸ்ட், 5 ஒருநாள், ஒரு "டுவென்டி-20 போட்டிகளில், தலா 5 சதம், அரைசதம் உட்பட மொத்தம் 1300 ரன்கள் எடுத்து இருந்தார்.

கடைசியில், 28 ஆண்டுகளுக்குப் பின் உலக கோப்பை வென்ற கேப்டன் தோனி, தொடர் நாயகன் யுவராஜ், சச்சின் ஆகியோரை பின் தள்ளி 48 சதவீத ஓட்டுகளுடன் டிராவிட், இந்த ஆண்டின் சிறந்த வீரராக தேர்வு செய்யப்பட்டார்.

இங்கிலாந்து டெஸ்ட் தொடரில் தனி மனிதனாக போராடியது (4 டெஸ்டில், 3 சதம் உட்பட 461 ரன்கள்), இவரை சிறந்த வீரராக தேர்வு செய்ய முக்கிய காரணமாக அமைந்தது.

இரண்டாவது இடத்தை, 20 சதவீத ஓட்டுகள் பெற்ற, மாஸ்டர் பேட்ஸ்மேன் சச்சின் தட்டிச் சென்றார். இந்திய அணியின் வெற்றிகரமான கேப்டன் என புகழப்படும் தோனிக்கு மூன்றாவது இடம் (14 சதவீதம்) தான் கிடைத்தது. யுவராஜ் (12%) நான்காவது இடத்துக்கு தள்ளப்பட்டார்.

அடுத்த நான்கு இடங்களை துப்பாக்கி சுடுதல் வீரர் ரஞ்சன் சோதி (3%), டென்னிஸ் வீரர் ரோகன் போபண்ணா, பாட்மின்டன் வீராங்கனை ஜுவாலா கட்டா (தலா 2%), குத்துச்சண்டை வீரர் விகாஷ் கிருஷ்ணன் (1%) ஆகியோர் பெற்றனர்.

நூறாவது டெஸ்டில் நூறாவது சதம் எகிறுகிறது எதிர்பார்ப்பு

2011-12-31T20:30:00.000-08:00

சிட்னி மைதானத்தில் நடக்கும் நூறாவது டெஸ்ட் போட்டியில், இந்திய அணி வீரர் சச்சின், நூறாவது சதத்தை எட்டுவார் என, அதிக எதிர்பார்ப்பு ஏற்பட்டுள்ளது.

ஆஸ்திரேலியா சென்றுள்ள இந்திய அணி, நான்கு போட்டிகள் கொண்ட டெஸ்ட் தொடரில் பங்கேற்று வருகிறது. முதல் டெஸ்டில் இந்திய அணி தோல்வியடைந்தது. இரு அணிகள் இடையிலான இரண்டாவது டெஸ்ட் வரும் ஜன., 3ல் சிட்னியில் துவங்குகிறது.

இது இம்மைதானத்தில் நடக்கும் 100வது டெஸ்ட் என்ற பெருமை பெறுகிறது. இதில் இந்திய அணியின் மாஸ்டர் பேட்ஸ்மேன் சச்சின், தனது 100வது சதத்தை எட்டுவார் என அதிக எதிர்பார்ப்புகள் ஏற்பட்டுள்ளது.

கடந்த 22 ஆண்டு கிரிக்கெட் வரலாற்றில், சச்சின் இதுவரை 59 அன்னிய மைதானங்களில் விளையாடியுள்ளார். இதில் இந்திய துணைக்கண்டத்தில் உள்ள வங்கதேசத்தின் டாகா, மிர்புரில் சிறந்த சராசரி வைத்துள்ளார்.

இருப்பினும், சிட்னி மைதானம் சச்சினுக்கு ராசியானது. இதுவரை இங்கு நான்கு டெஸ்டில் பங்கேற்றுள்ளார். 1992ல் முதல் போட்டியில் சதம் (148*) அடித்தார். பின் 2000த்தில் 45, 4 ஏமாற்றினார். 2004ல் நடந்த டெஸ்டில் இரட்டை சதம் (241*, 60*) அடித்து அசத்தினார்.

கடைசியாக 2008ல் மீண்டும் சதம் (154*, 12) என, இதுவரை ஒரு இரட்டை சதம், 2 சதங்கள் அடித்து மிரட்டியுள்ளார். இம்மைதானத்தில் சச்சினின் சராசரி 221 ரன்கள் என்பது திகைப்படைய வைக்கும் தகவல்.

இது குறித்து சச்சின் கூறியது:

அன்னிய மண்ணில் நான் விளையாடிய மைதானங்களில் சிட்னி எனக்கு பிடித்தது. இங்குள்ள நேர்த்தியான சூழ்நிலை அற்புதமாக உள்ளது. என்னைப் பொறுத்தவரை இம்மைதானத்துக்கு சிறப்பான இடம் உண்டு. ஏனெனில், இங்கு ரசித்து விளையாடுவேன். இம்மைதானத்தில் களமிறங்கும் போதே, சிறப்பாக விளையாடுவோம் என்ற எண்ணம் தோன்றிவிடும்.

இவ்வாறு சச்சின் கூறினார்.

கடந்த 9 மாதங்களாக சச்சினிடம், பிடிபடாமல் நழுவிக் கொண்டிருக்கும் 100வது சதம், இவருக்கு பிடித்தமான சிட்னியில் பிடிபடட்டும்.

விற்பனை அதிகரிக்கும்:

இதனிடையே சிட்னி டெஸ்டின் முதல் நாளுக்கான டிக்கெட்டுகளில் 14,600 வரை விற்றுள்ளதாம். அடுத்த மூன்று நாட்களுக்கு முறையே 8,500, 7,000, 1,600 டிக்கெட்டுகளை வரை இதுவரை விற்றுள்ளது. இங்கு சச்சின் சாதிக்கும் பட்சத்தில், முழு அளவு டிக்கெட்டுகளும் காலியாகும் என நம்பப்படுகிறது.

சிட்னியில் நூறாவது டெஸ்ட்: இந்திய அணிக்கு மீண்டும் சோதனை

2011-12-30T20:40:00.000-08:00

இந்தியா, ஆஸ்திரேலிய அணிகள் மோதும் இரண்டாவது டெஸ்ட் போட்டி சிட்னியில் நடக்க உள்ளது. இது இம்மைதானத்தில் நடக்கும் 100வது டெஸ்ட். இந்த ஆடுகளமும் வேகப்பந்துவீச்சுக்கு சாதகமாக அமைக்கப்பட்டிருப்பதால், இந்திய அணிக்கு மீண்டும் சோதனை காத்திருக்கிறது.

ஆஸ்திரேலியா சென்றுள்ள இந்திய அணி, "பார்டர்-கவாஸ்கர்' கோப்பைக்கான, நான்கு போட்டிகள் கொண்ட டெஸ்ட் தொடரில் பங்கேற்று வருகிறது. மெல்போர்னில் நடந்த முதல் டெஸ்டில் இந்திய அணி தோல்வி அடைந்தது.

இரு அணிகள் மோதும் இரண்டாவது டெஸ்ட் வரும் ஜன., 3ம் தேதி சிட்னியில் துவங்குகிறது. இது இங்கு நடக்கும் 100வது டெஸ்ட் என்பதால் கூடுதல் சிறப்பு பெறுகிறது. கடந்த 1882ல் ஆஸ்திரேலியா, இங்கிலாந்து அணிகள் மோதிய முதல் டெஸ்ட் இங்கு நடந்தது.

சிட்னி ஆடுகளம் வழக்கமாக சுழற்பந்து வீச்சாளர்களுக்கு சாதகமாக இருக்கும். சமீப காலமாக வேகப்பந்துவீச்சுக்கு ஒத்துழைக்கும் வகையில் மாற்றப்பட்டுள்ளது. இந்த ஆண்டு துவக்கத்தில் நடந்த இரு போட்டிகளிலும் (பாகிஸ்தான், இங்கிலாந்து) முதலில் பேட் செய்யும் அணி சுருண்டதை காண முடிந்தது. இதனால், இந்திய அணிக்கு சிட்னியிலும் சோதனை காத்திருக்கிறது.

இதுகுறித்து ஆடுகள பராமரிப்பாளர் டாம் பார்க்கர் கூறியது:

பாகிஸ்தான், இங்கிலாந்து அணிகளுக்கு எதிரான போட்டிகளின் போது ஆடுகளம் அமைந்த விதம் எனக்கு மகிழ்ச்சியாக இருந்தது. இந்தியாவுக்கு எதிரான போட்டியிலும் இதேபோன்று தான் இருக்கும் என்று நம்புகிறேன்.

இதன் படி முதல் நாளில் வேகப்பந்து வீச்சுக்கு அதிக சாதகமாக இருக்கும். அடுத்தடுத்து ஆடுகளத்தில் திருப்பம் ஏற்படும். ஏனெனில், இங்குள்ள சூழ்நிலையும் அப்படி உள்ளது.

கடந்த ஆண்டு அதிகமாக மழை குறுக்கிட்டது. இம்முறை புத்தாண்டில் வானிலை மாற்றம் இருக்கும் என்று நம்புகிறேன். இருப்பினும், ஆடுகளத்தை மூடித்தான் வைத்துள்ளோம். ஏனெனில், அடுத்து வரும் நாட்களில் இங்கு அதிக போட்டிகள் நடக்கவுள்ளன.

தவிர, வேகம், சுழற் பந்து வீச்சாளர்கள், பேட்ஸ்மேன்கள் என அனைவருக்கும் சாதகமான ஆடுகளத்தை தரத்தான் எப்போதும் விரும்புகிறேன். இதற்கு தகுந்து தான் ஆடுகளத்தை தயார் செய்துள்ளோம்.

இவ்வாறு டாம் பார்க்கர் கூறினார்.

சச்சின் வீடு ரூ. 100 கோடிக்கு இன்சூரன்ஸ்

2011-12-30T07:44:00.000-08:00

மும்பையில் சச்சின் கட்டியுள்ள புதிய வீடு, ரூ. 100 கோடிக்கு "இன்சூரன்ஸ்' செய்யப்பட்டுள்ளது.

இந்திய அணியின் "மாஸ்டர் பேட்ஸ்மேன்' சச்சின். இவர் சமீபத்தில் மும்பை, பாந்த்ரா பகுதியில் 5 மாடி கொண்ட புதிய வீடு கட்டி குடியேறினார்.

இந்த வீட்டை இரு பிரிவுகளாக பிரித்து சச்சின் இன்சூரன்ஸ் செய்துள்ளார்.

முதல் பிரிவு தீ விபத்து. அதாவது தீ, பயங்கரவாத நடவடிக்கைகளால், பூகம்பம் போன்ற இயற்கை பேரழிவு, குண்டு வெடிப்பு, திருட்டு உள்ளிட்டவைகள் ஏற்படும் பாதிப்புக்கு ரூ. 75 கோடிக்கு பாலிசி எடுத்துள்ளார்.

இரண்டாவதாக சச்சினின் கிரிக்கெட் உபகரணங்கள், படங்கள், கைக்கடிகாரங்கள், பர்னிச்சர் மற்றும் எலக்ட்ரானிக் பொருட்கள் தவிர, வீடு அமைந்த நிலப்பகுதி, சுற்றுச் சுவர், பாதுகாப்பு கருவிகளுக்காக ரூ. 25 கோடி என மொத்தம் ரூ. 100 கோடி வரைக்கும் "இன்சூரன்ஸ்' செய்திருப்பதாக தெரிகிறது.

இதற்கு சச்சின் ஆண்டு ஒன்றுக்கு ரூ. 40 முதல் 50 லட்சம் வரை பிரிமியம் தொகை செலுத்த வேண்டியிருக்கும்.

இந்த இன்சூரன்ஸ் பிரிவில் சச்சின் இரண்டாவது தளத்தில் நிறுத்திவைத்திருக்கும் கார்களுக்கு கிடையாது. ஏனெனில் இந்தக்கார்களுக்கு தனியாக "இன்சூர்' செய்யப்பட்டுள்ளது.

மீண்டும் சதம் அடிக்கும் வாய்ப்பை இழந்தார் சச்சின்

2011-12-27T07:39:00.000-08:00

இந்திய "மாஸ்டர் பேட்ஸ்மேன் சச்சின், தனது 100வது சர்வதேச சதம் அடிக்கும் வாய்ப்பை மீண்டும் ஒருமுறை இழந்தார். இவர், 73 ரன்கள் எடுத்து, பீட்டர் சிடில் வேகத்தில் "கிளீன் போல்டானார்.

ஆஸ்திரேலியா சென்றுள்ள இந்திய அணி, நான்கு போட்டிகள் கொண்ட டெஸ்ட் தொடரில் பங்கேற்கிறது. முதல் டெஸ்ட் மெல்போர்னில் நடக்கிறது.

முதல் நாள் ஆட்டநேர முடிவில், முதல் இன்னிங்சில் ஆஸ்திரேலிய அணி 6 விக்கெட்டுக்கு 277 ரன்கள் எடுத்திருந்தது. பிராட் ஹாடின் (21), பீட்டர் சிடில் (34) அவுட்டாகாமல் இருந்தனர்.

ஜாகிர் அபாரம்:

முதல் இன்னிங்சை தொடர்ந்த ஆஸ்திரேலிய அணியின் பீட்டர் சிடில் (41), பிராட் ஹாடின் (27) ஜோடி ஜாகிர் கான் வேகத்தில் வெளியேறியது. அடுத்து வந்த ஹில்பெனாஸ் (19), நாதன் லியான் (6), அஷ்வின் சுழலில் சிக்கினர்.

முதல் இன்னிங்சில் ஆஸ்திரேலிய அணி 333 ரன்களுக்கு "ஆல்-அவுட் ஆனது. பட்டின்சன் (18) அவுட்டாகாமல் இருந்தார். இந்தியா சார்பில் ஜாகிர் கான் 4, உமேஷ் யாதவ், அஷ்வின் தலா 3 விக்கெட் கைப்பற்றினர்.

சேவக் அரைசதம்:

பின், முதல் இன்னிங்சை துவக்கிய இந்திய அணிக்கு காம்பிர் (3) ஏமாற்றினார். மறுமுனையில் அபாரமாக ஆடிய சேவக், டெஸ்ட் அரங்கில் தனது 30வது அரைசதம் அடித்தார். இரண்டாவது விக்கெட்டுக்கு 75 ரன்கள் சேர்த்த போது, பட்டின்சன் வேகத்தில் சேவக் (67) போல்டானார்.

சூப்பர் ஜோடி:

பின் இணைந்த டிராவிட், சச்சின் ஜோடி ஆட்டத்தை கையில் எடுத்துக் கொண்டது. அனுபவ ஆட்டத்தை வெளிப்படுத்திய டிராவிட் (63வது), சச்சின் (64வது) அரைசதம் அடித்தனர். மூன்றாவது விக்கெட்டுக்கு 117 ரன்கள் சேர்த்த போது, பீட்டர் சிடில் வேகத்தில் சச்சின் (73) "கிளீன் போல்டானார். இதன்மூலம் சச்சினின், "சதத்தில் சதம் அடிக்கும் வாய்ப்பு மீண்டும் ஒரு முறை தகர்ந்தது.

இரண்டாம் நாள் ஆட்டநேர முடிவில், முதல் இன்னிங்சில் இந்திய அணி 3 விக்கெட்டுக்கு 214 ரன்கள் எடுத்து, 119 ரன்கள் பின்தங்கி இருந்தது. டிராவிட் (68), இஷாந்த் சர்மா (0) அவுட்டாகாமல் இருந்தனர். ஆஸ்திரேலியா சார்பில் ஹில்பெனாஸ், பட்டின்சன், பீட்டர் சிடில் தலா ஒரு விக்கெட் கைப்பற்றினர்.

எதிர்பார்ப்புகளும், ஏமாற்றங்களும்

2011-12-26T07:50:00.000-08:00

சர்வதேச விளையாட்டில், இந்த ஆண்டு இந்தியாவுக்கு சிறப்பானதாகவே அமைந்தது. கிரிக்கெட்டில், உலக கோப்பை(50 ஓவர்) வென்றது. ஹாக்கியில், ஆசிய சாம்பியன் பட்டம் கைப்பற்றியது.

கால்பந்தில், தெற்காசிய சாம்பியனாக மகுடம் சூடியது. இதை தவிர, டென்னிஸ், பாட்மின்டன், மல்யுத்தம் போன்ற போட்டிகளில் ரசிகர்களின் எதிர்பார்ப்பு நிறைவேறியதா அல்லது ஏமாற்றமே மிஞ்சியதா என பார்ப்போம்...

தீபிகா பல்லிகல்:

ஸ்குவாஷ் போட்டியை பொறுத்தவரையில், சென்னை வீராங்கனையான தீபிகா பல்லிகல், 20, அசத்தினார். இந்த ஆண்டு மட்டும் ஆரஞ்ச் கவுன்டி ஓபன், கலிபோர்னியா ஓபன், ஹாங்காங் தொடர் என, மூன்று சர்வதேச பட்டங்களை வென்றார். தவிர, உலக ஸ்குவாஷ் ஓபன் தொடரின் காலிறுதிக்கு தகுதிபெற்ற முதல் இந்திய வீராங்கனை என்ற சாதனை படைத்தார்.

கடந்த 2006ம் ஆண்டில் இருந்து சர்வதேச போட்டிகளில் பங்கேற்று வரும் தீபிகா பல்லிகல், 2011 பிப்ரவரியில் தரவரிசை பட்டியலில் முதன் முறையாக 24வது இடத்திற்கு முன்னேறிய வீராங்கனை என்ற பெருமை பெற்றார். சமீபத்தில் 17வது இடத்தில் இருந்த இவர், இப்போது 19வது இடத்திலுள்ளார்.

இவருக்கு அடுத்த இடத்தில் ஜோஷ்னா சின்னப்பா (34வது ரேங்க்), இந்த ஆண்டு ஒரு பட்டம் (சிகாகோ) மட்டும் வென்றார். ஆண்கள் பிரிவை பொறுத்தவரையில் சவுரவ் கோஷல், சித்தார்த், ஹரிந்தர் பால் ஆகியோர் சர்வதேச அளவில் குறிப்பிடத்தக்க வெற்றி எதுவும் பெறவில்லை.

தீபிகா குமாரி:

வில்வித்தை போட்டி இந்த ஆண்டு இந்தியாவுக்கு வெற்றிகரமானதாக இருந்தது. 2012ல் ஒலிம்பிக் போட்டி நடக்கவுள்ள நிலையில், சர்வதேச அளவில் இந்திய பெண்கள் அணி அசத்தலான திறமை வெளிப்படுத்தியது, லண்டன் பதக்க கனவை அதிகப்படுத்தி உள்ளது.

இதில் முன்னணியில் இருப்பவர் தீபிகா குமாரி, 17. சாதாரண ஆட்டோ ரிக்ஷா தொழிலாளியின் மகளான இவருடன் இணைந்த பம்பயலா தேவி, சுவுரோ ஜோடி, உலக சாம்பியன்ஷிப் போட்டியின் அரையிறுதியில், கொரியாவை வீழ்த்தினர்.

தவிர, இத்தொடரில் முதன் முறையாக பைனலுக்கு முன்னேறிய இந்திய அணி என்ற பெருமை பெற்றனர். பைனலில் ஏமாற்றிய இவர்கள், வெள்ளிப் பதக்கத்துடன் ஆறுதல் அடைந்தனர்.

ஆண்கள் சொதப்பல்:

ஆண்கள் பிரிவில் ஜெயந்த் தாலுக்தர் மட்டும் ஒலிம்பிக் போட்டிக்கு தகுதி பெற்றார். அணி அளவில் எடுத்துக்கொண்டால் பெரும் ஏமாற்றமே. ஆசிய போட்டியில் வெள்ளி வென்ற தருண்தீப் ராய், காமன்வெல்த்தில் வெண்கலம் வென்ற ராகுல் பானர்ஜி ஆகியோருக்கும் ஏமாற்றமே.

மொத்தத்தில் இந்த ஆண்டு இந்திய அணி பல்வேறு சர்வதேச போட்டிகளில் 13 தங்கம், 16 வெள்ளி, 11 வெண்கலம் என, மொத்தம் 40 பதக்கங்களை வென்றது. இதில் 12 பதக்கங்கள் தீபிகா குமாரியால் மட்டும் கிடைத்தது.

ஜுவாலா ஆறுதல்:

பாட்மின்டன் உலக சாம்பியன்ஷிப் போட்டியில், பெண்கள் இரட்டையரில் ஜுவாலா கட்டா, அஷ்வினி பொன்னப்பா ஜோடி வெண்கலம் வென்றது தான், இந்த ஆண்டின் பெரிய வெற்றி. மற்றபடி இந்தியாவுக்கு சொல்லிக்கொள்ளும் படி எதுவும் இல்லை.

பெரிதும் எதிர்பார்க்கப்பட்ட செய்னா நேவல், சுவிஸ் கிராண்ட் பிரிக்சில் மட்டும் தங்கம் வென்றார். மலேசியா, இந்தோனேஷிய தொடர்களில் பைனலில் வீழ்ந்த இவர், உலக சூப்பர் சீரிஸ் பாட்மின்டன் தொடரின், பெண்கள் ஒற்றையர் பைனலுக்கு முன்னேறிய, முதல் இந்தியர் என்ற சாதனை படைத்தார். கலப்பு இரட்டையரில் ஜுவாலா, திஜு ஜோடி, ஒற்றையரில் காஷ்யப்பிற்கு ஏமாற்றம் தான் தந்தனர்.

ஆனால், புதியவரவான சிந்து,16, டச்சு ஓபன், மாலத்தீவு, இந்தோனேஷியா, சுவிஸ் தொடர்களில் கோப்பை வென்றார். 151வது ரேங்கில் இருந்த இவர், தற்போது 42வது இடத்துக்கு முன்னேறினார்.

இந்திய அணிக்கு அக்ரம் அட்வைஸ்

2011-12-25T19:50:00.000-08:00

ஆஸ்திரேலியாவுக்கு எதிரான டெஸ்ட் தொடரில், இந்திய வீரர்கள் மிகுந்த கவனமுடன் விளையாட வேண்டும்,'' என, முன்னாள் பாகிஸ்தான் கேப்டன் வாசிம் அக்ரம் ஆலோசனை தெரிவித்துள்ளார்.

இந்தியா, ஆஸ்திரேலியா அணிகள், நான்கு போட்டிகள் கொண்ட டெஸ்ட் தொடரில் பங்கேற்கின்றன. முதல் டெஸ்ட், மெல்போர்னில் இன்று ஆரம்பமாகிறது.

இதுகுறித்து அக்ரம் கூறியதாவது:

சச்சின், டிராவிட், லட்சுமண் உள்ளிட்ட அனுபவ வீரர்களுடன் களமிறங்கி உள்ள இந்திய அணி, போதிய அனுபவமில்லாத ஆஸ்திரேலியாவை வீழ்த்த அதிக வாய்ப்பு உள்ளது. இருப்பினும் முதலிரண்டு டெஸ்ட் போட்டியில், இந்திய வீரர்கள் மிகுந்த கவனமுடன் விளையாட வேண்டும்.

ஏனெனில், எந்த ஒரு அணியாக இருந்தாலும், ஆஸ்திரேலிய மண்ணில் விளையாடும் முதலிரண்டு டெஸ்டில் தடுமாற்றத்தை சந்திக்கும். இதனால் தோல்வி அடைய நேரிடும்.

முன்னதாக நான், டெஸ்ட் போட்டியில் விளையாட பத்து முறை ஆஸ்திரேலியா சென்றேன். அப்போது எங்கள் பாகிஸ்தான் அணி, முதலிரண்டு போட்டியில் சரிவை சந்தித்தது. எனவே இந்திய வீரர்கள், எச்சரிக்கையுடன் விளையாடி, முதலில் தோல்வியில் இருந்து மீள வேண்டும்.

இதன்மூலம் மீதமுள்ள போட்டியில் சிறப்பான ஆட்டத்தை வெளிப்படுத்தி, தொடரை கைப்பற்றலாம்.

பேட்டிங் வரிசையில் ஆறாவது வீரராக களமிறங்க விராத் கோஹ்லியை தேர்வு செய்யலாம். ஏனெனில் இவர், பயிற்சி போட்டியில் சதம் அடித்திருப்பதால், அங்குள்ள மைதானத்தின் தன்மைக்கேற்ப சிறப்பாக விளையாட வாய்ப்பு உள்ளது. அதேவேளையில், ரோகித் சர்மா சிறந்த பேட்ஸ்மேன் என்பதில் மாற்றம் இல்லை.

இவ்வாறு அக்ரம் கூறினார்.

சச்சின் 100வது சதம் அடிப்பாரா?

2011-12-25T03:22:00.000-08:00

ஆஸ்திரேலிய தொடரில் சச்சின் 100வது சதம் அடிக்க மாட்டார் என்று நம்புகிறேன்,'' என, ஆஸ்திரேலிய அணி கேப்டன் மைக்கேல் கிளார்க் தெரிவித்துள்ளார்.

ஆஸ்திரேலியா, இந்தியா அணிகள் மோதும் முதல் டெஸ்ட் நாளை துவங்குகிறது. இதில் இந்திய வீரர் சச்சின் தனது 100வது சதத்தை பூர்த்தி செய்வார் என எதிர் பார்க்கப்படுகிறது. இது குறித்து கிளார்க் கூறியது:

இந்திய வீரர் சச்சின் நீண்ட ஆண்டுகளாக, நம்ப முடியாத அளவில் சிறப்பான ஆட்டத்தை வெளிப்படுத்தி வருகிறார். இவரது "பேட்டிங்கை' ரசித்து பார்ப்பேன்.

இவர் சர்வதேச அரங்கில் 100வது சதத்தை நிச்சயமாக அடிப்பார். மெல்போர்னில் சச்சினின் ஆட்டத்தை காண நிறைய ரசிகர்கள் வருவர்.

இவருக்கு ஆதரவு அதிகம் இருக்கும். இவர் 100வது சதம் அடிக்க வாழ்த்துகிறேன். ஆனால், இம்முறை இந்த சாதனை வேண்டாம். வேறு அணிக்கு எதிராக அல்லது அடுத்த தொடரில் வேண்டும் என்றால் அடித்துக் கொள்ளட்டும்.

முதல் டெஸ்டில் விளையாடும் 11 வீரர்களை அறிவித்துள்ளோம். இவர்கள் முதல் டெஸ்டில் வெற்றி தேடித் தருவார்கள் என உறுதியாக நம்புகிறேன்.

மிட்சல் ஸ்டார்க், கிறிஸ்டியன் நீக்கப்பட்டு, பாண்டிங், ஹசி ஆகியோருடன் நானும், ஒரு சில ஓவர்கள் பவுலிங் செய்வோம். டேவிட் வார்னர் பேட்ஸ்மேனாக மட்டுமில்லாமல், பவுலராகவும் கலக்க காத்திருக்கிறார்.

மைதானத்தில் எந்தவிதமான ஒழுங்கீனமான செயலிலும் ஈடுபடக்கூடாது என அணியினரை எச்சரித்துள்ளேன். மீறுபவர்கள் மீது ஆஸ்திரேலிய கிரிக்கெட் (சி.ஏ.,) கடும் நடவடிக்கை எடுக்கும். டெஸ்ட் தொடருக்காக நல்ல முறையில் தயாராகி உள்ளோம். எனவே ஐந்து நாளும் நிலையான ஆட்டத்தை வெளிப்படுத்தி பெற்றி பெறுவோம். நாளை "டாஸ்' வெல்லும் வாய்ப்பு கிடைத்தால், பேட்டிங் தான் தேர்வு செய்வோம்.

இவ்வாறு கிளார்க் கூறினார்.

மீண்டும் சுழல் புயல்

2011-12-23T19:33:00.000-08:00

சர்வதேச கிரிக்கெட் அரங்கில் இருந்து கும்ளே (இந்தியா), வார்ன் (ஆஸ்திரேலியா), முரளிதரன் (இலங்கை) ஆகியோர் அடுத்தடுத்து ஓய்வு பெற, சுழற்பந்துவீச்சு துறையில் மிகப் பெரும் வெற்றிடம் ஏற்பட்டது.

தற்போது அஷ்வின், ஹபீஸ், சயீத் அஜ்மல் போன்ற திறமையான வீரர்களின் வரவால், சுழற்பந்துவீச்சு மீண்டும் புத்துயிர் பெற்றுள்ளது.

இந்த ஆண்டு இதுவரை நடந்துள்ள ஒருநாள் போட்டிகளில் மொத்தம் 1930 விக்கெட்டுகள் வீழ்த்தப்பட்டுள்ளன. இதில் சுழற்பந்துவீச்சின் மூலம், 732 விக்கெட்டுகள் கைப்பற்றப்பட்டன. இது கடந்த ஆண்டைக் காட்டிலும் 71 விக்கெட் அதிகம்.

கடந்த 2004ம் ஆண்டில் இருந்து சுழற்பந்துவீச்சின் மூலம் கிடைத்த விக்கெட் விவரம்:

ஆண்டு மொத்த விக்., சுழல் விக்.,

2011 1930 732

2010 1911 661

2009 1939 630

2008 1605 524

2007 2462 708

2006 2131 636

2005 1402 351

2004 1590 446

அப்ரிதி முன்னிலை

இந்த ஆண்டு இதுவரை விளையாடிய ஒருநாள் போட்டிகளில் அதிக விக்கெட் கைப்பற்றிய

சுழற்பந்துவீச்சாளர்கள் வரிசையில், பாகிஸ்தான் "ஆல்-ரவுண்டர்' அப்ரிதி முன்னிலை வகிக்கிறார்.

இவர், 27 போட்டியில் 45 விக்கெட் வீழ்த்தியுள்ளார். முதல் மூன்று இடங்களில் பாகிஸ்தான் வீரர்கள் உள்ளனர். இந்தியா சார்பில் அஷ்வின், 18 போட்டியில் 25 விக்கெட் வீழ்த்தியுள்ளார்.

இந்த ஆண்டு சுழற்பந்துவீச்சாளர்களின் செயல்பாடு:

வீரர் போட்டி விக்கெட்

அப்ரிதி (பாக்.,) 27 45

அஜ்மல் (பாக்.,) 20 34

ஹபீஸ் (பாக்.,) 32 32

சுவான் (இங்கிலாந்து) 21 31

சாகிப் (வங்கதேசம்) 20 25

அஷ்வின் (இந்தியா) 18 25

ஜடேஜா (இந்தியா) 13 24

முதல் டெஸ்டில் சச்சின் 100வது சதம்

2011-12-23T08:36:00.000-08:00

ஆஸ்திரேலிய மண்ணில், சச்சின், தனது 100வது சர்வதேச சதத்தை பதிவு செய்வார். இந்த சாதனையை முதல் டெஸ்டில் படைக்க வாழ்த்துகிறேன், என, ஆஸ்திரேலிய சுழல் ஜாம்பவான் ஷேன் வார்ன் தெரிவித்துள்ளார்.

ஆஸ்திரேலியா சென்றுள்ள இந்திய அணி, நான்கு போட்டிகள் கொண்ட டெஸ்ட் தொடரில் பங்கேற்கிறது. முதல் டெஸ்ட், வரும் 26ம் தேதி மெல்போர்னில் துவங்குகிறது.

இத்தொடரில் இந்திய அணியின் "மாஸ்டர் பேட்ஸ்மேன் சச்சின், தனது 100வது சர்வதேச சதத்தை அடிப்பார் என எதிர்பார்க்கப்படுகிறது. இவர், இதுவரை 99 சதம் (டெஸ்ட் 51 + ஒருநாள் 48) அடித்துள்ளார்.

இதுகுறித்து வார்ன் கூறியதாவது:

இந்திய வீரர் சச்சின், தனது 100வது சதத்தை ஆஸ்திரேலிய மண்ணில் பதிவு செய்ய அதிக வாய்ப்பு உள்ளது. இதனை, மெல்போர்னில் நடக்கவுள்ள முதல் டெஸ்டில் நிகழ்த்த வாழ்த்துகிறேன். சுமார் 70 முதல் 80 ஆயிரம் ரசிகர்கள் முன்னிலையில், இவர் சாதனை நிகழ்த்தும் பட்சத்தில், அது சிறப்பு வாய்ந்ததாக இருக்கும்.

பலமான பேட்டிங்:

டெஸ்ட் தொடருக்கான இந்திய அணியின் பேட்டிங் வரிசை பலமாக உள்ளது. குறிப்பாக அனுபவ வீரர் ராகுல் டிராவிட், அதிக ரன் குவிக்க வாய்ப்பு உள்ளது. சமீபகாலமாக டெஸ்ட் அரங்கில், இந்திய அணி சிறப்பாக விளையாடி வருகிறது. சமீபத்தில் வெஸ்ட் இண்டீசுக்கு எதிரான டெஸ்ட் தொடரில், இந்திய வீரர்கள் அருமையாக பேட் செய்தனர்.

"பவுலிங் பலவீனம்:

இத்தொடரில், இந்திய அணியின் வெற்றிக்கு பவுலர்களின் உடற்தகுதி முக்கிய பங்குவகிக்கும். அனுபவ வீரர் ஜாகிர் கான், இஷாந்த் சர்மா ஆகியோர் காயம் உள்ளிட்ட பிரச்னைகளில் சிக்கிக் கொள்ளக் கூடாது.

ஒருவேளை இவர்களுக்கு காயம் ஏற்படும் பட்சத்தில், அது இந்திய அணிக்கு சிக்கலாகிவிடும். இந்திய அணியின் பந்துவீச்சு பலவீனமாக இருப்பதால், பவுலிங்கில் கூடுதல் கவனம் செலுத்தினால் மட்டுமே, ஆஸ்திரேலிய அணியின் 20 விக்கெட்டுகளை கைப்பற்ற முடியும்.

உடற்தகுதி முக்கியம்:

சமீபத்தில் இங்கிலாந்து மண்ணில், இந்திய அணி கண்ட மோசமான தோல்விக்கு, முன்னணி வீரர்களுக்கு ஏற்பட்ட காயம் ஒரு முக்கிய காரணமாக இருந்தது. எனவே இம்முறை இந்திய வீரர்கள், மிகுந்த எச்சரிக்கையுடன் உடற்தகுதியில் சிறப்பு கவனம் செலுத்தினால் நல்லது.

இவ்வாறு ஷேன் வார்ன் கூறினார்.

அம்பயர்கள் முட்டாள்களா?: "டிவி' நிறுவனத்துக்கு எதிர்ப்பு

2011-12-22T07:42:00.000-08:00

ஆஸ்திரேலியாவுக்கு எதிரான டெஸ்ட் தொடரில், ரசிகர்களுக்காக "ஹாட் ஸ்பாட்' தொழில் நுட்பத்தை "சேனல்-9' பயன்படுத்துவது, களத்தில் இருக்கும் அம்பயர்களை முட்டாள்களாக்கும் செயல் என விமர்சனம் எழுந்துள்ளது.

எதிர்வரும் ஆஸ்திரேலிய டெஸ்ட் தொடரில், அம்பயர் தீர்ப்பை மறுபரிசீலனை (டி.ஆர்.எஸ்.,) செய்யும் முறையை, இந்திய கிரிக்கெட் போர்டு (பி.சி.சி.ஐ.,) ஏற்கவில்லை. தவிர, இங்கிலாந்து தொடரில் கிடைத்த "கசப்பான' அனுபவம் காரணமாக, "ஹாட் ஸ்பாட்' முறையும் வேண்டாம் என பி.சி.சி.ஐ., முடிவு செய்தது.

இதற்கு எதிர்ப்பு தெரிவித்த "சேனல்-9' "டிவி' நிறுவன அதிகாரி பிராட் மெக்னாமரா,"" அம்பயர்கள் தவறு செய்தார்களா என்பதை அறிந்து கொள்ள, ரசிகர்களுக்காக மட்டும் "ஹாட் ஸ்பாட்' மூலம் சர்ச்சைக்குரிய தீர்ப்புகள் காண்பிக்கப்படும்,''என்றார்.

களத்தில் இருக்கும் அம்பயர் தரும் தீர்ப்பை ஏற்காமல், போட்டியாக வேறு ஒரு முடிவை ரசிகர்களுக்கு காட்டுவது, எல்லோரையும் குழப்பமடைய செய்யும். இது, தீர்ப்பு வழங்கிய அம்பயர்களை முட்டாள்களாக்கும் செயல் என, கடும் எதிர்ப்பு எழுந்துள்ளது.

கிளார்க் ஆதரவு:

ஆஸ்திரேலிய அணி கேப்டன் மைக்கேல் கிளார்க் கூறுகையில்,"" ஒரு தொடரில் தொழில்நுட்பத்தை பயன்படுத்தி விட்டு, அடுத்த தொடரில் நீக்குகின்றனர். இது என்ன முடிவு என்றே தெரியவில்லை.

இம்முறையை பயன்படுத்துவதில் அனைத்து கிரிக்கெட் போர்டுகளும், நிலையான முடிவு எடுக்க வேண்டும். சர்வதேச கிரிக்கெட் கவுன்சில் (ஐ.சி.சி.,) இவ்விஷயத்தில் தலையிட்டு உடனடியாக முடிவு எடுக்க வேண்டும்,'' என்றார்.

ஆஸி., தொடரில் "ஹாட் ஸ்பாட்' இல்லை

2011-12-21T07:50:00.000-08:00

ஆஸ்திரேலியாவுக்கு எதிரான டெஸ்ட் தொடரில், "ஹாட் ஸ்பாட்' தொழில் நுட்பத்தை பயன்படுத்த பி.சி.சி.ஐ., மறுப்பு தெரிவித்துள்ளது.

அம்பயர் தீர்ப்பை மறுபரிசீலனை (டி.ஆர்.எஸ்.,) செய்யும் முறைக்கு ஏற்கனவே இந்திய கிரிக்கெட் போர்டு (பி.சி.சி.ஐ.,) எதிர்ப்பு தெரிவித்தது. இதையடுத்து போட்டியில் பங்கேற்கும் இரு நாடுகளும் ஒத்துக் கொண்டால் மட்டுமே டி.ஆர்.எஸ்., முறையை அமல்படுத்த முடியும் என சர்வதேச கிரிக்கெட் கவுன்சில் (ஐ.சி.சி.,) அறிவித்தது.

"ஹாட் ஸ்பாட்' எப்படி?

கடந்த இங்கிலாந்து டெஸ்ட் தொடரில், டி.ஆர்.எஸ்., முறையை நிராகரித்த இந்தியா, "ஹாட் ஸ்பாட்' முறையை மட்டும் ஏற்றுக் கொண்டது. இதன் படி, "இன்பிரா ரெட் கேமரா' மூலம் வீரர்களின் அசைவுகள் கறுப்பு வெள்ளை ("நெகடிவ்') படங்களாக பதிவு செய்யப்படும்.

பந்து பேட்டின் மீது பட்டால், அந்த இடத்தில் மட்டும் வெள்ளையாக தெரிவதை வைத்து, "அவுட்' கொடுக்கலாம்.

பாதிப்பு அதிகம்:

ஆனால், இங்கிலாந்து தொடரில், லட்சுமண் பேட்டில், பந்து பட்டதாக சர்ச்சை எழுந்தது. இதனை "ஹாட் ஸ்பாட்' முறையில் சரியாக உறுதி செய்ய முடியவில்லை. இதே போல டிராவிட்டுக்கும் பலமுறை தவறாக "அவுட்' கொடுக்கப்பட்டது. இதையடுத்து ஆஸ்திரேலிய டெஸ்ட் தொடரில் "ஹாட் ஸ்பாட்' முறை வேண்டாம் என பி.சி.சி.ஐ., முடிவு செய்ததாக தெரிகிறது.

குழப்பமாக உள்ளது:

இதுகுறித்து போட்டியை ஒளிபரப்பும் ஆஸ்திரேலிய சேனலின் அதிகாரி பிராட் மெக்னாமரா கூறுகையில்,""கடந்த முறை ஆஸ்திரேலியா சென்ற போது, இந்திய அணிக்கு எதிராக தீர்ப்புகள் வழங்கப்பட்டதாக கூறப்பட்டது.

இந்நிலையில் டி.ஆர்.எஸ்., மற்றும் "ஹாட் ஸ்பாட்' தொழில் நுட்பம் வேண்டாம் என கூறியுள்ளது வியப்பாக இருக்கிறது. இத்தொடரில், இந்திய அணி சில பாதகமான தீர்ப்புகளை பெற்றால், டி.ஆர்.எஸ்., வேண்டும் என்று கூறத் துவங்கிவிடுவர்.

அம்பயர்கள் தவறு செய்தார்களா என்பதை அறிந்து கொள்ள, ரசிகர்களுக்காக மட்டும் "ஹாட் ஸ்பாட்' மூலம் சர்ச்சைக்குரிய தீர்ப்புகள் காண்பிக்கப்படும்,''என்றார்.

ராகவேந்திரா பயிற்சியில் சச்சின்

2011-12-20T08:45:00.000-08:00

முதல் தர போட்டியில் கூட பங்கேற்காத ராகவேந்திரா என்பவரது பந்துவீச்சில், பயிற்சி மேற்கொண்டார் சச்சின்.

இந்திய அணியின் "மாஸ்டர் பேட்ஸ்மேன்' சச்சின். சர்வதேச கிரிக்கெட் அரங்கில் 100வது சதத்தை எடுக்க, தீவிர முயற்சி செய்து வருகிறார். இம்முறை ஆஸ்திரேலியாவின் ஆடுகளங்களில் ஏற்படும் "அவுட் சுவிங்' பவுலிங்கை சந்திக்க, நம்பகமான ஒருவரை அழைத்துச் சென்றுள்ளார்.

பெங்களூருவில் உள்ள தேசிய கிரிக்கெட் அகாடமியில் வேலை பார்த்து வருகிறார் ராகவேந்திரா, 27. இவர் இதுவரை எவ்வித முதல் தர போட்டிகளிலும் பங்கேற்றது இல்லை.

இருந்தாலும், இவரது "அவுட் சுவிங்' பந்து வீசும் திறன், பேட்டிங் பயிற்சிக்கு பெரிய உதவியாக இருக்கும் என்று நம்பினார் சச்சின்.

இதற்கு டிராவிட்டும் ஆதரவு தர, இந்திய கிரிக்கெட் போர்டு (பி.சி.சி.ஐ.,) அனுமதியுடன் ஆஸ்திரேலியா பறந்து விட்டார்.

தற்போது வலைப்பயிற்சியின் போது சச்சினுக்கு, ஏராளமான "அவுட் சுவிங்' பந்துகளை வீசி வருகிறார். இதனால் ராகவேந்திரா, சச்சினின் பாராட்டு மழையில் நனைந்து வருகிறார்.

சச்சினை வீழ்த்துமா சாப்பல் திட்டம்

2011-12-19T08:18:00.000-08:00

ஆஸ்திரேலியாவுக்கு எதிரான டெஸ்ட் தொடரில் சச்சின் உட்பட இந்திய பேட்ஸ்மேன்களை வீழ்த்த, கிரெக் சாப்பல் வகுக்கும் திட்டம் பலிக்காது,'' என, கங்குலி தெரிவித்துள்ளார்.

ஆஸ்திரேலியா சென்றுள்ள இந்திய அணி நான்கு போட்டிகள் கொண்ட டெஸ்ட் தொடரில் பங்கேற்கிறது. இதில், இந்திய அணியின் "மாஸ்டர் பேட்ஸ்மேன்' சச்சின் தனது 100வது சர்வதேச சதம் அடிக்க காத்திருக்கிறார்.

ஆஸ்திரேலியாவுக்கு எதிராக எப்போதுமே அசத்தும் இவர், 31 டெஸ்டில் 11 சதங்கள் உட்பட 3,151 ரன்கள்(சராசரி 60.59 ) எடுத்துள்ளார். இவரை எப்படி சமாளிப்பது என ஆஸ்திரேலிய பவுலர்கள் பயந்து போயுள்ளனர்.

அதிரடி திட்டம்:

இவர்களது அச்சத்தை போக்க, கிரெக் சாப்பலை பயன்படுத்த ஆஸ்திரேலிய பயிறசியாளர் மிக்கி ஆர்தர் முடிவு செய்துள்ளார். ஏற்கனவே இந்திய பயிற்சியாளராக இருந்த சாப்பல் அனுபவ வீரர்களான சச்சின், சேவக், டிராவிட் போன்றவர்களின் பலம், பலவீனம் அறிந்தவர்.

முதல் டெஸ்ட் போட்டி(டிச., 26-30) துவங்கும் முன்பு இவர், சக ஆஸ்திரேலிய வீரர்களிடம் உரை நிகழ்த்த திட்டமிட்டுள்ளார். அப்போது இந்திய பேட்ஸ்மேன்களின் ஆட்ட முறை பற்றி எடுத்துக் கூறுவார் என தெரிகிறது. இதன் மூலம் சச்சின் விக்கெட்டை எளிதில் வீழ்த்தி விடலாம் என ஆஸ்திரேலியா எண்ணுகிறது.

இந்திய அணியின் பயிற்சியாளராக இருந்த காலத்தில் கங்குலி உட்பட மற்ற வீரர்களுடன் மோதல் போக்கை கடைபிடித்தவர் சாப்பல். இந்நிலையில் இவரது தற்போதைய திட்டம் எடுபடாது என முன்னாள் கேப்டன் கங்குலி கூறியுள்ளார்.

இது குறித்து கங்குலி கூறியது:

கடந்த 2008ல் இந்தியா வந்த ஆஸ்திரேலிய அணி, டெஸ்ட் தொடரை 2-0 என பரிதாபமாக இழந்தது. அப்போது ஆஸ்திரேலிய அணியின் நிர்வாகிகளில் ஒருவராக கிரெக் சாப்பலும் இருந்தார். எனவே, இவரது உதவி ஆஸ்திரேலிய அணிக்கு இம்முறையும் பயன் அளிக்காது. இவரது திட்டமும் எடுபடாது.

துணிச்சல் இல்லை:

இந்திய அணியின் சர்ச்சைக்குரிய பயிற்சியாளராக மூன்று ஆண்டுகள்(2005-07) சாப்பல் இருந்தார். இவரை பயிற்சியாளராக தேர்வு செய்தது எனது தவறு தான். தனிப்பட்ட முறையில் வீரர்களை பழிவாங்கும் எண்ணத்துடன் செயல்பட்டார்.

சச்சின், லட்சுமண், ஜாகிர், ஹர்பஜன் போன்ற உலக தரம் வாய்ந்த வீரர்களுக்கு எதிரானரவாக இருந்தார். அணியின் எதிர்காலம் தொடர்பாக எந்த ஒரு தொலைநோக்கு பார்வையும் அவரிடம் காணப்படவில்லை.

தொடர்ந்து தவறு மேல் தவறு செய்தார். ஆனாலும், அப்போதைய கேப்டன் டிராவிட்டுக்கு அவரது தவறை தடுத்து நிறுத்தும் துணிச்சல் இல்லை.

இவ்வாறு கங்குலி கூறினார்.

சச்சினுக்கு ஆதரவாக தீர்மானம்

2011-12-18T01:42:00.000-08:00

நாட்டின் மிக உயர்ந்த பாரத ரத்னா விருதை, கிரிக்கெட் வீரர் சச்சினுக்கு வழங்க வேண்டும் என, மகாராஷ்டிரா கிரிக்கெட் சங்கம் (எம்.சி.ஏ.,) தீர்மானம் நிறைவேற்றி உள்ளது.

கலை, இலக்கியம், அறிவியல், பொதுமக்கள் சேவை போன்றவற்றில் சிறந்து விளங்குபவர்களுக்கு தான் பாரத ரத்னா விருது வழங்கப்பட்டு வந்தது.

இதனிடையே, விளையாட்டு உள்ளிட்ட அனைத்து துறைகளிலும் சிறந்து விளங்குபவர்களும், இவ்விருது பெறலாம் என, மத்திய அரசு விதிமுறையில் சில திருத்தங்கள் செய்யப்பட்டது.

இதன்படி கிரிக்கெட் அரங்கில் எண்ணற்ற சாதனை படைத்துள்ள இந்திய "மாஸ்டர் பேட்ஸ்மேன்' சச்சினும் இவ்விருதை பெற வாய்ப்பு வந்துள்ளது.

இதற்கு எம்.சி.ஏ., ஆதரவு தெரிவித்துள்ளது. இதுகுறித்து இதன் துணைத்தலைவர் ரத்னாகர் ஷெட்டி கூறுகையில்,"" சச்சினுக்கு பாரத ரத்னா விருது வழங்க வேண்டும் என்ற, தீர்மானம் நிறைவேற்றப்பட்டது.

எங்களது வேண்டுகோளை, மகாராஷ்டிரா அரசு மத்திய அரசிடம் கொண்டு செல்ல வேண்டும். இதுகுறித்து எங்களது செயலர்கள், மகாராஷ்டிரா அரசுக்கு கடிதம் எழுதுவார்கள்,'' என்றார்.

இந்திய அணியின் அடுத்த வாரிசுகள்

2011-12-16T09:26:00.000-08:00

இந்திய அணியின் "பிக்-3' என்றழைக்கப்படும் சச்சின், லட்சுமண், டிராவிட் ஆகியோர் விரைவில் ஓய்வு பெறவுள்ள நிலையில், இந்த இடத்தை நிரப்ப தகுதியான இருவராக ரோகித் சர்மா, விராத் கோஹ்லி உருவெடுத்துள்ளனர்.

இந்திய அணியின் "மிடில் ஆர்டரில்' கங்குலி ஓய்வுக்குப் பின், அந்த இடம் சரியாக நிரப்பப்படாமல் உள்ளது. இந்த இடத்துக்கு பத்ரிநாத், புஜாரா, ரெய்னா, யுவராஜ் என மாறி, மாறி வந்தும் இன்னும் யாரும் நிலைத்த பாடில்லை.

இந்நிலையில் தற்போதைய அணியின் மும்மூர்த்திகள் என்று அழைக்கப்படும் சச்சின், டிராவிட், லட்சுமண் ஆகிய மூவரும் மிக விரைவில் டெஸ்ட் அரங்கில் இருந்து ஓய்வு பெறுவர் என்று எதிர்பார்க்கப்படுகிறது.

கடும் போட்டி:

ஏற்கனவே, "மிடில் ஆர்டரில்' ஒரு இடம் உறுதியில்லாமல் உள்ளது. இந்நிலையில் சச்சின், லட்சுமண், டிராவிட் ஆகியோருக்கு, எதிர்வரும் ஆஸ்திரேலிய தொடர் தான் கடைசியாக இருக்கும் என்ற நிலையில், இந்த மூன்று இடங்களுக்கு கடும் போட்டி உருவாகியுள்ளது.

முந்தும் "இருவர்':

ரோகித் சர்மா, 24, விராத் கோஹ்லி, 25, ஆகியோர் இரு இடங்களைப் பெறுவதில் முன்னணியில் உள்ளனர். வெஸ்ட் இண்டீஸ் அணிக்கு எதிரான ஒருநாள் தொடரில் "டாப்' பார்மில் இருக்கும் இவர்கள், வரும் டிசம்பர் 26ல் துவங்கும், ஆஸ்திரேலியாவுக்கு எதிரான டெஸ்ட் போட்டியில் களமிறங்கும் வாய்ப்பு அதிகரித்துள்ளது.

கோஹ்லி முன்னிலை:

இதில் ரோகித் சர்மாவை விட, டில்லியின் விராத் கோஹ்லிக்கு விளையாடும் "லெவனில்' இடம்பெற அதிக வாய்ப்புள்ளது. வெஸ்ட் இண்டீஸ் அணிக்கு எதிரான மூன்றாவது டெஸ்டில் அரைசதம் அடித்த விராத் கோஹ்லி, இரண்டாவது ஒருநாள் போட்டியிலும் சதம் (117) அடித்து அசத்தினார்.

மொத்தம் பங்கேற்ற 72 ஒருநாள் போட்டியில் 9 சதம் அடித்துள்ளார். இதில் கடைசி 9 போட்டியில், 3 முறை சதம் அடித்துள்ளார். இந்த ஆண்டு அதிக ரன்கள் குவித்த வீரர்கள் வரிசையில், 900க்கும் அதிகமாக குவித்து, இரண்டாவது இடத்தில் உள்ளார்.

ரோகித் பரிதாபம்:

மறுமுனையில் ரோகித் சர்மாவை துரதிருஷ்டம் துரத்துகிறது. உண்மையை சொன்னால், இவர் கடந்த 2010ல் தென் ஆப்ரிக்க அணிக்கு எதிரான டெஸ்ட் தொடரில் அறிமுகமாக வேண்டியது. நாக்பூரில் போட்டி துவங்க சில மணி நேரங்கள் இருந்த போது ஏற்பட்ட கணுக்கால் காயம் காரணமாக, அணியில் இருந்து வெளியேறினார்.

மீண்டும் காயம்:

கடந்த டிசம்பரில் இங்கிலாந்துக்கு எதிரான முதல் ஒருநாள் போட்டியில், சந்தித்த முதல் பந்திலேயே விரல் எலும்பு முறிந்து நாடு திரும்பினார். சொந்த மண்ணில் இங்கிலாந்துக்கு எதிராக விளையாட முடியாத நிலையில், இப்போது வெஸ்ட் இண்டீஸ் அணிக்கு எதிராக பட்டையை கிளப்பிக் கொண்டிருக்கிறார். தற்போதைய முதல் மூன்று போட்டியில் ரோகித் சர்மா 72, 90*, 95 என ரன்கள் குவித்தார்.

வெங்சர்க்கார் பாராட்டு:

இந்த இருவர் குறித்து இந்திய அணியின் தேர்வுக்குழு முன்னாள் தலைவர் வெங்சர்க்கார் கூறுகையில்,""சர்வதேச போட்டிகளில் "ஷார்ட் பிட்ச்' பந்துகளை கையாளும் திறன் அதிகம் தேவை.

இவ்விஷயத்தில் ரோகித் சர்மா, விராத் கோஹ்லி இருவரும், "சூப்பர்' திறமை பெற்றுள்ளனர். இவர்களுக்கு டெஸ்ட், ஒருநாள் மற்றும் "டுவென்டி-20' என, அனைத்துவிதமான போட்டிகளிலும் இடம் பெறத் தகுதியுள்ளது,'' என்றார்.

மொத்தத்தில் இந்த இளம் வீரர்களுக்கு பந்துகள் எகிறும் ஆஸ்திரேலிய ஆடுகளங்களில், கடும் சோதனை காத்திருக்கிறது.

பகலிரவு டெஸ்ட் போட்டி - டிராவிட் விருப்பம்

2011-12-15T08:29:00.000-08:00

டெஸ்ட் போட்டியை காப்பாற்ற வேண்டும். இதற்காக பகலிரவு டெஸ்ட் அல்லது டெஸ்ட் சாம்பியன்ஷிப் தொடரை நடத்துவது பற்றி ஐ.சி.சி., பரிசீலிக்க வேண்டும்,'' என, இந்திய வீரர் டிராவிட் கேட்டுக் கொண்டார்.

ஆஸ்திரேலியா சென்றுள்ள டிராவிட், வரலாற்று சிறப்பு வாய்ந்த பிராட்மேன் நினைவு உரையாற்றினார். இதன் மூலம், இந்த உரை நிகழ்த்தும் முதலாவது வெளிநாட்டு வீரர் என்ற பெருமை பெற்றார். மிகவும் உணர்ச்சிகரமாக பேசிய டிராவிட், டெஸ்ட் போட்டிக்கு முக்கியத்துவம் அளிக்க வேண்டும் என வலியுறுத்தினார். இது குறித்து டிராவிட் பேசியதாவது:

டெஸ்ட் போட்டி என்பது தங்கத்தை போன்று தரம்வாய்ந்தது. இதனை விளையாடவே கிரிக்கெட் வீரர்கள் விரும்புகின்றனர். ரசிகர்கள் வேண்டுமானால் "டுவென்டி-20' அதிரடியை காண விரும்பலாம்.

டெஸ்ட் போட்டியை காண அதிகமான ரசிகர்களை மைதானத்துக்கு வரவழைக்க வேண்டும். இதற்காக பகலிரவு டெஸ்ட் அல்லது டெஸ்ட் சாம்பியன்ஷிப் தொடரை நடத்தலாம். கடந்த ஆண்டு அபுதாபியில் நடந்த முதல் தர பகலிரவு போட்டியில் பங்கேற்றேன்.

இந்த அனுபவத்தின் அடிப்படையில் பார்த்தால், ஒளிவெள்ளத்தில் டெஸ்ட் போட்டியை தாராளமாக நடத்தலாம். இது பற்றி சர்வதேச கிரிக்கெட் கவுன்சில்(ஐ.சி.சி.,) ஆய்வு செய்ய வேண்டும்.

ஒருநாள் போட்டி குறைப்பு:

தற்போது அதிகமான ஒருநாள் போட்டிகள் நடத்தப்படுகின்றன. இதன் எண்ணிக்கையை கணிசமாக குறைக்க வேண்டும். சமீபத்தில் இங்கிலாந்து சென்று ஐந்து ஒருநாள் போட்டிகளில் இந்தியா விளையாடியது. பதிலுக்கு இங்கிலாந்து அணி, இந்தியா வந்து ஒருநாள் போட்டிகளில் பங்கேற்ற போது, ரசிகர்கள் மத்தியில் ஆர்வம் இல்லை.

இதனால் மைதானங்கள் வெறிச்சோடி கிடந்தன. அதே நேரத்தில் வெஸ்ட் இண்டீஸ்-இந்தியா இடையிலான ஒருநாள் தொடரின் போது மைதானங்கள் நிரம்பி வழிந்ததை காண முடிந்தது.

எனவே, உலக கோப்பை, சாம்பியன்ஸ் டிராபி போன்ற முக்கிய தொடர்கள் தவிர, தேவையில்லாமல் நடத்தப்படும் ஒருநாள் போட்டிகளை குறைப்பது மிகவும் அவசியம்.

இவ்வாறு டிராவிட் கூறினார்.

மவுனத்தை கலைத்தார் கும்ளே - ராஜினாமா பின்னணி

2011-12-14T08:33:00.000-08:00

பி.சி.சி.ஐ., மற்றும் கும்ளே இடையிலான மோதல் முற்றுகிறது. தனது தொலைநோக்கு திட்டங்கள் நிராகரிக்கப்பட்டதால் தான், தேசிய கிரிக்கெட் அகாடமியின் தலைவர் பதவியை ராஜினாமா செய்ததாக கும்ளே தெரிவித்துள்ளார்.

இந்திய கிரிக்கெட் அணியின் "சுழல்' ஜாம்பவான் கும்ளே. ஓய்வுக்கு பின், பெங்களூருவில் உள்ள தேசிய கிரிக்கெட் அகாடமியின் தலைவராக பொறுப்பேற்றார்.

போதிய நேரம் இல்லாததால், இப்பதவியை ராஜினாமா செய்வதாக திடீரென அறிவித்தார். இதனை இந்திய கிரிக்கெட் போர்டு(பி.சி.சி.ஐ.,) ஏற்றுக் கொண்டது.

ஆதரவு இல்லை:

இந்தச் சூழலில் தனது ராஜினாமாவுக்கான காரணத்தை கும்ளே போட்டு உடைத்துள்ளார். இது குறித்து இவர் கூறுகையில்,""தேசிய கிரிக்கெட் அகாடமியை இன்னும் சிறப்பான மையமாக மாற்ற 3 ஆண்டுகளுக்கான தொலைநோக்கு திட்டத்தை வகுத்தேன்.

இத்திட்டம் ஏற்கப்படும் என்ற நம்பிக்கையில், 10 முறை விளக்கி கூறினேன். ஆனால், கமிட்டியின் உறுப்பினர்கள் யாரும் ஏற்க தயாராக இல்லை. எனது பேச்சுக்கு மதிப்பு அளிக்காத நிலையில், வெறும் தலைவராக இருந்து பயன் இல்லை என நினைத்தேன்.

எனவே, ராஜினாமா செய்வதை தவிர எனக்கு வேறுவழி தெரியவில்லை,''என்றார்.

செலவு அதிகம்:

இது குறித்து பி.சி.சி.ஐ., அதிகாரி ஒருவர் கூறுகையில்,""வீரர்களை காயத்தில் இருந்து மீட்பது தொடர்பாக, கம்ப்யூட்டர் தொழில்நுட்பத்துடன் கூடிய திட்டத்தை கும்ளே சமர்ப்பித்தார். இதற்கு செலவு அதிகம். தவிர, ஒரு குறிப்பிட்ட கம்ப்யூட்டர் நிறுவனம் தான் இதனை கையாள வேண்டும் என நிர்ப்பந்தித்தார். இந்நிறுவனத்திடம் இருந்து அவர் கமிஷன் பெற வாய்ப்பு இருப்பதாக புகார் எழுந்தது. இதனால் தான் அவரது திட்டத்தை ஏற்க முடியவில்லை,''என்றார்.

கவாஸ்கர் ஆவேசம்

தேசிய கிரிக்கெட் அகாடமியின் தலைவர் பதவியில் இருந்த கபில் தேவ் நீக்கப்பட்டார். அடுத்து வந்த ரவி சாஸ்திரி விலகினார். தற்போது கும்ளேவும் ராஜினாமா செய்துள்ளார். இது குறித்து முன்னாள் கேப்டன் கவாஸ்கர் கூறுகையில்,""சர்வதேச போட்டிகளில் விளையாடியவர் கும்ளே. பல முறை காயம் அடைந்த அனுபவம் அவருக்கு உண்டு.

அவர் அளிக்கும் திட்டம் வீரர்களுக்கு பயனுள்ளதாக தான் இருக்கும். இத்திட்டம் குறித்து குறைந்தபட்சம் விவாதித்து இருக்க வேண்டும். நிராகரித்தது சரியல்ல. ஐ.பி.எல்., பணிகளுக்காக எனக்கு வழங்குவதாக உறுதி அளித்த ரூ. 4 கோடி இன்னும் அளிக்கப்படவில்லை. ஒட்டுமொத்தமாக பி.சி.சி.ஐ., மீதான நம்பிக்கை தகர்ந்து போயுள்ளது,''என்றார்.

கும்ளே திடீர் ராஜினாமா

2011-12-13T08:18:00.000-08:00

தேசிய கிரிக்கெட் அகாடமியின் தலைவர் பதவியை ராஜினாமா செய்தார் அனில் கும்ளே. தற்காலிக தலைவராக பாண்டோவ் நியமிக்கப்பட்டார்.

இந்திய கிரிக்கெட் அணியின் "சுழல்' ஜாம்பவான் கும்ளே. ஓய்வுக்கு பின், தேசிய கிரிக்கெட் அகாடமியின் தலைவராக பொறுப்பேற்றார். கர்நாடக கிரிக்கெட் சங்கத்தின் தலைவராகவும் உள்ளார். தவிர, ஐ.பி.எல்., பெங்களூரு ராயல் சாலஞ்சர்ஸ் அணியின் ஆலோசகராகவும் இருக்கிறார்.

இப்படி பல பொறுப்புகளில் இருப்பதால், போதிய நேரம் இல்லாததால், தேசிய கிரிக்கெட் அகாடமியின் தலைவர் பதவியை ராஜினாமா செய்வதாக தெரிவித்தார்.

இதனை இந்திய கிரிக்கெட் போர்டின்(பி.சி.சி.ஐ.,) செயற்குழு நேற்று ஏற்றுக் கொண்டது. தற்காலிக தலைவராக பஞ்சாப் கிரிக்கெட் சங்கத்தின் பொதுச் செயலர் பாண்டோவ் நியமிக்கப்பட்டார்.

உண்மை என்ன?

பி.சி.சி.ஐ., நிர்வாகிகளுடன் ஒத்துப் போகாததால் தான் பதவியை கும்ளே ராஜினாமா செய்ததாக தெரிகிறது. ஒரு காலத்தில் தேசிய கிரிக்கெட் அகாடமி என்பது இளம் வீரர்களை உருவாக்கும் களமாக இருந்தது.

தற்போது காயமடைந்த வீரர்களுக்கு பயிற்சி அளிக்கும் மையமாக மாறியுள்ளது. இதற்கு கும்ளே எதிர்ப்பு தெரிவிக்க, பிரச்னை வெடித்துள்ளது. தவிர, "டென்விக்' என்ற விளையாட்டு நிறுவனத்தை கும்ளே நடத்தி வருகிறார்.

இதில், கர்நாடகாவின் வினய் குமார், ஸ்ரீநாத் அரவிந்த் உள்ளிட்ட இளம் வீரர்கள் ஒப்பந்தம் செய்யப்பட்டுள்ளனர். தனது செல்வாக்கை பயன்படுத்தி இவர்களை, இந்திய அணியில் இடம் பெறச் செய்ததாக கும்ளே மீது புகார் கூறப்பட்டது.

இப்படி தொடர்ந்து பிரச்னை ஏற்பட்டதால் தான் தேசிய கிரிக்கெட் அகாடமியின் பதவியை ராஜினாமா செய்துள்ளார்.

ஐ.பி.எல்., வீரர்கள் ஏலம் எப்போது?

2011-12-12T08:02:00.000-08:00

ஐந்தாவது ஐ.பி.எல்., தொடருக்கான வீரர்கள் ஏலம், அடுத்த மாதம் கடைசியில் அல்லது பிப்ரவரி மாதம் துவக்கத்தில் நடக்கலாம்.

ஐந்தாவது ஐ.பி.எல்., "டுவென்டி-20' கிரிக்கெட் தொடர், அடுத்த ஆண்டு ஏப்ரல் 4ம் தேதி முதல் மே 27ம் தேதி வரை நாட்டின் முக்கிய நகரங்களில் நடக்கவுள்ளது.

இத்தொடரை நடத்துவது குறித்து ஐ.பி.எல்., நிர்வாகக்குழு கூட்டம் நேற்று முன்தினம் சென்னையில் கூடியது. இதில் சில முக்கிய முடிவுகள் எடுக்கப்பட்டன.

சமீபத்தில், விதிமுறைகளை மீறி செயல்பட்ட காரணத்தினால் கொச்சி டஸ்கர்ஸ் கேரளா அணி ஐ.பி.எல்., தொடரில் இருந்து அதிரடியாக நீக்கப்பட்டது. இம்முறை சென்னை சூப்பர் கிங்ஸ், டில்லி டேர்டெவில்ஸ் உள்ளிட்ட ஒன்பது அணிகள் மட்டுமே பங்கேற்கின்றன.

இதனால் இம்முறை, முதல் மூன்று தொடரில் விளையாடியது போல, ஒவ்வொரு அணியும் மற்ற அணிகளுடன் தலா இரண்டு முறை மோதும். இதில் உள்ளூரில் ஒரு போட்டியிலும், வெளியூரில் (எதிரணி) ஒரு போட்டியிலும் விளையாடும்.

இதன்மூலம் இம்முறை, 72 லீக் போட்டிகள், 2 அரையிறுதி, ஒரு மூன்றாவது இடத்துக்கான போட்டி மற்றும் ஒரு பைனல் உட்பட மொத்தம் 76 போட்டிகள் நடக்கவுள்ளன. துவக்க விழா மற்றும் பைனல் சென்னை சேப்பாக்கம் மைதானத்தில் நடக்கவுள்ளது. அரையிறுதிப் போட்டிகள் பெங்களூருவில் உள்ள சின்னசாமி மைதானத்தில் நடக்கவுள்ளது.

தற்போது ஒவ்வொரு அணியிலும் 30 வீரர்கள் மட்டுமே உள்ளனர். இதனை 33 ஆக உயர்த்திக் கொள்ள அனுமதி அளிக்கப்பட்டுள்ளது. ஆனால் விளையாடும் லெவன் அணியில் நான்கு வெளிநாட்டு வீரர்கள் மட்டுமே விளையாட அனுமதிக்கப்படுவார்கள். இதில் எவ்வித மாற்றமும் செய்யவில்லை.

ஐந்தாவது ஐ.பி.எல்., தொடருக்கான வீரர்களின் ஏலம், அடுத்த மாதம் இறுதியில் அல்லது பிப்ரவரி மாதம் துவக்கத்தில் நடத்த முடிவு செய்யப்பட்டுள்ளது.

இதற்கான தேதி பின்னர் அறிவிக்கப்படும் என ஐ.பி.எல்., நிர்வாகக்குழு தலைவர் ராஜீவ் சுக்லா தெரித்துள்ளார். இந்த ஏலத்தில் ஒவ்வொரு அணியும் தலா ரூ. 10.38 கோடி செலவழிக்கலாம் என தெரிவிக்கப்பட்டுள்ளது.

நம்பியது நடந்தது - தோனி

2011-12-11T04:48:00.000-08:00

சச்சினின் 200 ரன்கள் சாதனையை சேவக் மட்டுமே முறியடிக்க முடியும் என, எப்போதும் நம்பினேன் இது சரியாக நடந்துள்ளது,'' என, இந்திய அணியின் கேப்டன் தோனி தெரிவித்துள்ளார்.

இந்தூரில் நடந்த நான்காவது போட்டியில், வெஸ்ட் இண்டீஸ் பவுலர்களை துவம்சம் செய்து இரட்டை சதம் அடித்த சேவக், ஒருநாள் கிரிக்கெட் வரலாற்றில் அதிக ரன்கள் (219) எடுத்தவர் என்ற சாதனை படைத்தார். இதற்கு பல்வேறு தரப்பில் இருந்தும் பாராட்டுகள் குவிகின்றன.

இந்திய அணியின் கேப்டன் தோனி, சேவக் சாதனை குறித்து கூறியது:

குவாலியர் போட்டியில் சச்சின் இரட்டை சதம் அடித்து சாதித்தார். இதையடுத்து எல்லோரும் பல்வேறு வீரர்களை குறிப்பிட்டு, அவர்களால் சச்சின் சாதனையை தகர்க்க முடியும் என்று கூறிவந்தனர்.

ஆனால் நான் மட்டும் சேவக்கினால் தான், இரட்டைசதம் அடிக்க முடியும் என்று உறுதியாக நம்பினேன்.

இவர் பெரிய அளவில் அதிரடியான ஆட்டக்காரர் என்பதால் மட்டும் இப்படி நினைக்கவில்லை. சாதனை நிகழ்த்தும் பேட்டிங் திறமை சேவக்கிடம் இருந்தது என்பது தான் உண்மை.

மொத்தத்தில் ஒருநாள் கிரிக்கெட்டில் அடிக்கப்பட்ட இரண்டு இரட்டை சதங்களையும், இந்திய வீரர்கள் தான் அடித்துள்ளனர் என்று நினைக்கும் போது, மிகவும் பெருமையாக உள்ளது.

இந்திய அணி தொடர்ந்து பல வெற்றிகளை பெற்று வருவதற்கு காரணம் கடின உழைப்பு தான். வேறு எந்த குறுக்கு வழியையும் நாங்கள் பின்பற்றுவது கிடையாது.

இந்தியாவில் கிரிக்கெட் மட்டுமன்றி, மற்ற விளையாட்டுகளையும் வளர்க்க வேண்டும். இதற்கான என்னென்ன வழிமுறைகள் உள்ளதோ, அவை அனைத்துக்கும் நான் உதவத் தயாராக உள்ளேன்.

இவ்வாறு தோனி கூறினார்.

சென்னையில் இன்று கிரிக்கெட் கொண்டாட்டம்

2011-12-10T21:06:00.000-08:00

இந்தியா, வெஸ்ட் இண்டீஸ் அணிகள் மோதும் ஐந்தாவது மற்றும் கடைசி ஒரு நாள் போட்டி இன்று சென்னையில் நடக்கிறது. ஆஸ்திரேலிய தொடருக்கு முன்பாக இந்திய அணி பங்கேற்கும் கடைசி போட்டி என்பதால், இதில் சேவக் மீண்டும் விளாசுவார் என எதிர்பார்க்கப்படுகிறது.

இந்தியா வந்துள்ள வெஸ்ட் இண்டீஸ் அணி, ஐந்து போட்டிகள் கொண்ட ஒரு நாள் தொடரில் பங்கேற்கிறது. நான்கு போட்டிகளின் முடிவில், 3-1 என இந்திய அணி தொடரை வென்றது. முக்கியமில்லாத ஐந்தாவது மற்-றும் கடைசி போட்டி, இன்று சென்னை சேப்பாக்கம் மைதானத்தில் நடக்கிறது.

அதிரடி தொடருமா:

சச்சின், தோனி, யுவ-ராஜ் சிங் ஆகிய முன்னணி வீரர்கள் இல்லாத போதும், இளம் இந்திய அணி பேட்டிங், பவுலிங், பீல்டிங் என அனைத்து துறைகளிலும் அசத்துகிறது. கடந்த போட்டியில் சிறப்பான ஆட்டத்தை வெளிப்படுத்திய கேப்டன் சேவக், முதன் முறையாக தொடரை வென்றுள்ளார்.

சென்னையில் அன்வர் (பாக்.,1997) இதற்கு முன் 194 ரன்கள் விளாசியுள்ளார். இதனால் இன்று @சவவக் அதிரடி தொடரும் என எதிர்பார்க்கலாம். இத்தொடரில் இதுவரை 284 ரன்கள் குவித்துள்ள ரோகித் சர்மா, விராத் கோஹ்லி (163) நல்ல "பார்மில்' இருப்பதால் கவலை இல்லை.

காம்பிர் (83), ரெய்னா (62) இருவரும் ரன்கள் சேர்க்க முயற்-சிக்க வேண்-டும்.

அஷ்வின் எதிர்பார்ப்பு:

டெஸ்ட் தொடரில் கலக்கிய சுழற்பந்து வீச்சாளர் அஷ்வின், ஒரு நாள் தொடரில் இதுவரை 4 விக்கெட் மட்டுமே கைப்பற்றியுள்ளார். சுழலுக்கு சாதகமான சென்னை ஆடுகளத்தில் இவர் எழுச்சி பெறுவார் என நம்பலாம். அறிமுக அசத்தல் ராகுல் சர்மா, ரவிந்திர ஜடேஜா விக்கெட் வேட்டை இன்று தொடர வேண்டும்.

ரஞ்சி கோப்பை தொடரில் 4 போட்டியில் 21 விக்கெட் வீழ்த்திய இர்பான் பதானுக்கு, இன்று வாய்ப்பு கிடைக்கும் என்று நம்புவோம். மற்றபடி வினய் குமார், அபிமன்யு மிதுன் சுமார் தான்.

பொறுப்பான ஆட்டம்:

பிராவோ, ராம்தின், ரசல், சிம்மன்ஸ் உள்ளிட்ட வெஸ்ட் இண்டீசின் "டாப் ஆர்டர்" வீரர்கள் நிலையான ஆட்டத்தை வெளிப்படுத்த தவறி வருகின்றனர். ஒருபோட்டியில் எழுச்சி பெற்றால், அடுத்த முறை சொதப்புகின்றனர்.

இன்று கவனமாக செயல்பட்டால் இரண்டாவது வெற்றியை பதிவு செய்யலாம். கேப்டன் சமி உட்பட பலரும் எளிதான "கேட்ச்' வாய்ப்புகளை கோட்டை விடுகின்றனர். இன்று இந்தப்பிரிவில் அக்கறை காட்ட வேண்டும்.

கீமர் ரோச், ராம்பால் துல்லியமாக பந்துவீசுவது அணிக்கு பலம் என்றால், சமி, போலார்டு, ரசல் ரன்கள் வழங்குவதில் "வள்ளலாக' உள்ளது பெரும் பலவீனமாக உள்ளது. கடந்த முறை ஏமாற்றிய "சுழலில்' சுனில் நரைன், ஆடுகளத்தின் உதவியுடன் இன்று பந்தை நன்கு சுழற்றலாம்.

ரசிகர்கள் ஆர்வம்:

மோசமான வானிலை காரணமாக, தமிழக அணி சென்னையில் விளையாடிய ரஞ்சிக் கோப்பை போட்டி பெரிதும் பாதிக்கப்பட்டது. இதனால் ஏமாற்றத்தில் இருந்த ரசிகர்கள், இன்றைய விறுவிறுப்பான போட்டியை காண ஆவலுடன் காத்திருக்கின்றனர்.

பாராட்டு மழையில் சேவக்

2011-12-09T23:18:00.000-08:00

ஒரு நாள் போட்டியின், ஒரே இன்னிங்சில் 219 ரன்கள் விளாசி, உலக சாதனை படைத்த சேவக்கிற்கு வாழ்த்துகள் குவிகின்றன. இவரது "ரோல் மாடல் சச்சின் உட்பட பிரபல கிரிக்கெட் நட்சத்திரங்கள் வாயார பாராட்டியுள்ளனர்.

இந்தூரில் நேற்று முன் தினம் நடந்த வெஸ்ட் இண்டீசுக்கு எதிரான நான்காவது ஒரு நாள் போட்டியில் இந்திய அணி வெற்றி பெற்றது. இப்போட்டியில் 219 ரன்கள் எடுத்த இந்திய கேப்டன் சேவக், ஒரு நாள் அரங்கில் புதிய வரலாறு படைத்தார். இவர், வீரர் சக வீரர் சச்சினின் சாதனையை முறியடித்தார்.

கடந்த 2010ல் குவாலியர் ஒருநாள் போட்டியில், தென் ஆப்ரிக்க அணிக்கு எதிராக சச்சின் 200 ரன்கள் எடுத்து அசத்தினார். அப்போது அவர் கூறுகையில்,"" எனது இந்த சாதனையை, சகவீரர் ஒருவர் முறியடித்தால் மகிழ்ச்சி தான், என்றார்.

இதையடுத்து எல்லோரது எதிர்பார்ப்பும்சேவக் மீது திரும்பியது. சச்சின் சாதனையை முறியடிக்க, இவரால் மட்டுமே முடியும் என்றனர். இதற்கான வாய்ப்பு கடந்த உலக கோப்பை தொடரில் கிடைத்தது. வங்கதேசத்துக்கு எதிரான இப்போட்டியில் 175 ரன்கள் எடுத்து அவுட்டானார்.

கடைசியில் சச்சினின் சாதனையை, ஒன்றரை ஆண்டில் சேவக் தகர்த்து விட்டார். வெஸ்ட் இண்டீஸ் அணிக்கு எதிரான 219 ரன்கள் அடித்துவிட்டார்.

இதுகுறித்து சேவக் கூறியது:

எனது "ரோல் மாடல் சச்சினின் சாதனையை முறியடித்தது மகிழ்ச்சியாக உள்ளது. ஒருநாள் போட்டியில் இரட்டை சதம் அடிப்பது அவ்வளவு எளிதல்ல. இத்தனை ஆண்டுகால வரலாற்றில் இதுவரை இருமுறை தான் இந்த சாதனை நிகழ்த்தப்பட்டது. தவிர, இந்த வாய்ப்பு வாழ்க்கையில் ஒருமுறை தான் கிடைக்கும். இதை சரியாக பயன்படுத்திக் கொண்டடேன்.

இந்த இரட்டை சதத்தை எனது தந்தைக்கு அர்ப்பணம் செய்கிறேன். மொத்தத்தில் இந்த இன்னிங்ஸ் சிறப்பானது ஆகும். ஏனெனில் டெஸ்ட் போட்டியில் நீண்ட நேரம் களத்தில் இருந்து விளையாடலாம். ஆனால் ஒருநாள் போட்டியில் "ரன்ரேட் முக்கியம். தவிர, ஆடுகளமும் சாதகமாக இருந்ததால் சாதிக்க முடிந்தது.

இதற்கு முன் ஆஸ்திரேலியா சென்ற இரு தொடர்களில் சிறப்பாகத் தான் செயல்பட்டோம். இம்முறையும் அதேபோல விளையாட முயற்சிப்போம்.

இவ்வாறு சேவக் கூறினார்.

தோனிக்கு பயங்கரவாதிகள் குறி

2011-12-08T08:33:00.000-08:00

இந்திய கிரிக்கெட் வீரர் தோனியின் உயிருக்கு பயங்கரவாத அமைப்புகள் குறி வைத்துள்ளதாக, மத்திய உளவுத்துறை எச்சரித்துள்ளது.

இந்திய அணியின் வெற்றிகரமான கேப்டன் தோனி. "டுவென்டி-20 (2007), 50 ஓவர் உலக கோப்பை வென்று தந்தவர். தற்போது ஓய்வில் உள்ளார்.

இவருக்கு மாவோயிஸ்ட் மற்றும் பயங்கரவாத அமைப்புகளால் ஆபத்து ஏற்படலாம் என எச்சரிக்கப்பட்டுள்ளது.

இது குறித்து மத்திய உளவுத்துறை அனைத்து மாநில உயர் போலீஸ் அதிகாரிகளுக்கு அனுப்பிய சுற்றறிக்கையில்," தோனி உள்ளிட்ட பல முக்கிய பிரமுகர்களின் உயிருக்கு, மாவோயிஸ்ட், லஷ்கர்-இ-தொய்பா, ஜெய்ஷ்-இ-முகமது பயங்கரவாத அமைப்புகள் குறி வைத்துள்ளனர்.

இதனால் பாதுகாப்பு ஏற்பாடுகளை அதிகரித்துக் கொள்ளுங்கள், என தெரிவித்துள்ளது.

இதையடுத்து ஜார்க்கண்ட் போலீசார், தோனியின் பாதுகாப்பை அதிகரித்துள்ளனர். கடந்த வாரம் ஏர்போர்ட்டில் இருந்து ஹார்மு ஹவுசிங் காலனியில் உள்ள தனது வீட்டுக்கு தோனி சென்ற போது, ஒரு ஜீப் நிறைய துப்பாக்கி ஏந்திய போலீசார் பாதுகாப்புக்கு சென்றனர்.

இது தவிர, இவரது வீடு மற்றும் அதை சுற்றியுள்ள பகுதிகளில் "கமாண்டோ போலீசார், தீவிர கண்காணிப்பில் ஈடுபட்டுள்ளனர்.

தோல்விக்கு என்ன காரணம்?

2011-12-07T08:02:00.000-08:00

மூன்றாவது ஒருநாள் போட்டியில் "டாப்-ஆர்டர்' பேட்ஸ்மேன்களின் பொறுப்பற்ற ஆட்டமே இந்திய அணியின் தோல்விக்கு முக்கிய காரணம்,'' என, கேப்டன் சேவக் தெரிவித்துள்ளார்.

இந்தியா வந்துள்ள வெஸ்ட் இண்டீஸ் அணி, ஐந்து போட்டிகள் கொண்ட ஒருநாள் போட்டி கிரிக்கெட் தொடரில் பங்கேற்கிறது. முதலிரண்டு போட்டியில் வெற்றி பெற்ற இந்திய அணி 2-0 என முன்னிலை வகித்தது.

நேற்று முன்தினம் ஆமதாபாத்தில் நடந்த மூன்றாவது ஒருநாள் போட்டியில், இந்திய அணி 16 ரன்கள் வித்தியாசத்தில் தோல்வியை சந்தித்தது.

இதுகுறித்து இந்திய கேப்டன் சேவக் கூறியதாவது: வெஸ்ட் இண்டீசுக்கு எதிரான மூன்றாவது ஒருநாள் போட்டியில் தோல்வி அடைந்தது வருத்தம் அளிக்கிறது. இதற்கு "டாப்-ஆர்டர்' பேட்ஸ்மேன்களின் சொதப்பலான ஆட்டம் முக்கிய காரணம். குறிப்பாக நானும், காம்பிரும் அடுத்தடுத்த பந்தில் "டக்-அவுட்' ஆனது பின்னடைவாக அமைந்தது.

அதன்பின் களமிறங்கிய பேட்ஸ்மேன்களிடமும் சரியான "பார்ட்னர்ஷிப்' அமையாதது வெற்றியை தட்டிப்பறித்தது. தவிர, கடந்த இரண்டு போட்டியிலும் "டாப்-ஆர்டர்' பெரிய அளவில் சோபிக்கவில்லை. மீதமுள்ள இரண்டு போட்டியிலும் பேட்ஸ்மேன்கள் கூடுதல் கவனம் செலுத்த வேண்டும். குறிப்பாக சிறந்த துவக்கம் அளிக்க முயற்சிக்க வேண்டும்.

சுரேஷ் ரெய்னா ஏமாற்றி வருவது பின்னடைவான விஷயம். ரோகித் சர்மா, விராத் கோஹ்லி உள்ளிட்டோர் நல்ல "பார்மில்' இருப்பதால், "மிடில்-ஆர்டரில்' ஓரளவு ரன் சேர்க்க முடிகிறது. இக்கட்டான நேரத்தில் ரோகித்துடன் இணைந்து அஷ்வின் கைகொடுத்தது பாராட்டுக்குரியது.

ரோகித் சர்மா, சதம் அடிக்க முடியாமல் போனது ஏமாற்றம் அளித்தது. இவரது பொறுப்பான ஆட்டம் மீதமுள்ள போட்டிகளிலும் தொடரும் என நம்புகிறேன்.

இக்கட்டான நேரத்தில் "டெயிலெண்டர்கள்' சாதிப்பது எளிதான காரியமல்ல. அபிமன்யு மிதுன், உமேஷ் யாதவ் சிறப்பாக பேட்டிங் செய்தனர். அதிரடியாக இரண்டு சிக்சர் விளாசிய மிதுன், அணியை வெற்றிக்கு மிக அருகில் அழைத்துச் சென்றார். ஆனால் துரதிருஷ்டவசமாக எல்.பி.டபிள்யு., முறையில் அவுட்டானதால், தோல்வியை சந்திக்க வேண்டியதாயிற்று.

இப்போட்டியில் இந்திய அணியின் பந்துவீச்சு சிறப்பாக இருந்தது. மிதுன், உமேஷ், வினய் என இளம் வேகப்பந்துவீச்சாளர்கள் நம்பிக்கை அளித்தனர். ஆனால், கடைசி நேரத்தில் ரன்களை வாரி வழங்கியது எதிரணிக்கு சாதகமாக அமைந்தது. வரும் போட்டிகளில் கட்டுக்கோப்பாக பந்துவீசும் பட்சத்தில், சுலப வெற்றி பெறலாம்.

இவ்வாறு சேவக் கூறினார்.

3 வாரத்தில் களம் காண்கிறார் யுவராஜ்

2011-12-06T08:01:00.000-08:00

நுரையீரல் கட்டியால் பாதிக்கப்பட்ட இந்திய கிரிக்கெட் வீரர் யுவராஜ் சிங், இப்போது குணமடைந்து வருகிறார். அவர் 3 வாரங்களில் மீண்டும் கிரிக்கெட்டில் பங்கேற்பார் என்று அவருடைய தாயார் ஷப்னம் தெரிவித்துள்ளார்.

இதுகுறித்து அவர் மேலும் கூறியது:

இன்னும் 2 அல்லது 3 வாரங்களில் களத்திலும், வெளியிலும் புதிய யுவராஜ் சிங்கைப் பார்க்கலாம். யுவராஜின் வாழ்க்கையே மாறியுள்ளது.

எதை செய்யலாம், எதை செய்யக்கூடாது என்பதை அவர் இப்போது உணர்ந்துள்ளார்.

அவர் எப்போதுமே போராடும் குணமுள்ளவர். இப்போதும் பலமானவராகவும், துணிச்சல் மிக்கவராகவும் உருவெடுத்துள்ளார்.

அவர் தனது உடல்நிலை பாதிக்கப்பட்ட காலத்தில் ஏராளமான விஷயங்களைக் கற்றுக்கொண்டுள்ளார்.

அவருடைய நுரையீரலில் ஏற்பட்ட கட்டி அபாயகரமானது என்பதை அவர் அறிந்திருந்தாலும், அந்த வலியை அவர் யாரிடமும் பகிந்து கொண்டதில்லை.

அது முழுமையாகக் குணமடைய இன்னும் சில நாள்கள் ஆகலாம். அதை பொறுப்பதைத் தவிர வேறுவழியில்லை என்றார்.

ஸ்ரீசாந்தின் வாய்ப்பு நழுவியது

2011-12-05T08:04:00.000-08:00

கால்விரலில் ஏற்பட்டுள்ள காயம் காரணமாக, கேரளா அணியின் வேகப்பந்துவீச்சாளர் ஸ்ரீசாந்த், ரஞ்சி கோப்பை "பிளேட்' லீக் தொடரில் இருந்து நீக்கப்பட்டார். இதனால் இவருக்கு, ஆஸ்திரேலியாவுக்கு எதிரான டெஸ்ட் தொடரில் இடம் பிடிக்கும் வாய்ப்பு நழுவியது.

உள்ளூர் தொடர்களில் ஒன்றான ரஞ்சி கோப்பை "பிளேட்' லீக் தொடர் நாட்டின் முக்கிய நகரங்களில் நடக்கிறது. இதில் இடம் பெற்றுள்ள கேரளா அணியில் வேகப்பந்துவீச்சாளர் ஸ்ரீசாந்த் இடம் பெற்றிருந்தார்.

சமீபத்தில் இவரது கால் விரலில் காயம் ஏற்பட்டது. இதனால் இவர், எட்டு வாரங்கள் வரை எவ்வித போட்டியிலும் பங்கேற்க முடியாத நிலை ஏற்பட்டுள்ளது.

நழுவிய வாய்ப்பு:

இதன்மூலம் ஸ்ரீசாந்துக்கு, ஆஸ்திரேலியாவுக்கு எதிரான டெஸ்ட் தொடரில் இடம் பிடிக்க முடியாத நிலை ஏற்பட்டுள்ளது. ஏனெனில் முன்னதாக ஆஸ்திரேலியாவுக்கு எதிரான டெஸ்ட் தொடருக்கு வேகப்பந்துவீச்சாளர் பிரவீண் குமார் தேர்வு செய்யப்பட்டிருந்தார்.

ஆனால் காயம் காரணமாக பிரவீண் குமார், அதிரடியாக நீக்கப்பட்டார். இவருக்கு மாற்று வீரரை, இந்திய கிரிக்கெட் போர்டின் (பி.சி.சி.ஐ.,) தேர்வுக்குழு இன்று தேர்வு செய்கிறது. இதில் இர்பான் பதான், ஸ்ரீசாந்த், அபிமன்யு மிதுன் உள்ளிட்டோரில் ஒருவருக்கு வாய்ப்பு கிடைக்கும் நிலை இருந்தது. ஆனால் காயம் காரணமாக ஸ்ரீசாந்தின் பொன்னான வாய்ப்பு வீணானது.

இதுகுறித்து ஸ்ரீசாந்த் கூறியதாவது:

முக்கியமான நேரத்தில் காயமடைந்திருப்பது வருத்தம் அளிக்கிறது. காயத்தை பரிசோதித்த டாக்டர்கள், "ஆப்பரேஷன்' செய்யும் படி அறிவுறுத்தி உள்ளனர். ஆனால் நான் "ஆப்பரேஷன்' செய்யப்போவதில்லை. மாறாக ஆயுர்வேத மருத்துவம் மேற்கொண்டு வருகிறேன். இதன்மூலம் காயத்தில் இருந்து முழுமையாக குணமடையலாம்.

ஏனெனில் முன்னதாக ஏற்பட்ட காயத்துக்கு, ஆயுர்வேத மருத்துவத்தின் மூலம் பூரண குணமடைந்தேன். காயத்தில் இருந்து மீண்டு வரும் நான், டிச., 12ம் தேதி முதல், பெங்களூருவில் உள்ள தேசிய கிரிக்கெட் அகாடமியில் மறுவாழ்வு பயிற்சி மேற்கொள்ள திட்டமிட்டுள்ளேன்.

எட்டு வாரங்கள் வரை போட்டியில் பங்கேற்க முடியாத நிலை ஏற்பட்டுள்ளதால், ஆஸ்திரேலியாவுக்கு எதிரான டெஸ்ட் தொடரில் விளையாடும் வாய்ப்பை இழந்தேன். டெஸ்ட் தொடருக்கு முன், முழுமையாக குணமடைவேன் என்ற நம்பிக்கை இல்லை.

ஆனால் ஒருநாள் தொடருக்கு முன், நூறு சதவீத உடற்தகுதி பெற்றுவிடுவேன் என எதிர்பார்க்கிறேன். இதன்மூலம் ஆஸ்திரேலியாவில் நடக்கவுள்ள முத்தரப்பு ஒருநாள் தொடரில் விளையாடுவேன் என்ற நம்பிக்கை உள்ளது.

இவ்வாறு ஸ்ரீசாந்த் கூறினார்.

ராஜஸ்தான் அணியின் புதிய கேப்டனாக ராகுல் டிராவிட் தேர்வு

2011-12-03T09:17:00.000-08:00

ஐ.பி.எல். 20 ஓவர் கிரிக்கெட் போட்டி 2008-ம் ஆண்டு அறிமுகமானது. அடுத்த ஆண்டு நடைபெற இருக்கும் இத்தொடரின் 5-வது சீஸன் போட்டியில் ராஜஸ்தான் ராயல்ஸ் அணியின் புதிய கேப்டனாக, ராகுல் டிராவிட் தேர்ந்தெடுக்கப்பட்டுள்ளார்.

ஐ.பி.எல்.-ன் முதல் முன்று சீசன்களிலும் ராகுல் டிராவிட் பெங்களூர் ராயல் சேலஞ்சர்ஸ் அணிக்காக விளையாடினார்.

கடந்த 4 -வது சீசனில்தான் ராஜஸ்தான் அணிக்காக தேர்ந்தெடுக்கப்பட்டார் என்பது குறிப்பிடத்தக்கது.

இதுவரை நடைபெற்ற ஐ.பி.எல். தொடரின் 4 சீசன்களிலும் ராஜஸ்தான் அணியின் கேப்டனாக ஆஸ்திரேலியாவின் ஷேன் வார்னே இருந்து வந்தார்.

அவருடைய தலைமையின் கீழ் 2008-ஆம் ஆண்டு ஐ.பி.எல். கோப்பையை ராஜஸ்தான் ராயல்ஸ் அணி வென்றது குறிப்பிடத்தக்கது.